ކުރީގެ ރައީސް މައުމޫނު އަބްދުލްގައްޔޫމު އިސްކޮށް ހުންނަވައިގެން އުފެއްދެވި މޯލްޑިވްސް ރިފޯމް މޫމެންޓް (އެމްއާރްމްއެެމް) ގައި ގާނޫނީ ގޮތުން ހަމަވާންޖެހޭ މެމްބަރުންގެ އަދަދު ހަމަނުވާތީ އެ ޕާޓީ އުވައިލަން އިލެކްޝަންސް ކޮމިޝަނުން ނިންމި ނިންމުން މުރާޖައާކޮށްދޭން އެދޭ ކަަމަށް އެޕާޓީގެ ލީޑަޝިޕުން މިއަދު ބުނެފި އެވެ.
އެމްއާރްއެމް އުވާލުމުން އެ ޕާޓީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ރައީސް ފާރިސް މައުމޫނު ވިދާޅުވީ ސިޔާސީ ޕާޓީއެއްގައި ގާނޫނީ ގޮތުން ހަމަވާން ޖެހޭ އަދަދަށް ވުރެ މާ އިތުރަށް ވެސް އެމްއާރްއެމުން އީސީއަށް މެމްބަޝިޕް ފޯމް ހުށަހަޅާފައި ވާނެ ކަމަށެވެ. އެހެން ނަމަވެސް "ގޮތް ނޭނގޭ ގޮތް ތަކަކުން" އެ މެމްބަރުން ޕާޓީން ވަކިކޮށްފައިވާ ކަމަށް އޭނާ ތުހުމަތު ކުރެއްވި އެވެ.
"އަޅުގަނޑުމެން މި ދަންނަވާ ގޮތް މިއީ ހަގީގަތްކަން އިރާދަކުރެއްވިއްޔާ ރައްޔިތުންނަށް ވެސް. [ޕާޓީގެ] މެމްބަރުންނަށް ވެސް ސާބިތުކޮށްދޭނަން،" ފާރިޝް ވިދާޅުވި އެވެ.
އެމްއާރްއެމްގެ އުވައިލަން އީސީން ނިންމި އިރު ކަންހިނގާފައިވާ ގޮތ އެކޮމިޝަނުގެ ރައީސް ފުއާދު ތައުފީފު ބައްލަވައިދެއްވަން އެދިވަޑައިގަންނަވާ ކަމަށް ވެސް ފާރިޝް ވިދާޅުވި އެވެ. އެގޮތަށް އެދިވަޑައިގަންނަވަނީ އޭނާ ވިދާޅުވި ގޮތުގައި އީސީގެ ނިންމުމުގައި ގަބޫލުނުކުރެވޭ ކަންތައްތަކެއް ހުރީމަ އެވެ.
"އެހެންވީމާ [އިލެކްޝަސް ކޮމިޝަންގެ] ރައީސަށް އަޅުގަނޑުމެން ދަންނަވައިލަން، މިކަން ހިނގައި ދިޔަ ގޮތް ބައްލަވައިލަދެއްވައި މި ނިންމެވުން މުރާޖައާކޮށްދެއްވަން،" ފާރިޝް ވިދާޅުވި އެވެ.
އޭނާ ވިދާޅުވީ އެމްއާރްއެމް އުވައިލަން ނިންމި މައްސަލަ ކޯޓަށް ވައްދައި ވަގުތީ އަމުރަކަށް އެދުމަކީ ވެސް އޮތް ފުރުސަތެއް ކަމަށާއި އެހެން ނަމަވެސް މިހާރު އެދެނީ އީސީން އެކަން އަލުން ބަލައިދޭން ކަމަށެވެ.
އެ ބައްދަލުވުމުގައި އިތުރަށް ވާހަކަ ދައްކަވަމުން ފާރިސް ވިދާޅުވީ އާންމު ރައްޔިތުން ސިޔާސީ ޕާޓީތަކަށް ސޮއި ކުރަން ބޭނުންނުވާ ކަމަށެވެ.
"މިއަދުގެ ހަގީގަތަކީ ރައްޔިތުންގެ ތެރެއިން ގިނަ ބަޔަކު ބޭނުމެއް ނުވޭ ސިޔާސީ ޕާޓީތަކަށް ސޮއި ކުރާކަށް. ޕާޓީގެ މެމްބަރުކަމެއް ވެސް ބޭނުމެއް ނުވޭ ހަގީގަތުގައި،" ފާރިސް ވިދާޅުވި އެވެ.
