ޕަޕަރާޒީންނާ ހެދި އިނގިރޭސި އަމީރު ހެރީ އާއި އަނބިކަނބަލުން މޭގަން އަދި މޭގަންގެ މަންމަ ދަތުރު ކުރަމުން ދިޔަ ކާރެއް "ނުރައްކާތެރި" އެކްސިޑެންޓެއް ނުވީ ކިރިޔާ ކަމަށް ބުނެފި އެވެ.
ހެރީ އާއި މޭގަންގެ ތަރުޖަމާނަކު ބުނީ އެ މީހުންގެ ކާރު ފަހައި ޕަޕަރާޒީން ދުއްވީ ނިއު ޔޯކްގައި އަންގާރަ ދުވަހު އޮތް އެވޯޑު ހަަފުލާއެއްގެ ފަހުން ކަމަށެވެ.
ތަރުޖަމާނު ނެރުނު ބަޔާނުގައި ބުނީ ޕަޕަރާޒީންގެ ކާރުތައް ހެރީ އާއި މޭގަންގެ ކާރު ފަހަތުން އެތައް ގަޑިއިރެއް ވަންދެން ދުއްވި ކަމަށެވެ. އޭގެ ސަބަބުން އެކްސިޑެންޓު ނުވީ ކިރިޔާ ކަމަށް ބުންޏެވެ.
"އާއްމު ޝަހުސިއްޔަތަކަށް ވުމުން މީހުންގެ ޝައުގުވެރިކަން ހުރި ނަމަވެސް، އެކަމުގައި އެއްވެސް މީހަކަށް ނުރައްކަލެއް ކުރިމަތިވެދާނެ ފަދަ ގޮތަކަށް އަމަލުކޮށްގެން ނުވާނެ،" ތަރުޖަމާނު ބުންޏެވެ.
ނިއު ޔޯކްގެ ފުލުހުން ނެރުނު ބަޔާނެއްގައި ބުނީ ގިނަ އަދަދެއްގެ ފޮޓޯގްރާފަރުންނާ ހެދި ހެރީ އާއި މޭގަން ދަތުރު ކުރުމަށް ހުރަސް އެޅި، ހާދިސާއެއް ހިނގި ކަމަށެވެ.
އެހެން ނަމަވެސް އެއްވެސް މީހަކަށް އަނިޔާ ނުވާ ކަމަށާއި އެއްވެސް މީހަކު ހައްޔަރު ނުކުރާ ކަމަށް ރިޕޯޓުތައް ބުނެ އެވެ. އިނގިރޭސި ޝާހީ ގަނޑުވަރުން މިހާތަނަށް އެކަމާ ގުޅިގެން އެއްޗެއް ނުބުނެ އެވެ.
އަންގާރަ ދުވަހު އޮތް މިސް ފައުންޑޭޝަން ވިމެން އޮފް ވިޝަން އެވޯޑްސްއަކީ އިނގިރޭސި ރަސްގެފާނު ތަހުތަށް ވެޑުވުމުގެ ހަފުލާއަށް ފަހު ހެރީ އާއި މޭގަން އެކުގައި އާއްމު ތަނަކުން ފެނުނު ފުރަތަމަ ފަހަރެވެ.
އެ ހަފުލާގައި މޭގަންއަށް އެވޯޑެއް އެރުވި އެވެ. ހެރީ އާއި މޭގަންއާ އެކު މޭގަންގެ މަންމަ ޑޯރިއާ ރެގްލޭންޑް ވެސް އެ ހަފުލާއަށް ދިޔަ އެވެ.
ހެރީގެ މަންމާފުޅު ޑަޔާނާ އަވަހާރަވީ 1997 ވަނަ އަހަރު ޕެރިހުގައި ޕަޕަރާޒީން އެކަމަނާ އިންނެވި ކާރު ފަހަތުން ދުއްވަމުން ދަނިކޮށް ހިނގި އެކްސިޑެންޓެއްގަ އެވެ.
