ބަންގްލަދޭޝްގެ ވެރިރަށް ޑާކާ ގައި މިހާރު ކުރިއަށްދާ އައިއެޗް ޓްރޮފީގައި ރާއްޖޭގެ ޒުވާން އަންހެން ދެ ޓީމުން ނޭޕާލް ބަލިކޮށް މުބާރާތުން މެޑަލް ހޯދުމުގެ އުއްމީދު ދަމަހައްޓައިފި އެވެ.
އައިއެޗްއެފް ޓްރޮފީގައި ވާދަކުރާ ހަތަރު ގައުމުން ލީގު ބުރެއް ކުޅުމަށްފަހު ފައިނަލުން ފުރުސަތު ލިބެނީ ލީގު ބުރުގެ ގަދަ ދެ ޓީމަށެވެ. މިއަދު ނޭޕާލް އަތުން ރާއްޖެ މޮޅުވުމުން ލީގު ބުރުގެ ތިންވަނަ ޓީމްގެ ގޮތުގައި ރާއްޖެ ވާދަކުރާނީ ބްރޮންޒް މެޑަލް މެޗުގަ އެވެ. މާދަމާ ކުޅޭ މި މެޗުގައިވެސް ދިވެހިރާއްޖެ ނިކުންނާނީ ނޭޕާލްއާ ދެކޮޅަށެވެ.
މިއަދު މެންދުރު ފުރަތަމަ ރާއްޖޭގެ 17 އަހަރުން ދަށުގެ ޔޫތު ޓީމުން ނޭޕާލް ބަލިކުރީ 42-11 އިންނެވެ. މިއީ ބައިނަލްއަގްވާމީ މައިދާނުގައި ރާއްޖޭގެ ޒުވާން އަންހެން ޓީމެއް ކާމިޔާބުކުރި ފުރަތަމަ މެޗެވެ. މެޗުގެ ފުރަތަމަ ހާފު ނިމުނުއިރުވެސް ރާއްޖެ އޮތީ 15 ގޯލުގެ ލީޑަކާއިއެކުގަ އެވެ.
މި މެޗުގައި ނޭޕާލް ކޮޅަށް ރާއްޖެއިން ޖެހި 42 ގޯލުގެ ތެރެއިން 10 ގޯލު ޖަހައިދިނީ ފާތިމަތު އަމާނީ އަހުމަދު ޝިޔާމް އެވެ. ހައްވާ މިލްހާނާ މުހައްމަދު މާހިރު މި މެޗުގައި އަށް ގޯލު ޖެހިއިރު، ފާތިމަތު އަޝާ ރަޝީދު ފަސް ގޯލު ޖެހި އެވެ. އައިޝަތު އީޝަލް އަލީ އާއި އައިޝަތު ޔަފް އާ އަހުމަދު ކޮންމެ ކުޅުންތެރިއަކު ހަތަރު ގޯލު ޖެހިއިރު، މީފާ ބިންތި މަޖީދު ތިން ގޯލު ޖެހި އެވެ. އައިޝަތު ޒިއާނާ ރިޔާޒު، ފާތިމަތު ލީމް ރިޝާދު އަދި އައިޝަތު އައިނީ ހުސެއިން ކޮންމެ ކުޅުންތެރިއަކު ދެ ގޯލު ޖެހި އެވެ. މަރިޔަމް މާހާ ސުހައިލް އާއި ތީބާ އަބްދުﷲވެސް މި މެޗުގައި ގޯލެއް ޖެހި އެވެ.
ރާއްޖޭގެ 19 އަހަރުން ދަށުގެ ޓީމުން ނޭޕާލްގެ ޖޫނިއާ ޓީމް ބަލިކުރީ 25-10 އިންނެވެ. މި މެޗުގައި ރާއްޖެއިން ޖެހި ގޯލުތަކުގެ ތެރެއިން އައިޝަތު އިބާ އަހުމަދު ފަސް ގޯލު ޖެހިއިރު، ފާތިމަތު ޝާޔާ މުހައްމަދު ހަތަރު ގޯލު ޖެހި އެވެ. އައިޝަތު އީޝާ، އީނާ އަހުމަދު އަދި ފާތިމަތު ތުހުފާ ވަނީ ކޮންމެ ކުޅުންތެރިއަކު ތިން ގޯލު ޖަހާފަ އެވެ. ޒުހާ ރަޝީދު އާއި ނޫރާ އަބްދުލް ހަމީދު ކޮންމެ ކުޅުންތެރިއަކު ދެ ގޯލު ޖެހި އެވެ. އައިޝަތު ރަނާ ނަސީރު އާއި މަރިޔަމް ޔާނާ ނާސިހުވެސް މި މެޗުގައި ގޯލެއް ޖެހި އެވެ.
ތިންވަނަ ހޮވާ މެޗުގައި ރާއްޖޭގެ ޒުވާން ދެ ޓީމް ކުޅޭ މެޗު އޮންނާނީ މާދަމާ ހަވީރު އެވެ.
މިދިޔަ މާޗު މަހު ނިމުނު އިންޓަ ސްކޫލް މުބާރާތަށްފަހު ގައުމީ ޖޫނިއާ އަންހެން ދެ ޓީމުން ފަރިތަކުރުންތައް ފެށީ އައިއެޗްއެފް މުބާރާތުގައި ރަނގަޅު ކާމިޔާބެއް ހޯދުމަށެވެ. މި މުބާރާތަށް ފުރުމުގެ ކުރިންވެސް ދެ ޓީމްގެ ކޯޗުންވަނީ ރާއްޖޭގެ ޖޫނިއާ ޓީމްތަކަކީ ސަރަހައްދީ ލެވެލްގައި މެޑަލް ހޯދޭ ފެންވަރު ހުރި ޓީމްތައްކަން ފާހަގަކޮށްފަ އެވެ.
