ފަސް ދުވަހަށް ފަހު އިޒްރޭލާއި ފަލަސްތީނުން ހަމަލާ ބަދަަލުކުރުން މެދުކަނޑާލަން އެއްބަސްވެއްޖެ އެވެ.
މިސްރުގެ މެދުވެރިވެގެން އެކުލަވާލި އެއްބަސްވުމުގެ ދަށުން ހަމަލާ ބަދަލުކުރުން ހުއްޓާލަން ނިންމީ ހޮނިހިރު ދުވަހު ގާޒާގެ ގަޑިން ރޭގަނޑު 10:00 ގައި ކަމަށް ފަލަސްތީނުގެ އޮފިޝަލުން ބުންޏެވެ.
އެކަމާ ގުޅޭ ގޮތުން އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ އެއްވެސް އެއްޗެއް ވިދާޅެއް ނުވެ އެވެ. އެކަމަކު މީގެ ކުރިން ވެސް އެއްބަސްވުމަށް ފަހު، އެއާ އެއް ގޮތަށް އިޒްރޭލުން އަމަލުކޮށްފައެއް ނުވެ އެވެ.
މިސްރުގެ އަލް ގާހިރާ ޓީވީއިން ބުނީ އެ ގައުމުގެ ސަރުކާރުން ދެ ފަރާތަށް ވެސް ގޮވާލަނީ އެއްބަސްވުމަށް އިހްތިރާމް ކުރުމަށް ކަމަށެވެ.
އޭގެ އިތުރުން އާއްމު ރައްޔިތުންނާއި އާއްމުންގެ ގެތަކަށް ހަމަލާ އަމާޒު ކުރުން ހުއްޓާލުމަށް ވެސް އެއްބަސްވުމުގައި ހިމަނާފައިވެ އެވެ.
މިދިޔަ އަންގާރަ ދުވަހުން ފެށިގެން އިޒްރޭލުން ދިން ހަމަލާތަކުގައި ގާޒާއިން 33 މީހުން މަރުވި އިރު، އޭގެ ތެރޭގައި ހަ ކުދިން ހިމެނެ އެވެ. ގާޒާއިން ފޮނުވި ރޮކެޓް ހަމަލާތަކުގައި މަރުވީ އިޒްރޭލުގެ ދެ މީހުންނެވެ.
އިޒްރޭލުން ބުނީ ގާޒާގައި ހަރަކާތްތެރިވާ އިސްލާމިކް ޖިހާދަށް ހަމަލާ ދޭން ފެށީ، މިދިޔަ ހަފުތާގައި އެ ގްރޫޕުން އިޒްރޭލަށް ރޮކެޓު ހަމަލާ ފޮނުވުމުން ކަމަށެވެ.
އެ ގްރޫޕުން އޭރު ހަމަލާ ދިނީ ގްރޫޕްގެ މެމްބަރަކު ގާނޫނާ ހިލާފަށް އިޒްރޭލުގެ ޖަލެއްގައި ބަންދުކޮށްފައި ހުރުމާ ދެކޮޅަަށް ކުރި ބަނޑުހައި ހޫނުކަމުގެ ހަޅުތާލުގެ ތެރެއިން ހާލު ގޯސްވެ، މަރުވުމުންނެވެ.
އެހެން ނަމަވެސް، އުމުރުން 45 އަހަރުގައި މަރުވި ހާދިރް އަދްނާންގެ އާއިލާގެ އެދުމުގެ މަތިން، އިސްލާމިކް ޖިހާދުން ހަމަލާދިނުން ހުއްޓާލި އެވެ.
