އެމްޑަބްލިއުއެސްސީ ދިވެހި ޕްރިމިއާ ލީގު 2023 ގައި މިއަދު ހަވީރު ކުޅުނު މެޗުން ޔުނައިޓެޑް ވިކްޓަރީ (ޔޫވީ) 3-0 އިން ބަލިކޮށް، ސުޕަ ޔުނައިޓެޑް ސްޕޯޓްސް (ސަސް) އިން މި ފަަހަރު ލީގުގައި އެ ޓީމުގެ ވަރުގަދަ ފެށުން ދަމަހައްޓައިފި އެވެ.
ޕްރެޒިޑެންޓްސް ކަޕް ސެމީ ފައިނަލުގައި ކުޅުނު ސަސް އިން ވަނީ ލީގުގައި ކުޅުނު ފުރަތަމަ މެޗުން ކްލަބް ގްރީން ސްޓްރީޓްސް އަތުން 5-1 އިން މޮޅުވެފަ އެވެ. ދެ ވަނަ، މެޗުން، މިއަދު ޔުނައިޓެޑް ވިކްޓަރީ އަތުން މޮޅުވުމުން، މި ވަގުތު ލީގު ތާވަލަށް ބަލާނަމަ ކުރީގައި އޮތީ އިސްމާއިލް މަހްފޫޒް (އިންމަ)ގެ ކޯޗުކަމުގައި ކުޅެމުން އަންނަ ސަސް އެވެ. ސަސް އިން ދެ މެޗުން މޮޅުވިއިރު، އަށް ގޯލު ވަނީ ޖަހައިފަ އެވެ. ބައިކޮޅަށް ވަނީ އެންމެ ގޯލެކެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗު ފަށައިގެން ތިން ވަނަ މިނިޓްގައި ޔުނައިޓެޑް ވިކްޓަރީގެ އޭރިއާތެރެއިން ސަސްގެ އަލީ ނަސޫހު ރަޝީދު (ޕިލާ) ޖެހި ބޯޅަ ޔުނައިޓެޑް ވިކްޓަރީގެ ކީޕަރު އަލީ ނާޖިހު ވަނީ މަަތަކޮށްފަ އެވެ. އެކަމަކު، އޭގެ ހަތް މިނިޓް ފަހުން، މެޗުގެ 10 ވަނަ މިނިޓްގައި، ޔުނައިޓެޑް ވިކްޓަރީގެ ޑިފެންޑަރުން ޖެހި އޮފްސައިޑް މަޅިން ސަލާމަތްވެ، ޕިލާ ބޯޅަ ހިފައިގެން ވަދެ، ވަނީ ގޯލުގެ ކައިރީ ކަނަށް ބޯޅަ ފޮނުވާލައިފަ އެވެ. މިއީ ސަސްގެ ފުލްބެކް، އައިހަމް އަހުމަދު (އައިހު) ދިން ބޯޅައަކަށް އަރައި، ޕިލާ ޖެހި ގޯލެކެވެ.
އޭގެ ފަހުން ސަސް އިން ލީޑުފުޅާކުރަން ކުރި މަސައްކަތުގެ ހުރަހަަކަށްވީ ޔުނައިޓެޑް ވިކްޓަރީގެ ޑިފެންޑަރު، މުހައްމަދު ސަމްހާން އެެވެ. އޭނާ ވަނީ ސަސްގެ ޕިލާ އާއި އަހުމަދު އައިހަމް ޖެހި ބޯޅަތައް ސަމްހާން ވަނީ ބްލޮކްކޮށްފަ އެވެ. ނަތީޖާ ހަމަހަމަކުރަން ޔުނައިޓެޑް ވިކްޓަރީގެ ޝަނާން ރަޝާދު ފޮނުވާލި އެއް ބޯޅަ ސަސްގެ ކީޕަރު އަބްދުﷲ ޒިމާމް ވަނީ އަތަށް ނަގައިފަ އެވެ.
ސަސް އިން ލީޑުފުޅާކުރީ 43 ވަަނަ މިނިޓްގައި އައިހު ޖެހި ހިލޭޖެހުމުންނެވެ. އޭރިއާބޭރުން އައިހު ފޮނުވާލި މި ހިލޭ ޖެހުން ގޯލަށް ވަނީ ކީޕަރު ނާޖިހު އަތްކައިރިން ގޮހެވެ.
ދެ ވަނަ ހާފްގައި ކުޅުން ފަށައިގެން ޔުނައިޓެޑް ވިކްޓަރީން ވަނީ ކުރިއަށް ޖެހިގެން ކުޅެ، މި ހާފުގެ ފުރަތަމަ 15 މިނިޓް ތެރޭގައި ލަނޑު ޖަހާނެ ދެ ފުރުސަތެއް ހޯދައިފަ އެވެ. އެ ގޮތުން އޭރިއާތެރެއިން ޔުނައިޓެޑް ވިކްޓަރީގެ އަހުމަދު ބައްސާމް މުހައްމަދު ނައީމް (ބައްކު) އަށް ރަނގަޅަށް ބޯޅަ ކޮންޓްރޯލް ނުކުރެވިގެން، ފުރުސަތު ގެއްލުނުއިރު، ޔުނައިޓެޑް ވިކްޓަރީގެ އަރީން އަބްދުﷲ އިބްރާހިމް އަށް މުޅިން ހުސްކޮށް ލިބުނު ފުރުސަތުން ކީޕަރު ޒިމާމް ކައިރިން ނައްޓާފައި ޖެހި ބޯޅަ ދިޔައީ ހުރަސްދަނޑިމަތިންނެވެ.
ސަސް އިން ދެ ވަނަ ހާފުގައި އުފެއްދި ފުރަތަމަ ނުރައްކާތެރި ހަމަލާގައި ތިން ވަނަ ގޯލު ޖެހި އެވެ. މެޗުގެ 64 ވަނަ މިނިޓްްގައި ޕިލާ އަށް ލިބުނު ފުރުސަތުން ޖެހި ބޯޅަ އަމާޒުވީ ގޯލުގެ ކަނަށެވެ. އޭގެ ފަސް މިނިޓް ފަހުން، ޔުނައިޓެޑް ވިކްޓަރީ އަށް ގޯލެއް ޖަހަން ރަނުގެ ފުރުސަތެއް ލިބުނެވެ. ޝަނާން ހުސްކޮށްލާފައި ބައްކު އަށް ދިން ބޯޅަ އޭރިއާތެރެއިން ފޮނުވާލި ނަމަވެސް ކީޕަރު ޒިމާމް ވަނީ ފައިން މަތަކޮށްފަ އެވެ.
މެޗުގެ ބޮޑުބައި ވިއްސާރައިގެ ތެރޭގައި ކުޅުނުއިރު، ޔުނައިޓެޑް ވިކްޓަރީން 84 ވަނަ މިނިޓްގައި ވެސް ލަނޑެއް ޖެހޭތޯ ބެލި އެވެ. ބައްކު ހުރަސްކޮށްލި ބޯޅައަކަށް އެރި މުހައްމަދު ހުސެއިން ޖެހި ޝޮޓް އަމާޒުވީ ގޯލުގެ ދަނޑިއަށެވެ.
ލީގުގައި މިރޭ ކުޅޭ މެޗުގައި އެންމެ ފަހުގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަން ބައްދަލުކުރާނީ ކްލަބް ގްރީން ސްޓްރީޓްސްއާ އެވެ. މެޗު ފަށާނީ 9 ޖަހާއިރު އެވެ.
