މޮސްކޯ، ރަޝިއާ (މޭ 19) - ޔޫކްރެއިން ހަނގުރާމައާ ގުޅިގެން އަޅާފައިވާ ދަތިކުރުމުގެ ފިޔަވަޅުތަކަށް ރައްދު ދިނުމުގެ ގޮތުން އެމެރިކާގެ ކުރީގެ ރައީސް ބަރަކް އޮބާމާ ހިމެނޭ ގޮތަށް 500 މީހުން ރަޝިއާއަށް އެތެރެވުން މަނާކޮށްފި އެވެ.
ރަޝިއާގެ ފޮރިން މިނިސްޓްރީން ބުނީ އެގޮތަށް ނިންމީ އެމެރިކާގެ ރައީސް ޖޯ ބައިޑެންގެ ސަރުކާރުން އަޅަމުންދާ ފިޔަވަޅުތަކަށް ރައްދު ދިނުމުގެ ގޮތުން ކަމަށެވެ. ހުކުރު ދުވަހު ވެސް އެމެރިކާއިން ވަނީ ފިޔަވަޅުތައް ވަރުގަދަކޮށްފަ އެވެ.
އެގޮތުން ރަޝިއާގެ އެތައް ސަތޭކަ ކުންފުންޏަކާއި ފަރުދުން ބްލެކްލިސްޓު ކުރި އެވެ. ރަޝިއާގެ ފޮރިން މިނިސްޓްރީން ބުނީ އެ ގައުމާ ދެކޮޅަށް އަޅާ ކޮންމެ ފިޔަވަޅަކަށް ރައްދުގައި ފިޔަވަޅެއް އަޅާނެކަން އެމެރިކާއަށް މިހާރު ސާފުވާނެ ކަމަށެވެ.
ރަޝިއާއަށް އެތެރެވުން މަނާކުރި މީހުންގެ ތެރޭގައި އޮބާމާގެ އިތުރުން ޓީވީ ޕްރޮގްރާމް ހުށަހަޅައިދޭ ސްޓިފަން ކޮލްބާޓް، ޖިމީ ކިމެލް އަދި ސެތު މެޔާޒް ވެސް ހިމެނެ އެވެ. އަދި ސީއެންއެންގައި ހަބަރު ކިޔާ އެރިން ބާނަޓް އާއި އެމްއެސްއެންބީސީގެ ޕްރެޒެންޓަރުން ރޭޗެލް މެޑޯ އަދި ޖޯ ސްކާބޮރޯ ވެސް ހިމެނެ އެވެ.
ރަޝިއާއިން ބުނީ ކޮންގްރެސް މެމްބަރުންނާއި އެކި ތިންކްޓޭންކުތަކުގެ މެމްބަރުން ވެސް ބްލެކްލިސްޓުކޮށްފައި ވާނެ އެވެ. އެއީ ރަޝިއާއާ ދެކޮޅު ވިސްނުން ފަތުރާ މީހުން ކަމަށް ތުހުމަތު ކުރި އެވެ. އޭގެ އިތުރުން ޔޫކްރެއިނަށް ހަތިޔާރު ފޯރުކޮށްދޭކަމުގެ ތުހުމަތަށް ބައެއް ކުންފުނިތަކުގެ ވެރިން ބްލެކްލިސްޓި ކުރި އެވެ.
