އިޒްރޭލުން ވެރިކޮށްގެން އުޅޭ ސިޓީތަކާއި އަވަށްތަކުގައި ފަލަސްތީނުގެ މީހުން ގެތައް ގަނެ ދިރިއުޅެން ފަށާތީ، ޔަހޫދީން އެ ސިޓީތަކާއި އަވަށްތައް ދޫކޮށް ދާން ފަށާފައިވާ ކަމަށް އިޒްރޭލުގެ ޖަސްޓިސް މިނިސްޓަރު ޔަރިވް ލެވިން ވިދާޅުވެއްޖެ އެވެ.
އާދީއްތަ ދުވަހު އޮތް ބައްދަލުވުމެއްގައި ލެވިން ވިދާޅުވީ "އަރަބިންނާ އެކު ދިރިއުޅެން އިޒްރޭލުގެ ޔަހޫދީން ބޭނުން ނުވާ ސަބަބު ރަނގަޅަށް ވިސްނޭ" ފަނޑިޔާރުން ސުޕްރީމް ކޯޓަށް ގެންނަން ޖެހޭ ކަމަށެވެ.
"ޔަހޫދީންގެ ކޮމިއުނިޓީތަކުން އަރަބިން އެޕާޓްމަންޓު ގަތީމާ ޔަހޫދީން އެ ސިޓީތައް ދޫކޮށް އެބަދޭ. އަރަބިންނާ އެކު ދިރިއުޅެން ޔަހޫދީން ތައްޔާރެއް ނޫން. ސުޕްރީމް ކޯޓުގައި ތިބީ މިކަން ރަނގަޅަށް ވިސްނޭ ފަނޑިޔާރުންކަން އެބަ ޔަގީންކުރަން ޖެހޭ،" ލެވިން ވިދާޅުވި އެވެ.
އިޒްރޭލުގެ ޖުޑީޝަރީއަށް ބަދަލުގެންނަން ރޭވި އެއް މޭސްތިރިއަކީ ލެވިން އެވެ. އެއީ ޖުޑީޝަރީގެ ބާރު ކުޑަވެ، ސަރުކާރުގެ ނުފޫޒު ވަރުގަދަ ވާނެ ނިންމުންތަކެއް ކަމަށް ބުނެ އިޒްރޭލުގެ ރައްޔިތުން އަޑުއުފުލަމުން ދާތާ މަސްތަކެއް ވެއްޖެ އެވެ.
ރައްޔިތުންގެ ޕްރެޝަރު ބޮޑުވެ ބޮޑު ވަޒީރު ބެންޖަމިން ނަތަންޔާހޫ އެންމެ ފަހުން ނިންމެވީ އެ ރޭވުން ތަންފީޒު ކުރުން މަޑުޖައްސާލުމަށެވެ. އިޒްރޭލް ރައްޔިތުންގެ އިތުރުން ބައިނަލްއަގްވާމީ ފަރާތްތަކުން ވެސް ވަނީ ޖުޑީޝަރީގެ ބާރު ކުޑަކުރުމާ މެދު ކަންބޮޑުވުން ފާޅުކޮށްފަ އެވެ.
އިޒްރޭލްގެ ސުޕްރީމް ކޯޓުން 2000 ވަނަ ކުރި ހުކުމެއްގައި ބުނީ އިޒްރޭލުގެ ރައްޔިތުންގެ ގޮތުގައި އުޅޭ ފަލަސްތީން މީހުން ނުވަތަ އަރަބިން، އެ މީހުން ބޭނުން ސަރަހައްދަކުން ގެދޮރު ގަންނަން އެއްވެސް ހުރަހެއް އަޅައިގެން ނުވާނެ ކަމަށެވެ.
