މިހާރު ކުރިއަށްދާ އޮފީސް/ކޮމްޕެނީ ވޮލީބޯޅަ މުބާރާތުގައި ރޭ ކުޅުނު މެޗުން މޯލްޑިވްސް ޕޮލިސް ސާވިސް ބަލިކޮށް އާބަންކޯ އިން ސައްތަ އިން ސައްތަ ރެކޯޑަކާ އެކު ގްރޫޕް ސްޓޭޖު ނިންމާލައިފި އެވެ.
ގްރޫޕް އޭގެ ފަހު މެޗުގައި ރޭ އާބަންކޯ އިން ޕޮލިސް ބަލިކުރީ 3-1 ސެޓުންނެވެ.
ހުޅުމާލޭ ޕާކް ވޮލީ ސްޓޭޑިއަމްގައި ރޭ ކުޅުނު މެޗުގައި 25-14، 25-21 އިން ފުރަތަމަ ދެ ސެޓު އާބަންކޯ އިން ގެންދިއުމުން ސީދާ ތިން ސެޓުން މި މެޗު ދާނެ ކަމަށް ބެލެވުނެވެ. ފުރަތަމަ ދެ ސެޓުގައި އާބަންކޯގެ ކެޕްޓަން، އިސްމާއިލް ސާޖިދު (ކުޑަކާއްޓެ) އާއި ބްލޮކަރު އާދަމް ފައިރޫޒްގެ ރަނގަޅު ކުޅުމެއް ފެނިގެންދިޔަ އެވެ.
ފުރަތަމަ ދެ ސެޓު ދިއުމުން ޕޮލިހުން ހިތްވަރުކޮށްގެން ނުކުމެ ތިން ވަނަ ސެޓު، 21-25 އިން ގެންގޮސް އުންމީދެއް ހޯދި އެވެ. އެކަމަކު، ޖެހިގެން އައި ސެޓުގައި އާބަންކޯ އިން ކުރިން ސެޓުގައި ހެދުނު ގޯސްތައް ރަނގަޅުކުރި އެވެ. ނަތީޖާ އަކަށްވީ އާބަންކޯ އިން 25-18 އިން ހަތަރު ވަނަ ސެޓު ގެންގޮސް މެޗުން މޮޅުވުމެވެ.
ރޭގެ މެޗުގެ ތެރެއިން އާބަންކޯގެ ފައިރޫޒް ޕޮއިންޓެއް ހޯދުމަށް ފަހު އުފާފާޅުކުރަނީ.--- ފޮޓޯ: އަބްދުﷲ އިޔާން/ އަދަދު
ނުވަ ޓީމު ވާދަކުރި މުބާރާތުގެ ސެމީ ފައިނަލްގެ ޖާގަތައް ހޯދީ ގްރޫޕް އޭ އިން އާބަންކޯ އާއި ޕޮލިސް އެވެ. ގްރޫޕް ބީން މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެލް/ސިފައިން) އާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ) އެވެ.
ތިން ސެމީ ފައިނަލް ކުޅޭ ގޮތަށް ހަމަޖެހިފައިވާއިރު، ބުރާސްފަތި ދުވަހު ހަވީރު ކުޅޭނީ ދެ ގްރޫޕްގެ ވެސް ދެ ވަނަ އެވެ. އެއީ ވެމްކޯ އާއި ޕޮލިސް އެވެ. އެރޭ ކުޅޭ ސެމީ މެޗުން ސިފައިންނާއި އާބަންކޯ ކުޅެގެން މޮޅުވާ ޓީމަކަށް ފައިނަލުގެ ސީދާ ޖާގައެއް ލިބޭނެ އެވެ. މި މެޗުން ބަލިވާ ޓީމެއް ޖެހޭނީ ވެމްކޯ އާއި ޕޮލިސް ކުޅޭ މެޗުން މޮޅުވާ ޓީމަކާ ތިން ވަނަ ސެމީގައި ކުޅޭށެވެ. ފައިނަލުގެ ފަހު ޖާގަ ލިބޭނީ ތިން ވަނަ ސެމީން މޮޅުވާ ޓީމަކަށެެވެ.
ފައިނަލް މެޗު އޮތީ އަންނަ އާދިއްތަ ދުވަހުގެރޭގަ އެވެ.
ގްރޫޕް ސްޓޭޖުގެ މެޗުތަކަށް ފަހު ޕޮއިންޓްގެ ތާވަލު.-- ގްރެފިކްސް: ވޮލީބޯލް އެސޯސިއޭޝަން
