ބެއިޖިން، ޗައިނާ (ޖޫން 14) - ފަލަސްތީނަށް އދ. ގެ ފުރިހަމަ މެމްބަރުކަން ދިނުމަށް ޗައިނާގެ ރައީސް ޝީ ޖިންޕިން އަނެއްކާވެސް ގޮވާލައްވައިފި އެވެ.
މީގެ ކުރިން ވެސް ޗައިނާއިން ބާރު އަޅާފައިވާ އެ މަސައްކަތަށް އަލުން ގޮވާލެއްވީ، ފަލަސްތީނުގެ ރައީސް މަހްމޫދް އައްބާސް ޗައިނާއަށް ކުރައްވަމުންދާ ދަތުރުގެ ތެރެއިންނެވެ.
މެދުއިރުމަތީގައި ސައުދީ އަރަބިއްޔާ އާއި އިރާންގެ ގުޅުން އަލުން ގާއިމްކުރަން ޗައިނާއިން އެހީވެދީފައިވާ އިރު، ފަލަސްތީނާއި އިޒްރޭލްގެ މައްސަލައިގެ މަޝްވަރާގައި ވެސް ބައިވެރިވާން ޗައިނާއިން ބޭނުންވެ އެވެ.
"ފަލަސްތީނުގެ މައްސަލައަށް ހައްލު ލިބެން އޮތް އެންމެ މައިގަނޑު ގޮތަކީ ފަލަސްތީނުގެ މިނިވަން ދައުލަތެއް ގާއިމްކުރެވުން،" މަހްމޫދް އައްބާސްއާ ބައްދަލުކުރެއްވުމަށް ފަހު ޝީ ވިދާޅުވި އެވެ.
އޭގެ އިތުރުން ޗައިނާ އާއި ފަލަސްތީނުގެ ސްޓްރެޓެޖިކް ޕާޓްނާޝިޕެއް ކަނޑައަޅައި، ހުރިހާ ގޮތަކުން ފަލަސްތީނަށް އެހީވާން ތައްޔާރަށް ހުންނެވި ކަމަށް ޝީ ވިދާޅުވި އެވެ.
ޗައިނާ ސަރުކާރުން ބުނީ ހުކުރު ދުވަހާ ހަމައަށް އައްބާސް ހުންނަވާނީ އެ ގައުމުގައި ކަމަށެވެ. މިއީ އައްބާސް ޗައިނާއަށް ކުރައްވާ ފަސް ވަނަ ރަސްމީ ދަތުރެވެ.
ފަލަސްތީނުގެ ރަސްމީ ނިއުސް އެޖެންސީ ވަފާއިން ބުނީ އައްބާސް އާއި ޗައިނާގެ ރައީސް ޝީ ޖިންޕިން ބައްދަލުކުރެއްވުމުގެ އިތުރުން ޕްރިމިއާ ލީ ޗިއާންގްއާ ވެސް ބައްދަލުކުރައްވާނެ ކަމަށެވެ.
މިދިޔަ އަހަރުގެ ޑިސެމްބަރު މަހު ޝީ ޖިންޕިން ސައުދީ އަރަބިއްޔާއަށް ކުރެއްވި ދަތުރުގެ ތެރެއިން ވެސް މަހްމޫދް އައްބާސްއާ ބައްދަލުކޮށް، ފަލަސްތީން ރައްޔިތުންގެ ހައްގުގައި މަސައްކަތް ކުރައްވާނެ ކަމަށް ވައުދުވެވަޑައިގެންނެވި އެވެ.
