ބަންގްލަދޭޝްގެ އަންސަރް ހޭންޑްބޯލް ޓީމާ ދެކޮޅަށް ރާއްޖޭގެ ދެ ކުލަބަކާއި ޔޫތު ގައުމީ ޓީމުން މި މަހު މެޗެއް ކުޅުމަށް ހަމަޖެހިފައިވާ ކަމަށް ހޭންޑްބޯލް އެސޯސިއޭޝަނުން ބުނެފި އެވެ.
ހޭންޑްބޯލް އެސޯސިއޭޝަނުން ބުނީ މިއީ މިދިޔަ އަހަރު ބަންގްލަދޭޝް އަށް ކުރި ދަތުރުން ފަހިވި ފުރުސަތެއް ކަމަށާއި, މި ފުރުސަތާ އެކު, ބަންގްލަދޭޝްގެ ގައުމީ މުބާރާތުގެ ޗެމްޕިއަން ކޮންމެ އަހަރަކު ވެސް ރާއްޖޭގައި ތިން މެޗު ކުޅުމަށް ހަމަޖެހިފައިވާ ކަމަށެވެ.
އެ ގޮތުން، މި އަހަރު ރާއްޖެ އަންނަން ހަމަޖެހިފައިވާ ބަންގްލަދޭޝް ޓީމަކީ އެ ގައުމުގެ ގައުމީ މުބާރާތް މިދިޔަ އަހަރު ކާމިޔާބުކުރި އަންސަރް ކުލަބެވެ. މިއީ، އެ ގައުމުގެ ދިފާއީ ބާރަށް ނިސްބަތްވާ ކުލަބެކެވެ.
އަންސަރު ކުލަބުން ފުރަތަމަ މެޗުގައި މި މަހުގެ 26 ވަނަ ދުވަހު ނުކުންނާނީ، ދިވެހި ސިފައިންގެ ކުލަބާ ދެކޮޅަށެވެ. ދެ ވަނަ މެޗުގައި މި މަހުގެ 28 ވަނަ ދުވަހު ނުކުންނާނީ މިދިޔަ އަހަރުގެ ގައުމީ މުބާރާތުގެ ރަނަރަޕް ވެލިދޫ ޔުނައިޓެޑްއާ ދެކޮޅަށެވެ.
ފަހު މެޗުގައި، މި މަހުގެ 30 ވަނަ ދުވަހު، އަންސަރު ނުކުންނާނީ ރާއްޖޭގެ 19 އަހަރުން ދަށުގެ ގައުމީ ޓީމާ ދެކޮޅަށެވެ.
ހޭންޑްބޯލް އެސޯސިއޭޝަނުން ބުނީ މި ފުރުސަތު 19 އަހަރުން ދަށުގެ ގައުމީ ޓީމަށް ދިނީ އައިއެޗްއެފް މުބާރާތައް އެ ޓީމު ތައްޔާރުވާތީ އޭގެ ކުރިން ފެންވަރު ރަނގަޅު މެޗެއް ޒުވާން ގައުމީ ޓީމަށް ދިނުމުގެ ގޮތުން ކަމަށެވެ.
އުންމީދަކީ މިކަހަލަ ފުރުސަތުތައް ރާއްޖޭގެ ހޭންޑްބޯލް ކުލަބުތަކަށް ހޯދައިދީ އެހެން ގައުމުތަކަށް ގޮސް ކުޅުމުގެ ފުރުސަތުވެސް ދިނުން ކަމަށް ހޭންޑްބޯލް އެސޯސިއޭޝަނުން ވަނީ ބުނެފަ އެވެ. އަދި ބަންގްލަދެޝްގެ ކުލަބުތަކާ އެކު އިންޓަނޭޝަނަލް ފްރެންޑްލީ ސީރީސްތައް ކުރިއަށް އޮތް ތަނުގައި ވެސް ކުރިއަށް ގެންދާނެ ކަމަށް ވެސް ހޭންޑްބޯލް އެސޯސިއޭޝަނުން މައުލޫމާތު ދެ އެވެ.
