ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރުން ބަހުސްކުރައްވަމުން ގެންދަވަނިކޮށް މެމްބަރަކު އަޑުގަދަކޮށް ލަވަ ޖައްސަވަން ފެއްޓެވުމުން ޝަކުވާ ބޮޑުވެއްޖެ އެވެ.
ތަޅުމުގައި އަޑުގަދަކޮށް ޖެހި ލަވަޔަކީ ރައީސް އިބްރާހީމް މުހައްމަދު ސޯލިހަށް މަލާމާތް ރައްދުވާ ގޮތަށް ހަދާފައިވާ ލަވައެކެވެ. ޓީވީ ޗެނަލަކުން އެ ލަވަ ދައްކާތީ، އެ ލަވަ ނުދައްކަން ބްރޯޑްކާސްޓިން ކޮމިޝަނުން އެ ޗެނަލަށް އެންގުމުން އެކަން ކުށްވެރިކޮށް އިދިކޮޅުން މަޖިލީހަށް ކުއްލި މައްސަލައެއް ވެސް ހުށަހެޅި އެވެ.
މަޖިލީހުގައި އެ ލަވަ ޖެއްސެވީ ނައިފަރު ދާއިރާގެ މެމްބަރު އަހުމަދު ޝިޔާމް ކަމަށް ބައެއް މެމްބަރުން ތުހުމަތު ކުރެއްވި އިރު، އޭނާ އަކީ ލަވަ ނުދައްކަން އެންގި އެންގުން ކުށްވެރިކޮށް ކުއްލި މައްސަަލަ ހުށަހެޅުއްވި މެމްބަރު ވެސް މެ އެވެ.
ލަވަ ޖަހާތީ ރިޔާސަތަށް އެކަން ފުރަތަމަ ފާހަގަކޮށްދެއްވީ އައްޑޫ މީދޫ ދާއިރާގެ އެމްޑީޕީ މެމްބަރު ރޮޒައިނާ އާދަމެވެ. އޭނާ ރިޔާސަތާ ސުވާލުކުރެއްވީ މަޖިލީހުގެ ތަޅުމުގައި "މިހާރު ލަވަ ވެސް ޖެހޭތޯ" އެވެ.
"އިއްޒަތްތެރި މެމްބަރުންނަށް ދަންނަވައިލަން، މިތާނގައި ލަވަޖެހުން އެެއީ ހުއްދަކަމެއް ނޫން،" ރޮޒައިނާ އަށް ޖަވާބު ދެއްވަމުން ރިޔާސަތުން، ވިލުފުށި ދާއިރާގެ މެމްބަރު ހަަސަން އަފީފު ވިދާޅުވި އެވެ.
އޭގެ ފަހުން ދިއްގަރު ދާއިރާގެ މެމްބަރު އިކްރާމް ހަސަން ވާހަކަ ދައްކަވަނިކޮށް އަނެއްކާ ވެސް ލަވަޖަހަން ފެށުމުން ރިޔާސަތުން އަފީފު އިރުޝާދު ދެއްވީ މަޖިލީހުގެ ސެކިއުރިޓީ ބަލަހައްޓަވާ ބޭފުޅުން އެކަން ބެެއްލެވުމަށެވެ.
މަޖިލީހުގެ ތަޅުމަށް ސްޕީކަރެއް ވައްދަވައިގެން ލަވަ ޖައްސަވަނީ ނައިފަރު ދާއިރާގެ މެމްބަރު ޝިޔާމް ކަމަށް އިކްރާމް ތުހުމަކުރެއްވި އެވެ. އެހެން ނަމަވެސް އިހަވަންދޫ ދާއިރާގެ މެމްބަރު މުހައްމަދު ޝިފާއު ތުހުމަތުކުރެއްވި ގޮތުގައި ސްޕީކަރު ތަޅުމަށް ވެއްދެވީ ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފެވެ.
"އިއްޒަތްތެރި ރައީސް އަޅުގަނޑު ފާހަގަކޮށްލަން ބޭނުންވާ ނިޒާމީ ނުކުތާއަކީ [ފަރެސްމާތޮޑާ ދާއިރާގެ މެމްބަރު] ހުސެން ލަވަޖަހާ ސްޕީކަރު ފްލޯއަށް ވައްދައިގެން ހަމަ ކޮންމެ މެމްބަރަކު ވެސް ވާހަކަދައްކަން ފަށާއިރަށް އުނދަގޫ ކުރަނީ. ގަވާއިދު ތަނެއް ނުދޭ. އެހެންވީމާ ފުރަތަމަ ކަމަކަށް އެ ސްޕީކަރު ފްލޯއިން ބޭރުކޮށްލަދޭން އެދޭ ވާހަކަ އަަޅުގަނޑު ވަރަށް އަދަބުވެރިކަމާ އެކު ދަންނަވަން،" ޝިފާއު ވިދާޅުވި އެވެ.
ރައްޔިތުންގެ މަޖިލީހުގައި ކޮންމެ ދުވަހަކުހެން، ރައީސާއި ނައިބު ރައީސް ވަޑައިގެން ނޫޅޫއްވާތީ އެންމެ ދުވަސްވީ މެމްބަރުގެ ހައިސިއްޔަތުން ރިޔާސަތު ބަލަހައްޓަން ވިލުފުށި ދާއިރާގެ މެމްބަރު އަފީފަށް ޖެހިވަޑައިގަންނަވަ އެވެ. އޭނާ ރިޔާސަތު ބަލަހައްޓަވާ ވަގުތުގައި މަޖިލީހުގެ ނިޒާމު ވަރަށް ބޮޑަށް ގެއްލެ އެވެ.
