ބެއިޖިން، ޗައިނާ (ޖޫން 9) - ފަލަސްތީނުގެ ރައީސް މަހްމޫދް އައްބާސް މި ހަފުތާގައި ޗައިނާއަށް ވަޑައިގަންނަވާނެ ކަމަށް ޗައިނާގެ ސަރުކާރުން އިއުލާންކޮށްފި އެވެ.
މެދުއިރުމަތީގެ ކަންކަމުގައި މެދުވެރިއެއްގެ ދައުރު އަދާކުރަން ޗައިނާއިން މަސައްކަތް ކުރާ އިރު، އިޒްރޭލާއި ފަލަސްތީނުގެ ސުލްހައިގެ މަޝްވަރާގައި ވެސް އިސް ދައުރެއް އަދާކުރަން ބޭނުންވާކަން އެ ގައުމުން ވަނީ ހާމަކޮށްފަ އެވެ.
"ރައީސް ޝީ ޖިންޕިންގެ ދައުވަތަކަށް، ފަލަސްތީން ދައުލަތުގެ ރައީސް މަހްމޫދް އައްބާސް ޖޫން 13 އިން 16 އަށް ޗަައިނާއަށް ދަތުރު ކުރައްވާނެ،" ޗައިނާ ފޮރިން މިނިސްޓްރީގެ ތަރުޖަމާނު ހުއާ ޗުންޔިންގް ހުކުރު ދުވަހު ވިދާޅުވި އެވެ.
ޗައިނާއިން ބުނީ މަހްމޫދް އައްބާސްއަކީ މި އަހަރު ޗައިނާއަށް ވަޑައިގަންނަވާ ފުރަތަމަ އަރަބި ލީޑަރު ކަމަށާއި އެކަމުން ރަމްޒުކޮށްދެނީ ޗައިނާ އާއި ފަލަސްތީނުގެ ގުޅުމުގެ މުހިއްމުކަން ކަމަށެވެ.
މަހްމޫދް އައްބާސްއަކީ ޗައިނާ ރައްޔިތުންގެ ޒަމާންވީ ގާތް އެކުވެރިއެއްގެ ގޮތުގައި އެ ގައުމުގެ ފޮރިން މިނިސްޓްރީން ސިފަކުރި އެވެ.
"ފަލަސްތީން ރައްޔިތުންނަށް ގާނޫނީ ގޮތުން ލިބިދޭން ޖެހޭ ގައުމީ ހައްގުތައް އަނބުރާ ހޯދުމަށް ފަލަސްތީން ރައްޔިތުން ކުރާ މަސައްކަތަށް ޗައިނާއިން އަބަދުވެސް ފުރިހަމައަށް އެއްބާރުލުން ދީފައި ވާނެ."
މިދިޔަ އަހަރުގެ ޑިސެމްބަރު މަހު ޝީ ޖިންޕިން ސައުދީ އަރަބިއްޔާއަށް ކުރެއްވި ދަތުރުގެ ތެރެއިން ވެސް މަހްމޫދް އައްބާސްއާ ބައްދަލުކޮށް، ފަލަސްތީން ރައްޔިތުންގެ ހައްގުގައި މަސައްކަތް ކުރައްވާނެ ކަމަށް ވައުދުވެވަޑައިގެންނެވި އެވެ.
