ކުރީގެ ރައީސް މައުމޫން އަބްދުލް ގައްޔޫމްގެ ސިޔާސީ ޕާޓީ، އެމްއާރުއެމްގެ ނަމުގައި އެއްވެސް ހަރަކާތެއް ނުހިންގުމަށް އެ ޕާޓީން މެންބަރުންނަށް އަންގައިފި އެވެ.
މިއަދު ނެރުނު ނޫސްބަޔާނެއްގައި ބުނެފައި ވަނީ އެޕާޓީގެ ނަމުގައި ހިންގާ ހުރިހާ ހަރަކާތްތަކެއް ހުއްޓާލުމަށް އިލެކްޝަން ކޮމިޝަނުން އިއްޔެ ސިޓީ ފޮނުވާފައިވާ ކަމަށާއި، އެހެން ކަމުން ޕާޓީގެ އެއްވެސް ކޮމެޓީއަކުން، ގޮތްޕަކުން، ނުވަތަ ގުނަވަނަކުން އެއްވެސް ހަރަކާތެއް ނުހިންގުމަށް އެދޭކަމަށެވެ.
އިލެކްޝަން ކޮމިޝަނުން އެމްއާރުއެމް އުވާލުމަށް ނިންމާފައި ވަނީ ގަވައިދާ ހިލާފަށް ކަމަށް ވެސް އެ ބަޔާނުގައި ބުނެފައި ވެއެވެ.
"މިކަން ސާބިތުކުރުމަށް ކުރަން ޖެހޭ ހުރިހާ މަސައްކަތެއް ކުރާނެ ކަމަށް ވެސް ލޮބުވެތި ހުރިހާ މެންބަރުންގެ މައުލޫމާތަށްޓަކާ ދަންނަވަމެވެ." ބަޔާނުގައި ވެއެވެ.
ސިޔާސީ ޕާޓީތަކުގެ ގާނޫނުގައި ބަޔާންކޮށްފައިވާ ގޮތުގައި ޕާޓީއެއްގެ ގޮތުގައި ބަލައިގަންނާނީ 3,000 މެމްބަރުން ހަމަވާ ޕާޓީތަކެވެ. އަދި ދަައުލަތުން ފައިސާ ދޫކުރާނީ 10,000 މެމްބަރުން ހަމަވާ ޕާޓީތަކަށެވެ.
ތިން ހާސް މެމްބަރުން ދަފުތަރުގައި ނުހިފެހެއްޓޭތީވެ އިންޒާރު ދިނުމަށް ފަހު އެ ޕާޓީ އުވާލީ އިއްޔެ އެވެ. އެންމެ ފަހުން އިލެކްޝަންސް ކޮމިޝަނުން އާންމު ކުރި ތަފާސް ހިސާބުތަކުން ދައްކާ ގޮތުގައި އެ ޕާޓީގައި އޭރު ތިބީ އެންމެ 2,900 މެންބަރުންނެވެ.
