އެމެރިކާގެ ކުރީގެ ރައީސް ޑޮނަލްޑް ޓްރަމްޕް އަންހެނަކަށް ޖިންސީ ގޯނާކުރި ކަމަށް މަދަނީ މިންގަނޑުން ސާބިތުވެއްޖެ އެވެ.
ކުރީގެ ކޮލަމިސްޓު އީ ޖީން ކެރޯލް ތުހުމަތު ކުރާ ގޮތުގައި ޓްރަމްޕް އޭނާ ރޭޕްކުރީ 1990 ގެ އަހަރުތަކުގެ ތެރޭގަ އެވެ. މިހާރު ކެރޯލްގެ އުމުރުން 79 އަހަރެވެ.
އޭނާ ތުހުމަތު ކުރާ ގޮތުގައި ޓްރަމްޕް އޭނާއަށް ޖިންސީ އަނިޔާ ކުރީ ނިއު ޔޯކްގެ ފިހާރައެއްގެ ތެރޭގަ އެވެ. އަހަރުތަކެއް ފަހުން އެ ވާހަކަ އާއްމުކޮށް ފަޅާއެރުވުމުން، ޓްރަމްޕް އޭނާގެ އަބުރު ކަތިލި ކަމަށް ވެސް ކެރޯލް ތުހުމަތު ކުރެ އެވެ.
ގިނަ ގާނޫނީ މައްސަލަތަކާ ކުރިމަތިވެފައިވާ ޓްރަމްޕް އެ ތުހުމަތު ދޮގުކުރައްވަ އެވެ.
ކެރޯލް ނިއު ޔޯކްގެ ކޯޓަށް ހުށަހެޅި މަދަނީ މައްސަލަ ބެލި ޖޫރީއިން ނިންމީ ރޭޕް ސާބިތުނުވި ނަމަވެސް، ޖިންސީ ގޯނާ ސާބިތުވާ ކަމަށެވެ.
އޭގެ އިތުރުން ކެރޯލްގެ ތުހުމަތުތަކަކީ ދޮގެއް ކަމަށް ޓްރަމްޕް ވިދާޅުވުމުން، ކެރޯލްގެ އަބުރަށް އުނިކަން ލިބުނު ކަމަށް ވސް ޖޫރީއިން ނިންމި އެވެ.
މިއީ ޖިންސީ ގޯނާގެ މައްސަލައެއް ޓްރަމްޕްއާ ދެކޮޅަށް ނިންމި ފުރަތަމަ ފަހަރެވެ. ޖޫރީއިން ޓްރަމްޕްއަށް އެންގީ ބަދަލެއްގެ ގޮތުގައި ކެރޯލްއަށް ފަސް މިލިއަން ޑޮލަރު ދިނުމަށެވެ.
ޓްރަމްޕްގެ ވަކީލުން ވިދާޅުވީ ޖޫރީގެ ނިންމުން އިސްތިއުނާފު ކުރާނެ ކަމަށެވެ.
ލަގްޒަރީ ފިހާރައެއްގެ ފިޓިން ރޫމް ތެރޭގައި ޓްރަމްޕް، ކެރޯލް ރޭޕްކުރި ކަމަށް އެންމެ ފުރަތަމަ ބުނީ ނިއު ޔޯކް މެގެޒިންއިން 2019 ވަނަ އަހަރު ޝާއިއުކުރި ކެރޯލްގެ ފޮތެއްގަ އެވެ.
ޓްރަމްޕް އެކަން ދޮގުކުރެއްވުމުން ކެރޯލް 2019 ވަނަ އަހަރު ކޯޓަށް މައްސަލަ ވެއްދީ އަބުރަށް ގެއްލުންދީފައިވާ ކަމަށް ބުނެ އެވެ. އެކަމަކު ގާނޫނީ ހުރަސްތަކާ ހެދި މައްސަލަ ކުރިއަށް ނުދިޔަ އެވެ.
އެހެން ނަމަވެސް މިދިޔަ ނޮވެމްބަރު މަހު ނިއު ޔޯކްގައި އަމަލުކުރަން ފެށި އާ ގާނޫނެއްގެ ދަށުން، އެތައް އަހަރެއް ކުރިން ޖިންސީ އަނިޔާ ލިބިފައިވާ މީހުންނަށް، ކޯޓަށް މައްސަލަ ވެއްދުމަށް އެއް އަހަރުގެ މުއްދަތެއް ލިބެ އެވެ.
