ރާމަﷲ، ފަލަސްތީން (ޖޫން 5) - އިޒްރޭލުން ވެރިވެގަނެގެން އުޅޭ ހުޅަނގު އައްސޭރީގައި މިދިޔަ ހަފުތާގައި އިޒްރޭލުގެ ސިފައިން ބަޑިޖެހި އުމުރުން ތިން އަހަރުގެ ފަލަސްތީން ފިރިހެން ކުއްޖާ މަރުވެއްޖެ އެވެ.
އެ ކުއްޖާއަށް ފަރުވާދެމުން ދިޔައީ އިޒްރޭލްގެ ޝެބާ ހޮސްޕިޓަލުގަ އެވެ. ބުރާސްފަތި ދުވަހު ބަޑި ޖެހުމުން ފަރުވާދެމުން ދިޔަ ނަމަވެސް، ކުއްޖާ މަރުވެފައިވާ ކަމަށް ހޮސްޕިޓަލުން ބުނީ ހޯމަ ދުވަހު އެވެ.
ފަލަސްތީނުގެ ހެލްތު މިނިސްޓްރީން ނެރުނު ބަޔާނެއްގައި ބުނީ ނަބީ ސާލެހް އަވަށަށް ނިސްބަތްވާ އުމުރުން ތިން އަހަރުގެ މުހައްމަދު ހައިތަމް އަލް ތަމީމީ މަރުވި ކަމަށް އަންގާފައިވާ ކަމަށެވެ.
އިޒްރޭލް ސިފައިން ބަޑި ޖެހުމުން، އެ ކުއްޖާގެ ބައްޕަ، އުމުރުން 40 އަހަރިގެ ހައިތަމްއަށް ވެސް އަނިޔާވި އެވެ. އެ މީހުންގެ ގަޔަށް ބަޑި ޖެހީ ކާރުގައި ދަނިކޮށެވެ.
މި އަހަރުގެ މިހާތަނަށް އިޒްރޭލުން ހަމަލާދީ ފަލަސްތީނުގެ 156 މީހުން މަރާލާފައިވެ އެވެ. ރައްދުގައި ފަލަސްތީނުން ދޭ ހަމަލާތަކުގައި މަރުވީ އިޒްރޭލްގެ 21 މީހުންނާއި، ޔޫކްރެއިން މީހަކާއި އިޓަލީ މީހެކެވެ.
