ގުދުސް (ޖޫން 12) - އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫގެ ކޮރަޕްޝަން ޝަރީއަތުގައި ހޯމަ ދުވަހު ކުރީގެ ބޮޑު ވަޒީރު އަދި އިދިކޮޅު ލީޑަރު ޔެއާ ލަޕީދް ހެކިބަސް ދެއްވައިފި އެވެ.
މަކަަރާއި ހީލަތް ހެދުމާއި އިތުބާރު ގެއްލޭ ފަދަ އަމަލެއް ކުރުމުގެ ތުހުމަތު ނަތަންޔާހޫއަށް ކުރެވެނީ ހޮލީވުޑްގެ ޕްރޮޑިއުސަރު އާނޮން މިލްޗަން އާއި އެހެން މަހުޖަނުންނާ އެކު އޮންނަ ގުޅުމުގެ ސަބަބުންނެވެ.
ޕްރޮސެކިއުޓަރުން ބުނާ ގޮތުގައު 2007 އިން 2016 އަށް ނަތަންޔާހޫއަށް ވަނީ 195،000 ޑޮލަރުގެ ހަދިޔާގެ ގޮތުގައި ފޮށިފޮށީގައި ސުއްޓާ އާއި ޗެމްޕެއިން ފުޅިތަކާއި ގަހަނާ ލިބިފަ އެވެ.
އެއީ އެކި ފަރާތްތަކަށް ކަންކަން ކޮށްދޭ މަތިން ދިން ހަދިޔާ ކަމަށް ތުހުމަތު ކުރެވެ އެވެ. ނަތަންޔާހޫ އެ ތުހުމަތުތައް ދޮގުކުރައްވަ އެވެ.
ހަދިޔާ ލިބުނީ އެކުވެރިންގެ ފަރާތުން ކަމަށާއި އެއީ އޭނާ އެދިގެން ދިން ހަދިޔާތަކެއް ނޫން ކަމަށް ވެސް ނަތަންޔާހޫ ވިދާޅުވެ އެވެ.
އިޒްރޭލުގައި އެންމެ ދިގު މުއްދަތެއް ވަންދެން ބޮޑު ވަޒީރުކަން ކުރަމުންދާ ނަތަންޔާހޫ މަސައްކަތް ކުރެއްވީ މިލްޗަންއަށް އެތައް މިލިއަން ޑޮލަރުގެ ފައިދާވާ ގޮތަށް ޓެކްސް މަޝްރޫއެއް ކުރިއަރުވަން ކަމަށް ބެލެވެ އެވެ.
ފިނޭންސް މިނިސްޓްރީން ފަހުން ވަނީ އެ މަޝްރޫއު ކުރިއަށް ނުގެންދެވޭނެ ކަމަށް ނިންމައިފަ އެވެ. އެކަމާ ގުޅޭ ބަހުސްތައް ކުރި އިރު، ފިނޭންސް މިނިސްޓަރަކީ މިހާރުގެ އިދިކޮޅު ލީޑަރު ލަޕީދް އެވެ.
މި ނޫނަސް ގިނަ ކޮރަޕްޝަން މައްސަލަތަކެއް ނަތަންޔާހޫއާ ދެކޮޅަށް އެބަ ހުއްޓެވެ. މިއީ އިޒްރޭލުގެ ބޮޑު ވަޒީރެއްގެ މަގާމުގައި ހުންނަވަނިކޮށް ޝަރީއަަތެއް ކުރެވޭ ފުރަތަމަ ފަހަރެވެ.
