މާޗެންޓައިލް އިންޓަ އޮފީސް/ކޮމްޕެނީ ވޮލީބޯލް ޗެމްޕިއަންޝިޕްގެ ފައިނަލުގައި ޕޮލިސް ކްލަބްގެ މައްޗަށް 3-1 ސެޓުން ކުރިހޯދާ ކްލަބް ވެމްކޯ އިން އޮފީސް މުބާރާތުގެ ޗެމްޕިއަންކަން ހޯދައިފި އެވެ.
ހުޅުމާލެ, އެޗްޑީސީ ވޮލީ ކޯޓުގައި ކުޅުނު މި މެޗުގެ ފުރަތަމަ ސެޓު ޕޮލިސް ކްލަބުން ގެންދިޔަ ނަމަވެސް ޖެހިގެން އައި ތިން ސެޓުގައި ވެމްކޯ އިން ވަނީ ތަފާތު ރޫހެއްގައި ކުޅެ މެޗު ކާމިޔާބުކޮށްފަ އެވެ.
މި މެޗުގެ ސެޓުތައް ދިޔައީ, 17-25, 25-17, 25-21 އަދި 25-21 އިންނެވެ.
މި މެޗުގެ ފުރަތަމަ ސެޓުގައި ޕޮލިސް ކްލަބުގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު, މި ސެޓުގައި ޕޮލިހުގެ ހައްވާ ރާޝިދާ (ހައްވަ) އަދި ޝަހާ ޝާމިންގެ ފަރާތުން މޮޅު ކުޅުމެއް ފެނިގެންދިޔަ އެވެ. ހާއްސަކޮށް ސެޓުގެ ފަހުކޮޅު ޝަހާ ވަނީ ފެންވަރު ރަނގަޅު ސާވިސްތަކެއް ގާތްގާތުގައި ކާމިޔާބުކޮށް ބޮޑު ލީޑެއް ޕޮލިހަށް ނަގައިދީފަ އެވެ. އެއާއެކު، އެ ޓީމުން މި ސެޓު ގެންދިޔައީ 25-17 އިންނެވެ.
އެކަމަކު، ވެމްކޯ އިން ދެ ވަނަ ސެޓުގައި ފެނިގެންދިޔައީ ތަފާތުކޮށެވެ. މި ސެޓުގައި ވެމްކޯ އަށް ފުރަތަމަ ސެޓުގައި ދިމާވި ރިސީވްގެ މައްސަލަ ހައްލުކުރިއިރު, މި ސެޓުގައި ވެމްކޯގެ ސެޓަރު، ފާތިމަތު ޖޫޒާން ޒަރީރް (ޖޫޒް), އައިޝަތު މާޖިދާ (މާޖީ) ގެ މޮޅު ކުޅުން ފެނިގެންދިޔަ އެވެ.
މި ސެޓު ވެމްކޯ އިން ކާމިޔާބުކުރީ 25-17 އިންނެވެ.
ޕޮލިސް އާއި ވެމްކޯ ބައްދަލުކުރި ފައިނަލް މެޗުގެ ތެރެއިން ވެމްކޯގެ ކުޅުންތެރިން ޕޮއިންޓް ސްކޯކުރުމަށްފަހު އުފާފާޅުކުރަނީ - ފޮޓޯ: އަތޫފް އާތިފް / އަދަދު
ތިންވަނަ ސެޓާއި ހަތަރު ވަނަ ސެޓުގައި ވެސް ވެމްކޯ އިން ވަނީ ދެ ވަނަ ސެޓުގައި އެ ޓީމުން ދެއްކި ކުޅުން ތަކުރާރު ކޮށްފަ އެވެ. މި ދެ ސެޓު އެ ޓީމުން ގެންދިޔައީ, 25-21 އަދި 25-21 އިންނެވެ.
މި މުބާރާތުގެ އެންމެ މޮޅު ކުޅުންތެރިޔަކީ ވެމްކޯގެ މާޖި އެވެ. އަދި މުބާރާތުގެ އެންމެ މޮޅު ހަ ކުޅުންތެރިންނަކީ ވެމްކޯގެ މާޖީ, ޖޫޒް, ނުހާ ވަހީދު, ޕޮލިސް ކްލަބްގެ, ހައްވަ, އައިމިނަތު އަރީޝާ (އަރީ), މަރިޔަމް އަޒުމާ އަދި އިމިގްރޭޝަންގެ ނަރީމާ އިދުރީސް (ނަންނި) އެވެ.
މުބާރާތުގެ އެންމެ މޮޅު ކޯޗަކީ ވެމްކޯގެ ކޯޗު އަހުމަދު އަދީލް (ބޭބެ) އެވެ. އަދި މުބާރާތުގެ މޮޅު ކުޅުންތެރިއަކީ މާޖީ އެވެ.
އަންހެން ވޮލީގައި މި އަހަރު ބޭއްވި އެސޯސިއޭޝަން ކަޕް، ގައުމީ ލީގު އަދި ގައުމީ މުބާރާތް ވެސް ކާމިޔާބުކޮށްފައިވަނީ ކްލަބް ވެމްކޯ އިންނެވެ. އެހެންކަމުން، މިއީ، ރާއްޖޭގެ ވޮލީ ސީޒަނެއްގައި އަންހެން ޓީމެއްގެ އެންމެ ރަނގަޅު އެއް ނަތީޖާ އެވެ.
ވެމްކޯ އިން ޖެހިޖެހިގެން ހަތަރު ވަނަ ފަހަރަށް އެސޯސިއޭޝަން ކަޕް ކާމިޔާބުކުރިއިރު، ގައުމީ ތަށި ވަނީ މިލްކްކޮށްފަ އެވެ. ގައުމީ ލީގު ބޭއްވީ 2017 ވަނަ އަހަރުގެ ފަހުން ފުރަތަމަ ފަހަރަށެވެ. އަދި ކޮމްޕެނީ މުބާރާތް އަންހެން ޑިވިޝަނަށް މި ބޭއްވީ ވެސް ގިނަ އަހަރުތަކަކަށް ފަހު އެވެ.
