ހަމްބޯ ކޮރެއާއިން ހުޅުމާލޭގައި އިމާރާތްކުރަމުން އަންނަ ކޭޕާކް ރެސިޑެންސް ވިއްކުމުގެ ތެރެއިން މަކަރު ހަދައި އޮޅުވާލީ އޭނާ ނޫން ކަމަށާއި އެކަން ކުރަނީ ކުންފުނީގެ ޗައިނާ ޕާޓްނަރު ކަމަށް ހަސަން މަމްދޫހު މިއަދު ބުނެފި އެވެ.
ކޭޕާކު ޕްރޮޖެކްޓުގެ މަސައްކަތް ކުރަނީ ކޮރެއާގެ ހަމްބޯ ކުންފުންޏާ ގުޅިގެން އުފެއްދި ހަންބޯ މޯލްޑިވްސްއިންނެވެ. އެ ކުންފުނީގެ 95 ޕަސެންޓު ހިއްސާ އޮންނަނީ ޗައިނާ ރައްޔިތެއް ކަމަށްވާ ޖިން ޝީ ހޫގެ އަތުގ އެވެ. މަމްދޫގެ އޮންނަނީ ކުންފުނީގެ ފަސް ޕަސެންޓު ހިއްސާ އެވެ.
ކޭޕާކު މައްސަލާގައި މަމްދޫހަށް ގިނަ ތުހުމަތުތަކެއްކޮށް އޭނާގެ ތަހުގީގު ފަށާފައިވަނިކޮށް މިއަދު ނެރުނު ނޫސްބަޔާނެއްގައި އޭނާ ބުނީ ހަންބޯ މޯލްޑިވްސްގެ އެމްޑީގެ މަގާމުގައި ހުރި ޗައިނާގެ ރައްޔިތެއް ކަމަށްވާ ޖިން ޝީހޫ އޭނާގެ އަބުރު ކަތިލުމަށް މަސައްކަތް ކުރަމުންދާ ކަމަށެވެ.
އެގޮތައް ކަންކުރަނީ ޖިން ޝީހޫގެ ރޭވުމުގެ މަތިން ކޭޕާކު ފުލެޓުތައް ވިއްކައިގެން ލިބުނު ފައިސާއާއެކު ރާއްޖެއިން ފިލުމަށް ކުރި މަސައްކަތް މަމްދޫހު ނާކާމިޔާބު ކޮށްލުމުން ކަމަށް ވެސް އޭނާ ބުނެ އެވެ.
އޭގެ އިތުރުން ހަންބޯ މޯލްޑިވްސް ކުންފުންޏަކީ ކޭޕާކު ފުލެޓުތަކުގެ މަސައްކަތަށް ލޯކަލް އެޖެންޓެއްގެ ގޮތުގައި ހަރަކާތްތެރިވުމަށް ހެދި ކުންފުންޏެއް ކަމަށާއި އެ މަޝްރޫއުގެ ވެރިފަރާތުގެ ހައިސިއްޔަތުން ހަންބޯ ކޮރެއާއަށް ލިބިދޭ ބައެއް ބާރުތައް ވަގުތީގޮތުން އެ ކުންފުނީގެ ބޯޑު ރިޒޮލިއުޝަނަކުން ލޯކަލް އެޖެންޓަށް ދީފައިވާ ކަމަށް ވެސް މަމްދޫހު ބުނެ އެވެ.
އެގޮތުން، ދީފައިވާ ބާރުތަކުގެ ތެރޭގައި ފުލެޓުތަކަށް ލިބޭ ފައިސާ ބަލައިގަތުން އޮތް ނަމަވެސް އެެއީ ލޯކަލް އެޖެންޓުގެ ފައިސާ ނޫން ކަމަށް ވެސް މަމްދޫހު ވަނީ ފާހަގަކޮށްފަ އެވެ.
