ތެހްރާން، އިރާން (މޭ 8) - ކީރިތި ގުރުއާން އަންދާލައި ކީރިތި ރަސޫލާއަށް ފުރައްސާރަ ކުރި ކަމަށް ސާބިތުވި ދެ މީހަކު އިރާނުގައި ދަންޖައްސައި މަރާލައިފި އެވެ.
އިރާން ޖުޑީޝަރީގެ މިޒާން އޮންލައިން ނިއުސް ވެބްސައިޓުގައި ބުނީ ސަދްރުﷲ ފަޒޭލީ ޒަރޭއީ އއި ޔޫސެފް މެހްރްދާދް ދަން ޖެއްސީ ހޯމަ ދުވަހުގެ ހެނދުނު ކަމަށެވެ.
އޭގެ ތެރެއިން އެކަކު އޭނާގެ ސޯޝަލް މީޑިއާ އެކައުންޓުގައި އިސްލާމްދީނަށް ފުރައްސާރަކޮށް ޕޯސްޓުތައް ކޮށްފައިވާ ކަމަށް އެއްބަސްވީ މާޗް 2021 ގަ އެވެ.
އެކަމަކު އިރާނުގައި ބަންދުގައި ތިބޭ މީހުންގެ އެފަދަ އިއުރިތާފުތަކާ މެދު އިންސާނީ ހައްގުތަކަށް މަސައްކަތް ކުރާ ގްރޫޕްތަކުން ހިތްހަމަނުޖެހެ އެވެ. އެއީ އަަނިޔާކޮށް، ބިރު ދައްކައި، ގަދަކަމުން ހޯދާ އިއުތިރާފެއް ކަމަށް ތުހުމަތުކުރެވެ އެވެ.
އެމްނެސްޓީ އިންޓަނޭޝަނަލުން ބުނީ ދުނިޔޭގައި ދެ ވަނައަށް އެންމެ ގިނައިން މަރުގެ ހުކުމް ތަންފީޒު ކުރާ ގައުމަކީ އިރާނެވެ. އެންމެ ގިނައިން މަރުގެ ހުކުމް ތަންފީޒު ކުރަނީ ޗައިނާގަ އެވެ.
އެގޮތުން މިދިޔަ އަހަރު އިރާނުގައި 582 މީހުން ދަން ޖެއްސި އެވެ. އެއީ 2015 ވަނަ އަހަރަށް ފަހު އެންމެ ގިނަ މީހުން ދަން ޖެއްސި އަހަރެވެ.
