އޮފީސް/ކުންފުނިތަކުގެ ވޮލީބޯޅަ މުބާރާތުގައި މިއަދު ހަވީރު ކުޅުނު މެޗުން ފިއުލް ސަޕްލައި މޯލްޑިވްސް (އެފްއެސްއެމް) އަތުން ތިން ސެޓުން މޮޅުވެ، ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ސެމީ ފައިނަލުގެ ޖާގަ ހޯދައިފި އެވެ.
ސެމީގެ ޖާގަތަށް ހޯދާފައި މި ވަނީ މޯލްޑިވްސް ނެޝަނަލް ޑިފެންސް ފޯސް (އެމްއެންޑިއެފް/ސިފައިން)، އާބަންކޯ، އަދި ވެމްކޯ އަށެވެ. މިރޭ 20:30 ކުޅޭ މެޗުގައި ޕޮލިހުން ބައްދަލުކުރާނީ މޯލްޑިވްސް ޕޯޓްސް ލިިމިޓެޑް (އެމްޕީއެލް)އާ އެވެ. މި މެޗުން މޮޅުވެގެން، ޕޮލިހަށް ސެމީ ފައިނަލް ކަށަވަރުކުރެވޭނެ އެވެ.
ހުޅުމާލޭ ޕާކް ވޮލީކޯޓުގައި މިއަދު ހަވީރު ކުޅުނު މެޗަށް ނުކުތްއިރު، ވެމްކޯ ޓީމުގެ ސެޓަރު، އަހުމަދު ޝިމާއު ޓީމުގައި ހިމެނެ އެވެ. އެކަމަކު، އަނިޔާގެ ސަބަބުން ކުރިން މެޗުގައި ނުފެނުނު ޖަވާމް އަލީ މި މެޗުގައި ވެސް ނުކުޅެ އެވެ. ވެމްކޯ ޓީމަށް ކުޅޭ ގައުމީ ޓީމުގެ ކެޕްޓަން، އަލީ ހުޒާމް (ހުޒަންޓެ) އާއި އިންޑިއާ ކުޅުންތެރިޔާ، ވިނީތު ކުމާރުގެ ރަނގަޅު ހަމަލާތަކެއް މި މެޗުގައި ފެނިގެންދިޔަ އެވެ.
އިބްރާހިމް ނިޒާރު (ބޮޑޭ)ގެ ކޯޗުކަމުގައި ކުޅޭ ވެމްކޯ ޓީމުން މި މެޗުގެ ސެޓުތައް ގެންދިޔައީ 25-22، 25-22 އަދި 25-20 އިންނެވެ.
އެފްްއެސްއެމް އަށް ވެސް މި މެޗުން މޮޅުވެގެން، ސެމީ ފައިނަލަށް ދިއުުމުގެ ފުރުސަތު އޮތެވެ. އެ ޓީމަށް ކުޅޭ ހަސަން ނިލާމް (ޕާޓޭ) އާއި ހުސެއިން ވިޝާމް (ބުޅިކެ)ގެ ފަރާތުން މި މެޗުގައި ރަނގަޅު ކުޅުމެއް ފެނުނު ނަމަވެސް ވެމްކޯގެ ރޫހު ރަނގަޅުވެ، ސެޓު ނިންމަން ލިބުނު ފުރުސަތުތަކުގެ ބޭނުން އެ ޓީމުން ރަނގަޅަށް ހިފީ އެވެ.
ހަތަރު ޓީމު ކުޅުނު ގްރޫޕް ބީގެ އެއް ވަނަ ހޯދީ ސައްތަ އިން ސައްތަ ރެކޯޑަކާ އެކު ނުވަ ޕޮއިންޓް ހޯދި ސިފައިންނެވެ. ދެ ވަަނައިގައި ނިންމި ވެމްކޯ އިން ހަ ޕޮއިންޓް ހޯދިއިރު، އެފްއެސްއެމް އަށް ލިބުނީ ތިން ޕޮއިންޓެވެ. ފުލުގައި ނިންމާލަން ޖެހުނު މޯލްޑިވްސް ކަރެކްޝަނަލް ސާވިސް އަށް ޕޮއިންޓެއް ނުލިބެ އެވެ.
ނުވަ ޓީމު ވާދަކުރާ އޮފީސް ވޮލީ މުބާރާތުގެ ގްރޫޕް ސްޓޭޖުގައި މިރޭ ކުޅޭ މެޗުގެ ފަހުން ދެން އޮތީ މާދަމާރޭ ކުޅޭ މެޗެވެ. އެއީ ވިއްސާރައިގެ ސަބަބުން ރީޝެޑިއުލް ކުރަން ޖެހުނު މެޗެކެވެ. އެ މެޗުގައި، ބައްދަލުކުރަނީ އާބަންކޯ އާއި ޕޮލިހެވެ.
ސެމީ ފައިނަލް ދެ މެޗު ޝެޑިއުލްކޮށްފައި އޮތީ އަންނަ ބުރާސްފަތި ދުވަހު ހަވީރާއި ރޭގަނޑުގަ އެވެ. ފައިނަލް މެޗު ކުޅެން ރާވާފައި އޮތީ މި މަހު 14 ވަނަ ދުވަހުގެރޭގަ އެވެ.