ލޯކަލް އެޖެންޓުގެ ގޮތުން ހަންބޯ މޯލްޑިވްސް ހިންގުމުގައި އެ ކުންފުނީގެ 95 ޕަސެންޓު ހިއްސާދާރު ޖިން ޝީ ހޫގެ އެކައުންޓުން އަބަދުވެސް ހަރަކާތްތެރިވި ކަމަށާއ، އެކަމުގެ ހެކި އެބަހުރި ކަމަށް ވެސް މަމްދޫހު ބުންޏެވެ.
އޭގެ އިތުރުން ވެސް މަމްދޫހު ވަނީ ގިނަ ތުހުމަތުތަކެއް ޖިން ޝީހޫގެ މައްޗަށް ކޮށްފަ އެވެ. އެގޮތުން ހަންބޯ މޯލްޑިވްސްގެ 95 ޕަސެންޓު ހިއްސާއަށް ދައްކަން ކަމަށް އެއްބަސްވި ފައިސާ ނުދެއްކުމާއި އެ ކުންފުނީގެ ޝެއާ ސްޓްރަކްޗާއަށް ބަދަލުގެނެސް އިތުރު ހިއްސާދާރެއް އިތުރުކޮށް ކުންފުނީގެ ބޯޑުގެ ކޯރަމް ބަދަލުކޮށް މަމްދޫހު ކުންފުނިން ދުރުކުރަން މަސައްކަތް ކޮށްފައިވާ ކަމަށް ވެސް ވަނީ ތުހުމަތުކޮށްފަ އެވެ.
ކޭޕާކު ފުލެޓުތައް އެޅުމަށް ޖިން ޝީހޫގެ އަދި އޭނާގެ ކޮރެއާ ކުންފުނިން އެއްވެސް ހަރަދެއް ނުކުރާ ކަމަށާއި ފުލެޓުތައް އެޅުމަށް ބޭނުންކުރީ މީހުން އަތު ނެގި ފައިސާ ކަމަށާއި ކުންފުނީގެ އެހެން އިދާރީ ކަންކަންވެސް ކުރީ މަމްދޫހުގެ މަސައްކަތުން ކަމަށް އޭނާގެ ބަޔާނުގައިވެ އެވެ.
ހަންބޯ ކޮރެއާ އިން ނެރުނު ބަޔާނުގައި ފުލެޓުތައް ގަނެވިއްކުމުގެ އެއްބަސްވުމުގައި މަމްދޫހު ސޮއިކޮށްފައި ވަނީ، މައި ހިއްސާދާރު ޖިން ޝިހޫގެ ސޮއި ފޯޖުކޮށްގެން މަމްދޫހުގެ ވިޔަފާރި ޕާޓްނަރު ޖައިޝަން ސައީދަށް ދިން ކަމަށް ބުނާ ގަރާރެއް ބޭނުންކޮށްގެން ކަމަށް ބުނެފައިވީ ނަމަވެސް ސޮއި ފޯޖުކުރުމުގެ ތުހުމަތަށް މަމްދޫހުގެ ބަޔާނުގައި ޖަވާބުދީފައެއްނުވެ އެވެ.
މި މައްސަލާގައި ފުރިހަމަ ތަހުގީގެއް ކުރުމަށް އާބަންކޯއިން ފުލުހުންނަށް އެދިފައިވާއިރު، އިމިގްރޭޝަނުން މިހާރު ވަނީ މަމްދޫހަށް ރާއްޖެއިން ބޭރަށް ނުފުރޭނެގޮތަށް އޭނާގެ ޕާސްޕޯޓު ވެސް ހިފަހައްޓާފަ އެވެ.
އޭނާގެ ބަޔާން ނިންމާލަމުން މަމްދޫހު ބުނެފައިވަނީ އެކަމުގެ ތަހުގީގުގައި ދައުލަތުގެ ހުރިހާ އިދާރާއަކަށް ދޭންޖެހޭ ފުރިހަމަ އެއްބާރުލުން ދޭނެ ކަމަށާއި އަސްލު ހަގީގަތުގައި އާންމުންނަށް އޮޅުވާލަމުންދަނީ ޖިން ޝީހޫ އަދި އޭނާގެ ކޮރެއާ ކުންފުނިން ކަމަށެވެ.
titledesc
