މިދިޔަ އަންގާރަ ދުވަހުން ފެށިގެން އިޒްރޭލުން ގާޒާއަށް ދެމުންދާ ވައިގެ ހަމަލާތަކުގައި ހަ ކުޑަކުދިން ހިމެނޭ ގޮތަށް 33 މީހުން މަރުވެއްޖެ އެވެ.
ރައްދުގައި ގާޒާއިން ވެސް ރޮކެޓު ހަމަލާތައް ފޮނުވަމުންދާ އިރު، ފުރަތަމަ ފަހަރަށް ރޮކެޓު ހަމަލާއެއް ވަނީ ގުދުސްއާ ހަމައަަށް ފޯރައިފަ އެވެ. މިހާތަނަށް އިޒްރޭލުން މަރުވީ އެންމެ މީހެކެވެ.
ރިޕޯޓުތައް ބުނާ ގޮތުން އިޒްރޭލުގެ ހަމަލާތައް އަމާޒު ކުރަނީ ގާޒާގައި މީހުން ދިރިއުޅޭ ހިސާބުތަކަށެވެ. އެހެންވެ، މަރު ނުވި ނަމަވެސް ގިނަ ބަޔަކަށް އަނިޔާވަމުންދެ އެވެ.
އެކަމަކު އިޒްރޭލުން ބުނަނީ ޓާގެޓް ކުރަނީ އިސްލާމިކް ޖިހާދް ގްރޫޕާ ގުޅުން ހުރި ތަންތަނަށް ކަމަށެވެ. އެއީ މީހުން އުޅޭ އިމާރާތްތަކުގައި ހުރި އެ ގްރޫޕްގެ ކޮމާންޑް ސެންޓަރުތައް ކަމަށް އިޒްރޭލުން ބުނެ އެވެ.
މޭ ނުވަ ވަނަ ދުވަހުން ފެށިގެން އިޒްރޭލުން ގާޒާއަށް ވަދެވެން ހުރި މަގުތައް ބަންދުކޮށްފައި ވާތީ، ބޭނުންވާ ޒަރޫރީ ތަކެތި ވެސް ފަލަސްތީނުގެ ރައްޔިތުންނަކަށް ނުލިބެ އެވެ.
ގާޒާގެ އިލެކްޓްރިސިޓީ އޮތޯރިޓީން ބުނީ އެ ތަނުގައި ހިންގާ ހަމައެކަނި ޕްލާންޓަށް ބޭނުންވާ ތެޔޮ ހުސްވުމުން ކުރިއަށް އޮތް 72 ގަޑިއިރުގެ ތެރޭގައި ކަރަންޓު ކެނޑޭނެ ކަމަށެވެ.
އިޒްރޭލުން ގާޒާ ވަށައި ބަންދުކޮށްގެން އުޅޭތާ މިހާރު 16 އަހަރުވެއްޖެ އެވެ. ގާޒާއަށް ވަދެވެން އޮންނަ ހުރިހާ މަގެއް ވެސް ކޮންޓްރޯލް ކުރަނީ އިޒްރޭލުންނެވެ. އަދި ބޭނުންވާ ކޮންމެ އިރަކު އެ މަގުތައް ވެސް އެއްކޮށް ބަންދުކޮށްލަ އެވެ.
އިސްލާމިކް ޖިހާދް ގްރޫޕްގެ ތަރުޖަމާނު ދާވޫދް ޝިހާބް މިޑްލް އީސްޓް އައި ނޫހަށް ވިދާޅުވީ ހަމަލާ މެދުކަނޑާލުމުގެ އެއްބަސްވުމަކަށް އަންނަން އިޒްރޭލުން ދެކޮޅު ހަދާ ކަމަށެވެ.
ހަމަލާ މެދުކަނޑާލަން ފަލަސްތީނުގެ ގްރޫޕްތަކުން މާ ގިނަ ކަންކަމަށް ޑިމާންޑް ނުކުރާ ކަމަށާއި ހަމައެކަނި އެދުމަކީ އާއްމުންނަށް ޓާގެޓުކޮށް، މެރުން ހުއްޓާލުން ކަމަށް އޭނާ ވިދާޅުވި އެވެ.
ހަމަލާތަކާ ގުޅިގެން ގިނަ އާއިލާތަކެއް ވަނީ މަގުމަތިވެފައި. -- ފޮޓޯ: މިޑްލް އީސްޓް އައި
ހުކުރު ދުވަހު ގުދުސްއަށް ފޮނުވި ރޮކެޓު ހަމަލާއަކީ އިޒްރޭލަށް ދިން މެސެޖެއް ކަމަށާއި އެއީ ހަރުކަށި ޔަހޫދީ ގްރޫޕްތަކުން ބާއްވަން އުޅޭ "ދިދައިގެ ހިނގާލުމުގެ" ކުރިން ދިން އިންޒާރެއް ކަމަށް އޭނާ ވިދާޅުވި އެވެ.
އިޒްރޭލުން ބުނީ އިސްލާމިކް ޖިހާދަށް ހަމަލާ ދޭން ފެށީ، މިދިޔަ ހަފުތާގައި އެ ގްރޫޕުން އިޒްރޭލަށް ރޮކެޓު ހަމަލާ ފޮނުވުމުން ކަމަށެވެ.
އެ ގްރޫޕުން އޭރު ހަމަލާ ދިނީ ގްރޫޕްގެ މެމްބަރަކު ގާނޫނާ ހިލާފަށް އިޒްރޭލުގެ ޖަލެއްގައި ބަންދުކޮށްފައި ހުރުމާ ދެކޮޅަަށް ކުރި ބަނޑުހައި ހޫނުކަމުގެ ހަޅުތާލުގެ ތެރެއިން ހާލު ގޯސްވެ، މަރުވުމުންނެވެ.
އެހެން ނަމަވެސް، އުމުރުން 45 އަހަރުގައި މަރުވި ހާދިރް އަދްނާންގެ އާއިލާގެ އެދުމުގެ މަތިން، އިސްލާމިކް ޖިހާދުން ހަމަލާދިނުން ހުއްޓާލި އެވެ.
