މިހާރު ކުރިއަށްދާ އޮފީސް/ކޮމްޕެނީ ވޮލީބޯޅަ މުބާރާތުގައި ރޭ ކުޅުނު މެޗުން ސީދާ ތިން ސެޓުން މޯލްޑިވްސް ޕޯޓްސް ލިމިޓެޑް (އެމްޕީއެލް) ބަލިކޮށް މޯލްޑިވްސް ޕޮލިސް ސާވިސް އިން މޮޅުވުމުގެ ރެކޯޑް ދަމަހައްޓައިފި އެވެ.
އިއްޔެގެ ދެ މެޗަށް ފަހު ސެމީ ފައިނަލްގެ ޖާގަތައް ވަނީ ކަށަވަރުވެފަ އެވެ. އެ ގޮތުން ފަސް ޓީމު ވާދަކުރި ގްރޫޕް އޭގައި ބާކީ އެއް މެޗު އޮއްވައި، ސެމީން ޖާގަ ޔަގީންކުރީ ޕޮލިހާއި އާބަންކޯ އެވެ. މި ދެ ޓީމުގެ މެދުގައި ގްރޫޕްގެ އެއް ވަނަ ކަނޑައަޅަން ކުޅޭ މެޗު މިރޭ އޮންނާނެ އެވެ.
ގްރޫޕް ބީގެ ހުރިހާ މެޗެއް ނިމިފައިވާއިރު، ސެމީން ޖާގަ ހޯދީ ކުޅުނު ތިން މެޗުން ވެސް މޮޅުވި، މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް/ސިފައިން) އެވެ. އަނެއް ޖާގަ ލިބުނީ ވޭސްޓް މެނޭޖްމަންޓް ކޯޕަރޭޝަން (ވެމްކޯ) އަށެވެ.
ޕޮލިސް ޓީމުގެ ހިމާންޝޫ (ކ) އެމްޕީއެލްގެ ދެ ކުޅުންތެރިން ކައިިރިން ޝޮޓެއް ފޮނުވާލަނީ.--- ފޮޓޯ: މުހައްމަދު ޝާބިން/ އަދަދު
ހުޅުމާލޭ ޕާކް ވޮލީ ކޯޓުގައި ކުރިއަށްދާ މުބާރާތުގައި ރޭގެ މެޗުގެ ފުރަތަމަ ސެޓުގައި އެމްޕީއެލް އިން ކޮންމެ ވެސް ވަރެއްގެ ޗެލެންޖެއް ދިނެވެ. އެ ގޮތުން މި ސެޓު، ޕޮލިހުންނަށް ލިބުނީ ފަހު ވަގުތު ރަނގަޅު ހިތްވަރަކާ އެކު ކުޅެ، 28-26 އިންނެވެ. އިންޑިއާ ކުޅުންތެރިޔާ، ހިމާންޝޫ ތިޔާގީ މި މެޗުގައި ވެސް ޕޮލިހަށް ތަފާތު ދައްކައިދިންއިރު، ފަހު ދެ ސެޓު، އެ ޓީމުން ގެންދިޔައީ، 25-21 އާއި 25-10 އިންނެވެ.
ފަތުހުﷲ ވަހީދު (ފައްލޯ)ގެ ކޯޗުކަމުގައި ކުޅޭ ޕޮލިސް ޓީމަކީ މި ފަހަރުގެ މުބާރާތުގެ ކޮންމެ މެޗެއްގައި ވެސް އެއް ފެންވަރެއްގައި ރަނގަޅު ކުޅުމެއް ދައްކާ ޓީމެކެވެ. ގައުމީ ވޮލީ ޓީމުގެ ކުޅުންތެރިން ވެސް ހިމެނޭ ޕޮލިހުން މިރޭ އާބަންކޯއާ ދެކޮޅަށް ކުޅޭ މެޗަކީ ފޯރިގަދަވާނެ ކަމަށް ބެލެވޭ މެޗެކެވެ. މި މެޗު ކުރިން ޝެޑިއުލް ކުރެވުނު ދުވަހު ނުކުޅެވުނީ ވިއްސާރައިގެ ސަބަބުންނެވެ.
އާބަންކޯ މި ވަގުތު އޮތީ ގްރޫޕްގެ އެއް ވަނައިގަ އެވެ. އެ ޓީމުގައި ވެސް ގައުމީ ވޮލީ ޓީމުގެ ކުޅުންތެރިން ހިމެނޭއިރު، ޓީމަށް އިރުޝާދު ދެނީ ގިނަ ފަހަރުތަކެއް މަތިން ގައުމީ ވޮލީ ޓީމުގެ ހެޑް ކޯޗުކަން ކުރި މުހައްމަދު ސާޖިދު (ކާއްޓޭ) އެވެ.
ހަތަރު އަހަރުގެ މެދުކެނޑުމަކަށް ފަހު ބާއްވާ އޮފީސް ވޮލީބޯޅަ މުބާރާތުގެ މި ފަހަރުގެ ސެމީ ފައިނަލް ދެ މެޗު ޝެޑިއުލްކޮށްފައި އޮތީ އަންނަ ބުރާސްފަތި ދުވަހު ހަވީރާއި ރޭގަނޑު ކުޅޭ ގޮތަށެވެ. ފައިނަލް މެޗު ކުޅެން ރާވާފައި އޮތީ މި މަހު 14 ވަނަ ދުވަހުގެރޭގަ އެވެ.
