ކުރީގެ ރައީސް މައުމޫން އަބްދުލްގައްޔޫމްގެ މޯލްޑިވްސް ރިފޯމް މޫވްމަންޓު (އެމްއާރުއެމް) އުވާލުމަށް ނިންމި ނިންމުމަށް އަމަލުކުރުން މަޑުޖައްސާލުމަށް އިއްޔެ ނެރުނު އަމުރު އިސްތިއުނާފު ކުރަން އިލެކްޝަންސް ކޮމިޝަނުން ނިންމައިފި އެވެ.
އެ ކޮމިޝަނުން މައްސަލާގައި ކޯޓަށް ދާން ނިންމިކަން ބުނީ މިއަދު ކުރި ޓުވީޓެއްގަ އެވެ. ގާނޫނުން ސިޔާސީ ޕާޓީތަކުގައި ތިބެންޖެހޭ ކަމަށް ބުނާ މެމްބަރުންގެ އަދަދު ހަމަނުވާތީ އެމްއާރުއެމް އުވާލީ މި ހިނގާ މެއި 24، ގަ އެވެ.
އެމްއާރުއެމް އުވާލި މައްސަލާގައި މައުމޫނާއި އެމަނިކުފާނުގެ ދަރިކަލުން އަދި ޕާޓީގެ ރައީސް އަހްމަދު ފާރިސް މައުމޫން ވަނީ މިއީ އީސީގެ ނިންމުމަކީ ގާނޫނާ ހިލާފު ނިންމުމެއް ކަމަށް ބުނެ ފާޑުވިދާޅުވެފަ އެވެ. އެމްއާރުއެމުން ބުނާ ގޮތުގައި އީސީއިން 3،000 މެމްބަރުން ހަމަކުރުމަށް ދިން މުއްދަތުގައި އެ އަދަދަށް އެ ޕާޓީން ވަނީ ފޯމު ހުށަހަޅައިފަ އެވެ.
ކޯޓުން އިއްޔެ އަމުރުކުރީ އެމްއާރުއެމް އުވާލާ އެ ޕާޓީން ސިޔާސީ އެއްވެސް ހަރަކާތެއް ނުހިންގޭނެ ކަމަށް އީސީއިން އަންގާފައިވީ ނަމަވެސް، ޕާޓީއާ ދެކޮޅަށް އެއްވެސް ފިޔަވަޅެއް މިވަގުތަށް ނޭޅުމަށެވެ. އެ އަމުރުގެ މުއްދަތަކަށް ޖަހާފައިވަނީ 30 ދުވަހެވެ.
އެއީ އެމްއާރުއެމް އިން އީސީގެ ނިންމުން ބާތިލުކުރުމަށް އެދި ކުރިއަށް އޮތް 30 ދުވަހުގެ ތެރޭގައި ސިވިލް ކޯޓަށް މައްސަލައެއް ހުށަހެޅުމަށް މަސައްކަތް ކުރަމުންދާތީ ކަމަށް ކޯޓުން ވަނީ ބުނެފަ އެވެ.
އެމްއާރުއެމް އަކީ މި ސަރުކާރު ހިންގާ ކޯލިޝަނުގައި ވެސް ހިމެނޭ ޕާޓީއެކެވެ. އެ ޕާޓީން މި އަހަރުގެ ރިޔާސީ އިންތިހާބާމެދު އަދި ގޮތެއް ނިންމާފައި ނުވާއިރު ޕާޓީގެ ރައީސް، ފާރިސް ރިޔާސީ އިންތިހާބުގައި ވާދަކުރައްވާނެކަމުގެ އަޑުތައް ދަނީ ގަދަވަމުންނެވެ.
