ޕެރިސް، ފްރާންސް (މޭ 15) - ފްރާންސްގައި ބޮޑެތި އިންވެސްޓްމަންޓްތަކެއް ކުރަން ވިސްނަމުންދާ ކަމަށް އެމެރިކާގެ ބިލިއަނަރު އެލޮން މަސްކް ބުނެފި އެވެ.
ބައިނަލްއަގްވާމީ އިންވެސްޓަރުންގެ ޝައުގުވެރިކަން އުފެއްދުމަށް ބޮޑު ސަމިޓެއް މިހާރު ފްރާންސްގައި ކުރިއަށްދާ އިރު، މަސްކް އެ ސަމިޓުގައި ބައިވެރިވި އެވެ.
އޭގެ އިތުރުން މަސްކް ވަނީ ފްރާންސްގެ ރައީސް އިމޭނުއެލް މެކްރޯން އަދި އިކޮނޮމީ މިނިސްޓަރު ބްރޫނޯ ލެ މެޔާއާ ބައްދަލުކޮށްފަ އެވެ.
"ފްރާންސްގެ ރައީސް މެކްރޯން އާއި ފްރާންސްގެ ސަރުކާރު ވަރަށް ބަރާބަރު. އެކި ސިނާއަތްތަކަށް މަރުހަބާ ކިޔުމަށް ތައްޔާރު ކަމަށް ފެނޭ،" އުމުރުން 51 އަހަރުގެ މަސްކް ބުންޏެވެ.
"ކުރިއަށް އޮތް ތަަނުގައި ޓެސްލާއިން ފްރާންސްގައި ބިޔަ އިންވެސްޓްމަންޓުތަކެއް ކުރާނެ ކަމުގެ ޔަގީންކަން އެބަ އޮތް،" އިލެކްޓްރިކް ކާރު އުފައްދާ ކުންފުންޏާ ގުޅޭ ގޮތުން މަސްކް ބުންޏެވެ.
ޓެސްލާގެ އިތުރުން ޓްވިޓާ އާއި ސްޕޭސް އެކްސް ވެސް ހިންގަނީ މަސްކްގެ ބެލުމުގެ ދަށުންނެވެ.
ފްރާންސްގެ އިސްވެރިން މަސްކްއާ އެކު މަޝްވަރާ ކުރަމުން ދިޔަ ނަމަވެސް، އެކަމާ ގުޅޭ ތަފްސީލް ހާމަކުރާނީ ފަހުން ކަމަށް އިކޮނޮމީ މިނިސްޓަރު މެޔާ ވިދާޅުވި އެވެ.
