މޮސްކޯ، ރަޝިއާ (މޭ 15) - ދެކުނު އެފްރިކާގެ ސިފައިންގެ ފައުޖުގެ ކޮމާންޑަރު މި ވަގުތު ހުންނެވީ މޮސްކޯގައި ކަމަށް ރަޝިއާގެ ނޫސްތަކުން ރިޕޯޓުކޮށްފި އެވެ.
ލެފްޓިނެންޓް ޖެނެރަލް ލޯރެން މްބާތާ މޮސްކޯއަށް ވަޑައިގެންފައިވާ އިރު، ދެކުނު އެފްރިކާއިން ރަޝިއާއަށް ހަތިޔާރު ފޯރުކޮށްދޭން އުޅޭ ކަމަށް އެމެރިކާއިން މިދިޔަ ހަފުތާގައި ތުހުމަތު ކުރި އެވެ.
ރަޝިއާގެ ޑިފެންސް މިނިސްޓްރީން ބުނީ ދެ ގައުމުގެ ސިފައިންގެ ކަންކަމާއި ގުޅުން ބަދަހިކުރުމާ ގުޅޭ ގޮތުން މްބާތާއާ އެކު ރަޝިއާގެ ޑިފެންސް މިނިސްޓަރު މަޝްވަރާ ކުރެއްވި ކަމަށެވެ.
މިދިޔަ ބުރާސްފަތި ދުވަހު އެމެރިކާއިން ދެކުނު އެފްރިކާއަށް ކަނޑައަޅާފައި ހުންނަ ސަފީރު ރިޔުބެން ބްރިގެޓީ ވިދާޅުވީ މިދިޔަ ޑިސެމްބަރު މަހު ކޭޕް ޓައުންގެ އަސްކަރީ މަރުކަޒަކަށް ކައިރި ކުރި ރަޝިއާގެ ބޮޑު މަނަވަރަކަށް ހަތިޔާރާއި ވަޒަން އަރުވާފައިވާ ކަމަށެވެ.
އެކަމާ ގުޅޭ ގޮތުން ދެކުނު އެފްރިކާގެ ރައީސް ސިރިލް ރަމަފޯސާ ވިދާޅުވީ މައްސަލަ ބަލަމުންދާ ކަމަށާއި އެ ތުހުމަތާ ގުޅޭ ގޮތުން އެއްޗެއް ބުނެވޭނީ ބަލަން ޖެހޭ ކަންކަން ބެލުމަށް ފަހުގައި ކަމަށެވެ.
ތުހުމަތުތަކާ ގުޅިގެން ތަހުގީގެއް ކުރާނެ ކަމަށް އިއުލާން ކުރުމުން އެމެރިކާއިން މަރުހަބާ ކިޔެވެ.
ޔޫކްރެއިންގައި ކުރަމުންދާ ހަނގުރާމައާ ގުޅިގެން ދެކުނު އެފްރިކާއިން މިހާތަނަށް ރަޝިއާ ކުށްވެރިކޮށްފައެއް ނުވެ އެވެ. ތުރުކީ އަދި ޗައިނާ ފަދައިން ދެކުނު އެފްރިކާ ވެސް ބޭނުންވަނީ ވަކި ފަޅިއަކަށް ނުޖެހުމަށެވެ.
