މިހާރު ކުރިއަށްދާ އޮފީސް/ކުންފުނިތަކުގެ ވޮލީބޯޅަ މުބާރާތުގެ ސެމީ ފައިނަލުން މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް/ސިފައިން)، މޯލްޑިވްސް ޕޮލިސް ސާވިސް އަދި އާބަންކޯ އިން ޖާގަ ހޯދައިފި އެވެ.
ނުވަ ޓީމް ވާދަކުރަމުން އަންނަ ގްރޫޕް އޭގައި އާބަންކޯ ވަނީ ކުޅުނު ތިން މެޗުވެސް ކާމިޔާބުކޮށްފަ އެވެ. އެޓީމަށް ބާކީ އޮތީ ޕޮލިސް ކުލަބާ ދެކޮޅަށް ކުޅޭ މެޗެވެ. މި ގްރޫޕުގެ ދެވަނައިގައި އޮތީ ކުޅުނު ދެ މެޗު ކާމިޔާބުކޮށްފައި އޮތް ޕޮލިހެެވެ. އެ ޓީމަށް ބާކީ ދެ މެޗު އެބައޮތެވެ.
ގްރޫޕް ބީއަށް ބަލާއިރު އެއްވަނައިގައި އޮތީ ކުޅުނު ތިން މެޗުން މޮޅުވެފައިވާ އެމްއެންޑީއެފް އެވެ. ދެ ވަނަގައި އޮތީ އެފްއެސްއެމް އެވެ. ތިން ވަނައިގައި ވެމްކޯ އޮތްއިރު، ފުލުގައި އޮތީ ކަރެކްޝަންސް އެވެ. މި ގްރޫޕްގައި ބާކީ އޮތީ އެފްއެސްމް އާ ވެމްކޯ ވާދަކުރާ މެޗެވެ. މި މެޗުން މޮޅުވާ ޓީމަކަށް ސެމީގެ ޖާގަ ލިބޭއިރު ބަލިވާ ޓީމެއް ކަޓާނެ އެވެ.
މުބާރާތުގައި އެމްއެންޑީއެފް އެ ޓީމުގެ މޮޅުވުމުގެ ސިލްސިލާ ދެމެހެއްޓީ މޯލްޑިވްސް ކަރެކްޝަނަލް ސާވިސް އަތުން ސީދާ ތިން ސެޓުން މޮޅުވެގެންނެވެ. މެޗުގެ ސެޓުތައް އެޓީމުން ގެންދިޔައީ 25-16، 25-19 އަދި 25-23 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ އެމްއެންޑީއެފްގެ އާދަމް ނަސީމް (އެޑަމް) އެވެ.
ޕޮލިހުން ކުޅުނު ދެ ވަނަ މެޗު ކާމިޔާބުކުރީ އިއްޔެ ހަވީރު މޯލްޑިވްސް އެއާޕޯޓްސް ކޮމްޕެނީ ލިމިޓެޑާ ވާދަކޮށް ސީދާ ތިން ސެޓުންނެވެ. މެޗުގެ ސެޓުތައް އެޓީމުން ގެންދިޔައީ 25-15، 25-18 އަދި 25-15 އިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ ޕޮލިހުގެ އިންޑިއާ ކުޅުންތެރިޔާ ހިމާންޝޫ ތިޔާގީ އެވެ.
ރޭ ކުޅުނު ފަހު މެޗުގައި އާބަންކޯ އިން ވަނީ ސްޓެލްކޯ ބަލިކޮށް އެ ޓީމް މުބާރާތުން ކަޓުވާލައިފަ އެވެ. މި މެޗު ވެމްކޯ އިން ކާމިޔާބުކުރީ 3-1 ސެޓުންނެވެ. މެޗުގެ ފުރަތަމަ ސެޓު ސްޓެލްކޯ އިން 18-25 އިން ހޯދި ނަމަވެސް ޖެހިގެން އައި ތިން ސެޓު އާބަންކޯ އިން ކާމިޔާބުކުރީ 25-16، 25-20 އަދި 25-13 އިންނެވެ. މި މެޗުގައި ރާއްޖޭގެ ބާރު ޖެހުންތެރިޔާ އިސްމާއިލް ސާޖިދު (ކުޑަކާއްޓެ) އެކޭ އެއްގޮތަށް އާބަންކޯގެ ލަންކާ ކުޅުންތެރިޔާ ލަސިންދު ވެސް މޮޅު ކުޅުމެއް ދެއްކި އެވެ.
އޮފީސް/ކުންފުނިތަކުގެ މުބާރާތުގައި މިއަދު ދެ މެޗެއް ކުޅޭނެ އެވެ. މިއަދު ހަވީރު ކުޅޭ މެޗުގައި އެފްއެސްއެމްއާ ވެމްކޯ ވާދަކުރާނެ އެވެ. މިރޭ ކުޅޭ މެޗުގައި ޕޮލިސް ކުލަބު ނިކުންނާނީ އެމްޕީއެލްއާ ދެކޮޅަށެވެ.
ގްރޫޕް ސްޓޭޖުގެ ފަހު މެޗު އޮންނާނީ މާދަމާ ރޭ އެވެ. އެ މެޗުގައި ވާދަކުރާނީ ޕޮލިސް ކުލަބާއި އާބަންކޯ އެވެ.
މެއި 11 އަދި 12 ގައި ސެމީ ފައިނަލް މެޗުތައް ކުޅޭއިރު ފައިނަލް މެޗު އޮންނާނީ މެއި 14 ވަނަ ދުވަހު އެވެ.
