މިއަދު ފެށި އިންޓަ ސްކޫލް އެތުލެޓިކްސް މުބާރާތުގެ ޓްރިޕަލް ޖަމްޕުގައި ވާދަކޮށް ރާއްޖޭގެ ގައުމީ ރެކޯޑު ޖަލާލުއްދީން ސްކޫލްގެ އަހުނާ ނިޒާރު މުގުރާލައިފި އެވެ.
ހުޅުމާލޭގެ ސިންތެޓިކް ޓްރެކްގައި މިއަދު އިންޓަ ސްކޫލް އެތުލެޓިކްސް މުބާރާތް ފެށީ 47 ސްކޫލުން 1500 އަށްވުރެ ގިނަ ބައިވެރިންނާއިއެކުގަ އެވެ. މުބާރާތުގެ ހުޅުވުމުގެ ރަސްމިއްޔާތު މިއަދު ހަވީރު ވަނީ ބާއްވައިފަ އެވެ.
މުބާރާތުގައި މިއަދު ހެނދުނު ގިނަ އިވެންޓުތަކެއް ކުރިއަށްދިޔައިރު އެންމެ ބޮޑަށް ފާހަގަކޮށްލެވުނީ 17 އަހަރުން ދަށުގެ އަންހެން ބައިގެ ޓްރިޕަލް ޖަމްޕް އިވެންޓެވެ.
މިއަދު ހަވީރު .ބޭއްވި އިންޓަ ސްކޫލް އެތުލެޓިކްސް މުބާރާތުގެ ހުޅުވުމުގެ ރަސްމިއްޔާތުގެ ތެރެއިން.--- ފޮޓޯ: އަބްދުﷲ އިޔާން/ އަދަދު
ސަތާރަ އަހަރުން ދަށުގެ އަންހެން ބައިގެ ޓްރިޕަލް ޖަމްޕްގައި ވާދަކޮށް ޖަލާލުއްދީން ސްކޫލުގެ އަހުނާ ގައުމީ ރެކޯޑު ހެދީ 10.63 މީޓަރަށް ފުންމައިގެންނެވެ. އަހުނާ މުގުރާލި ގައުމީ ރެކޯޑު އެންމެ ފަހުން ހަދާފައިވަނީ މިއަހަރުގެ މާޗު މަހު އޮތް އެސޯސިއޭޝަން ޗެމްޕިއަންޝިޕްގައި ނޫރާ އަބްދުލްހަމީދު އެވެ. އެ މުބާރާތުގައި ނޫރާ ވަނީ 10.47 މީޓަރު ދުރަށް ފުންމާފަ އެވެ.
އަހުނާގެ ފަހަތުން ޓްރިޕަލް ޖަމްޕްގެ ދެ ވަނަ ހޯދީ ރެހެންދި ސްކޫލްގެ ހަނާން އަހުމަދު ޒާހިރު އެވެ. ހަނާން 8.71 މީޓަރަށް ފުންމިއިރު، ތިން ވަނަ ހޯދީ ކަނޑުހުޅުދޫ ސްކޫލްގެ މަރިޔަމް ނޫޔާން ނިޔާޒް ވަނީ 8.68 މީޓަރަށް ފުންމާފަ އެވެ.
މިއަދު ކުރިއަށްދިޔަ އެހެން އިވެންޓްތަކަށް ބަލާއިރު، 15 އަހަރުން ދަށުގެ ފިރިހެން ކުދިންގެ ޑިސްކަސް އުކުމުން އެއްވަނަ ހޯދީ ޔޫސުފް ނިހާލް އަހުމަދު އެވެ. ދެވަނަ ރެހެންދި ސްކޫލްގެ އަބްދުﷲ ޔައިޝް އަހުމަދު ހޯދިއިރު، ތިންވަނަ ހޯދީ އިސްކަންދަރު ސްކޫލްގެ މުހައްމަދު ޝިބާން އެވެ.
އިންޓަ ސްކޫލް އެތުލެޓިކްސް މުބާރާތުގެ އިވެންޓެއްގެ ތެރެއިން.-- ފޮޓޯ: މުހައްމަދު ޝާބިން/ އަދަދު
ފަނަރަ އަހަރުން ދަށުގެ އަންހެން ކުދިންގެ ލޯންގް ޖަމްޕްގެ އެއްވަނަ ހޯދީ ދާންދޫ ސްކޫލްގެ ލުޔޫނާ ހަސަން އަހުމަދު އެވެ. އިމާދުއްދީން ސްކޫލްގެ އީލާފް އަބްދުއްލަތީފް ދެވަނަ ހޯދިއިރު، ތިންވަނަ ހޯދީ ލާމު އަތޮޅު މަދަރުސާގެ އާމިނަތު ލަޔާ އިބްރާހިމް އެވެ.
ސަތާރަ އަހަރުން ދަށުގެ ފިރިހެން ކުދިންގެ ޝޮޓްޕުޓް އެއްވަނަ ލާމު އަތޮޅު މަދަރުސާގެ މުހައްމަދު ޝިޒާން ފާރޫގު ހޯދިއިރު ދެވަނަ ހޯދީ ރެހެންދި ސްކޫލްގެ މީސަމް މުހައްމަދު އަބްދުއްރައްޒާގު އެވެ. ތިންވަނަ ހޯދީ ލާމު އަތޮޅު މަދަރުސާގެ މުހައްމަދު އަނޫފް އަފީފް އެވެ.
ވިހި އަހަރުން ދަށުގެ އަންހެން ކުދިންގެ ޑިސްކަސް އުކުމުން އެއްވަނަ އައްޑޫ ހައި ސްކޫލްގެ ކައުސަރު އާދަމް ހޯދިއިރު، ދެވަނަ ހޯދީ އަހުމަދިއްޔާ އިންޓަނޭޝަނަލް ސްކޫލްގެ މަލްހާ މުހައްމަދު މާދީ އެވެ. ތިންވަނަ ހޯދީ ސީއެޗްއެސްއީގެ ޝާވިން ނިޝާ އެވެ.
ތޭރަ އަހަރުން ދަށުގެ ފިރިހެން ކުދިންގެ ދިގު ފުންމުމުގެ އެއްވަނަ ހޯދީ މިލަންދޫ ސްކޫލްގެ އާދަމް ޒާން ޔަޒްމީން އެވެ. ދެވަނަ ޣީޔާސުއްދީން އިންޓަނޭޝަނަލް ސްކޫލްގެ ޔުއާން އަޚްތަރު ޒާހިރު ހޯދިއިރު، ތިންވަނަ ހޯދީ އަލީ ޝައިލް އާސިމް އެވެ.
ތޭރަ އަހަރުން ދަށުގެ އަންހެންކުދިންގެ ބައިގެ ހާޑްބޯލް ތްރޯގެ އެއްވަނަ ހޯދީ މުންޑޫ ސްކޫލްގެ އައިޝަތު އިމާން އަހްމަދު ނިޒާރު އެވެ. ދެވަނަ ބިލަބޮންގ ހައި އިންޓަނޭޝަނަލް ސްކޫލްގެ މަރިޔަމް ރައުލާ ސާމިރު ހޯދިއިރު، ތިންވަނަ ހޯދީ ރެހެންދި ސްކޫލްގެ އައިޝަތު އީލިއާ ބިންތް މުހައްމަދު އެވެ.
އިންޓަ ސްކޫލް މުބާރާތުގެ އިވެންޓުތައް ކޮންމެ ދުވަހަކު ހެނދުނު 7-11 އަދި ހަވީރު 3 އިން 6 އަށް ކުރިއަށްދާނެ އެވެ.
