ވޮޝިންޓަން، އެމެރިކާ (މޭ 16) - އެމެރިކާގެ ކުރީގެ ރައީސް ޑޮނަލްޑް ޓްރަމްޕް 2016 ވަނަ އަހަރު ކުރެއްވި ރިޔާސީ ކެމްޕެއިނާއި ރަޝިއާއާ ގުޅުމެއްވާ ކަމަށް ތުހުމަތުކޮށް އެފްބީއައިއިން ފެށި ތަހުގީގަށް ފާޑުކިޔުން އަމާޒުވެއްޖެ އެވެ.
މިނިވަން ޕްރޮސެކިއުޓަރެއްގެ ދިރާސާއަށް ފަހު ނެރުނު ރިޕޯޓުގައި ބުނީ އެފްބީއައިގެ ތަހުގީގު ފެށީ ހެކި ނެތި ކަމަށާއި ތަހުގީގުގައި ސީރިއަސް މައްސަލަތަކެއް ހުރި ކަމަށެވެ.
ޓްރަމްޕާއި ރަޝިއާއާ ގުޅުވައި އެފްބީއައިން ތަހުގީގު ފެށީ ސިޔާސީ ބޭނުމެއްގައި ކަމަށް ޓްރަމްޕް ވިދާޅުވެ އެވެ. އެހެންވެ، އެކަން ބެލުމަށް ހާއްސަ ވަކީލަކު ޓްރަމްޕްގެ ސަރުކާރުގައި އެޓޯނީ ޖެނެރަލްގެ ފަރާތުން ހަމަޖެއްސީ 2019 ގަ އެވެ.
ވެރިކަން ބަދަލުވެ ރައީސް ޖޯ ބައިޑެންގެ އެޓޯނީ ޖެނެރަލް މެރިކް ގާލަންޑްގެ ބެލުމުގެ ދަށުން ވެސް ވަކީލް ޖޯން ޑާހަމް ވަނީ ތަހުގީގު ހިންގައިފަ އެވެ. ހަތަރު އަހަރުގެ ދިރާސާއަށް ފަހު ނެރުނު 300 ސަފުހާގެ ރިޕޯޓުގައި ވަނީ އެފްބީއައިއަށް ފާޑުކިޔައިފަ އެވެ.
އެފްބީއައިއިން ހިންގި ތަހުގީގު ނުވަތަ އޮޕަރޭޝަންގެ ނަމަކީ "ކްރޮސްފަޔާ ހަރިކޭން" އެވެ. ރިޕޯޓުގައި ބުނީ ތަހުގީގެއް ފަށަން ޖެހޭ ފަދަ އެއްވެސް ހެއްކެއް އެފްބީއައި އަދި ޖާސޫސީ އިދާރާތަކަށް ވެސް ލިބިފައި ނެތް ކަމަށެވެ.
"އެފްބީއައިއަށް ލިބެމުން ދިޔަ މައުލޫމާތު، ވަކިން ހާއްސަކޮށް ސިޔާސީ ފަރާތްތަކުން ފޯރުކޮށްދެމުން ދިޔަ އެކި މައުލޫމާތާ މެދު ފާޑުވެރި ވިސްނުމަކުން އިސް އޮފިޝަލުން ވިސްނާފައި ނުވޭ،" އެ ރިޕޯޓުގައި ބުންޏެވެ.
"ނަތީޖާއެއްގެ ގޮތުން ތަހުގީގީ ޓީމުން އެއްވެސް އަމާޒެއް ނެތި ތޯތޯ ވާހަކަތަކެއްގެ މައްޗަށް ކުރިއަށް ދިޔަ."
އަންނަ އަހަރުގެ ރިޔާސީ އިންތިހާބަށް ކެމްޕެއިން އިއުލާން ކުރައްވާފައިވާ ޓްރަމްޕް ވަނީ ޑާހަމްގެ ރިޕޯޓަށް މަރުހަބާ ދަންނަވައިފަ އެވެ. ޓްރަމްޕް ވިދާޅުވީ އޭރު ވެސް ތަހުގީގު ކުރީ އާއްމުންނަށް އޮޅުވާލައިގެން ކަމަށާއި މިހާރު ވެސް ދައުވާކޮށްގެން އުޅެނީ އޮޅުވާލައިގެން ކަމަށެވެ.
އެކި މައްސަލަތަކާ ގުޅިގެން ޓްރަމްޕްއާ ދެކޮޅަށް ދައުވާ އުފުލާފައިވާ އިރު، އެއީ ސިޔާސީ ބޭނުމުގައި ހިންގާ ކަންކަން ކަމަށް އެމަނިކުފާނު ވިދާޅުވެ އެވެ.
