ބުދަ ދުވަހު އިޒްރޭލުން ދިން ވައިގެ ހަމަލާތަކުގައި ފަލަސްތީނުގެ 21 މީހުން މަރުވެފައިވާ ކަމަށް ރިޕޯޓުތައް ބުނެފި އެވެ.
ރައްދުގައި ގާޒާއިން ރޮކެޓު ހަމަލާތައް ފޮނުވަމުންދާ އިރު، މިސްރުގެ ދައުލަތުގެ ޓީވީއިން ބުނީ އެ ގައުމު މެދުވެރިވެގެން ދެއްކި ވާހަކަތަކަށް ފަަހު ހަމަލާތައް މެދުކަނޑާލަން އެއްބަސްވެފައިވާ ކަމަށެވެ.
އެހެން ނަމަވެސް، ރިޕޯޓުތައް ބުނާ ގޮތުން ހަމަލާތައް އަދިވެސް ދަނީ ކުރިއަށެވެ. އިޒްރޭލުން ގާޒާއަށް ބޮން އަޅަމުން ދާތީ ރައްދުގައި ގާޒާއިން ވެސް ދަނީ ރޮކެޓުތައް ފޮނުވަމުންނެވެ.
އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ ޓީވީ މެދުވެރިކޮށް ދެއްކި ބަޔާނެއްގައި ވިދާޅުވީ "ޓެރަރިސްޓުންނަށް" ބޮޑު ދެރައެއް ލިބިފައިވާ ކަމަށެވެ.
"މި ބުރު އަދި ނުނިމޭ" ކަމަށް ވިދާޅުވެ، ނަތަންޔާހޫ އިންޒާރު ދެއްވި އެވެ. އެހެންކަމުން، ހަމަލާތައް މެދުކެނޑޭނެ އިރެއް ޔަގީން ނުވާ ކަމަށް އެނެލިސްޓުން ބުނެ އެވެ.
ގާޒާއިން ފޮނުވި ރޮކެޓުތައް ހުއްޓުވަން އިޒްރޭލުގެ އެއާ ޑިފެންސް ސިސްޓަމުން މަސައްކަތް ކުރަމުންދާ އިރު، އެއާ-ރެއިޑް ސައިރެންގެ އަޑު ބައެއް ހިސާބުތަކުން އިވެމުންދެ އެވެ.
އިޒްރޭލުން އަންގާރަ ދުވަހު ވައިގެ ހަމަލާތައް ފެށުމާ އެކު، އިޒްރޭލުގެ ރައްޔިތުން ވަނީ ރައްދުގައި ގާޒާއިން ރޮކެޓު ފޮނުވާނެ ކަމަށް ބަލައި ތައްޔާރުވެފަ އެވެ.
ބައެއް އެނެލިސްޓުން ބުނާ ގޮތުގައި ގިނަ ދުވަސްތަކަކަށް ފަހު މިހާ ބޮޑަށް ހަމަލާ ބަދަލުކުރަމުން ދިޔުމަކީ ހަނގުރާމައެއް ފެށުމުގެ ނިޝާނަކަށް ވެދާނެ އެވެ.
ރިޕޯޓުތައް ބުނާ ގޮތުން އިޒްރޭލުން ޓާގެޓް ކުރަނީ ގާޒާގައި ވެރިކަން ކުރާ ހަމާސްގެ ބަދަަލުގައި އިސްލާމިކް ޖިހާދުގެ މެމްބަރުންނަށެވެ. އަދި ރައްދުގައި ރޮކެޓު ފޮނުވަނީ ވެސް ހަމާސްއިން ނޫން ކަމަށް ބެލެވެ އެވެ.
އިޒްރޭލާއި ހަމާސްއާ ދެމެދު 2007 އިން ފެށިގެން އެތައް ފަހަރަކު ހަމަލާ ބަދަލުކޮށްފައިވެ އެވެ. މި ފަހަރު ހަމަލާދެމުންދާ އިސްލާމިކް ޖިހާދު ގްރޫޕުން މިހާތަނަށް ވަކި އެއްޗެއް ނުބުނެ އެވެ.
އިޒްރޭލުގެ ނޫސްތަަކުން ބުނީ 300 ރޮކެޓު ފޮނުވި އިރު، 200 ރޮކެޓު ބޯޑަރު ހުރަސްކޮށް އިޒްރޭލުގެ ސަރަހައްދަށް ވެއްޓުނު ކަމަށެވެ. ތިން މީހުންނަށް އަނިޔާވެފައިވާ އިރު، ދެ ގެޔަކަށް ގެއްލުން ލިބިފައިވެ އެވެ.
ފަލަސްތީނުގެ ގާޒާއިން މަރުވި މީހުންގެ ތެރޭގައި އިސްލާމިކް ޖިހާދްގެ އިސް ކޮމާންޑަރުން ހިމެނެ އެވެ. އޭގެ އިތުރުން ފަލަސްތީނުން 10 އަހަރުގެ ކުއްޖަކު ވެސް މަރުވެފައިވެ އެވެ.
އިޒްރޭލުން ބުނީ އިސްލާމިކް ޖިހާދަށް ހަމަލާ ދޭން ފެށީ، މިދިޔަ ހަފުތާގައި އެ ގްރޫޕުން އިޒްރޭލަށް ރޮކެޓު ހަމަލާ ފޮނުވުމުން ކަމަށެވެ.
އެ ގްރޫޕުން އޭރު ހަމަލާ ދިނީ ގްރޫޕްގެ މެމްބަރަކު ގާނޫނާ ހިލާފަށް އިޒްރޭލުގެ ޖަލެއްގައި ބަންދުކޮށްފައި ހުރުމާ ދެކޮޅަަށް ކުރި ބަނޑުހައި ހޫނުކަމުގެ ހަޅުތާލުގެ ތެރެއިން ހާލު ގޯސްވެ، މަރުވުމުންނެވެ.
އެހެން ނަމަވެސް، އުމުރުން 45 އަހަރުގައި މަރުވި ހާދިރް އަދްނާންގެ އާއިލާގެ އެދުމުގެ މަތިން، އިސްލާމިކް ޖިހާދުން ހަމަލާދިނުން ހުއްޓާލި އެވެ.
