ރާމަﷲ، ފަލަސްތީން (ޖޫން 7) - އިޒްރޭލުން ވެރިވެގަނެގެން އުޅޭ ހުޅަނގު އައްސޭރީގައި ސިޔާސީ ބާރު ހިންގާ ފަތަހް ޕާޓީއިން ވައުދުތައް ނުފުއްދާތީ މަގްބޫލުކަން ދަށްވަމުންދާ ކަމަށް އެ ޕާޓީގެ ވެރިޔަކު ވިދާޅުވެއްޖެ އެވެ.
ފަލަސްތީންގެ ރައީސް މަހްމޫދު އައްބާސްގެ ފަތަހް ޕާޓީގެ ޑެޕިއުޓީ ޗެއާމަން މަހްމޫދް އަލް އަލޫލް ވިދާޅުވީ ރައްޔިތުންގެ މެދުގައި ޕާޓީގެ މަގްބޫލުކަން ދަށްވަމުންދާ ކަމަށާއި އޭގެ އެންމެ ބޮޑު ސަބަބަކީ ވައުދުތައް ނުފުއްދުން ކަމަށެވެ.
"ފަތަހް ގްރޫޕުން ނިންމީ ސުލްހަވެރި ގޮތްތަކުން ކުރިއަށް ދާން. އެގޮތުގެ މަތިން ކަންކަން ހާސިލްކުރަން ރައްޔިތުންނަށް ވައުދުވި. އެ ވައުދުތައް ނުފުއްދުނު،" އޭނާ ވިދާޅުވި އެވެ.
އުމުރުން 72 އަހަރުގެ އަލް އަލޫލްއަކީ މިހާރު ރައީސްކަމުގައި ހުންނެވި އުމުރުން 87 އަހަރުގެ މަހްމޫދް އައްބާސްއަށް ފަހު އެ މަގާމަށް ވަޑައިގަންނަވާނެ ބޭފުޅެއްގެ ގޮތުގައި އޮތީ ބެލެވިފަ އެވެ.
އެކަމަކު އަލޫލް ވިދާޅުވީ އެ މަގާމަށް އަންނަން ބޭނުން ނުވާ ކަމަށާއި ޕާޓީއިން ބަލަން ވާނީ ޒުވާން ޖީލުގެ ތެރެއިން ލީޑަރުންތަކެއް ނެރެން ކަމަށެވެ.
ފަތަހް ގްރޫޕްގެ ހަރަކާތުގެ ތެރެއިން އަލޫލް ކުރިއެރީ ލުބްނާންގައި 1970 ގެ އަހަރުތަކުގަ އެވެ. އޭނާ އެނބުރި ހުޅަނގު އައްސޭރިއަށް ވަޑައިގެންނެވީ 1995 ގަ އެވެ.
އިޒްރޭލާއި ފަލަސްތީނާ މެދު އޮސްލޯ ސުލްހައިގެ އެއްބަސްވުމުގައި ސޮއިކުރީ 1993 ގަ އެވެ. އޭގެ ފަހުން ހުޅަނގު އައްސޭރީގައި ސިޔާސީ ގޮތުން ބާރު ހިންގަނީ ފަތަހް ގްރޫޕުންނެވެ.
ހުޅަނގު އައްސޭރިއާ ވަކިން އޮންނަ ގާޒާގައި ބާރު ހިންގަނީ ފަތަހް ގްރޫޕާ ވާދަވެރި ހަމާސްއިންނެވެ. އެނެލިސްޓުން ބުނާ ގޮތުގައި މިހާރު ފަތަހް ގްރޫޕަށް ވުރެ ހަމާސްގެ މަގްބޫލްކަން ބޮޑެވެ.
ހިޔާލު ހޯދުމުގެ ވޯޓުތަކުން ދައްކާ ގޮތުގައި ފަތަހް ގްރޫޕަށް ވޯޓު ދޭނީ އެންމެ 33 ޕަސެންޓު މީހުންނެވެ. އެއާ ހިލާފަށް ކުރީގެ ރައީސް ޔާސިރް އަރަފާތު ހުންނެވި އިރު، 89 ޕަސެންޓު މީހުންގެ ވޯޓު ލިބުނެވެ.
