ގުދުސް (މޭ 7) - ހުޅަނގު އައްސޭރިއަށް ހަތިޔާރާއި ރަން ވަގަށް އެތެރެކުރަން އުޅުނުކަމުގެ ތުހުމަތުގައި އިޒްރޭލުން ހައްޔަރު ކުރި އުރުދުންގެ ޕާލަމެންޓު މެމްބަރު އުރުދުންއަށް ފޮނުވާލައިފި އެވެ.
އިމާދް އަދްވާން ހައްޔަރު ކުރީ އެޕްރީލް 22 ވަނަ ދުވަހު އުރުދުން އާއި ހުޅަނގު އައްސޭރިއާ ދެމެދު އޮންނަ ކިންގް ހުސެން ކްރޮސިން ހިސާބުންނެވެ. އެ ތަން ބަލަހައްޓަނީ އިޒްރޭލުންނެވެ.
އިޒްރޭލުގެ ސެކިއުރިޓީ ފައުޖުން ބުނީ އޭނާގެ ކާރުން 12 ރައިފަލް އާއި 194 ފިސްތޯލަ ފެނުނު ކަމަށެވެ. އިޒްރޭލުން އޭނާއާ ދެކޮޅަށް ދައުވާ ނުކޮށް، ނިންމީ އުރުދުންއާ ހަވާލުކުރުމަށެވެ.
އުރުދުންގެ ޕެޓްރާ ނިއުސް އެޖެންސީއިން ބުނީ އެ ގައުމުގެ ސްޓޭޓް ސެކިއުރިޓީ ކޯޓަށް އަދްވާން ހާޒިރުކޮށް ޝަރީއަތް ހިންގާނެ ކަމަށެވެ. އެ މައްސަލައިގައި ޝާމިލްވާ ކަމަށް ބެލެވޭ ބަޔަކު ވަނީ އިއުތިރާފުވެފަ އެވެ.
އިޒްރޭލުން އަދްވާން އުރުދުންއަށް ފޮނުވާލަން ނިންމުމާ އެކު އުރުދުންގެ ޕާލަމެންޓުން ނިންމީ ޕާލަމެންޓު މެމްބަރުންނަށް ލިބިދޭ ހާއްސަ ގާނޫނީ އިމްތިޔާޒް އޭނާއަށް ނުލިބޭ ގޮތް ހެދުމަށެވެ. އެއާއެކު، ތުހުމަތު ކުރެވޭ މައްސަލަތަކުގައި އޭނާއާ ދެކޮޅަށް ތަހުގީގުކޮށް ދައުވާ ކުރެވޭނެ އެވެ.
އިޒްރޭލުގެ ޖާސޫސީއ އިދާރާއިން ބުނީ ފެބްރުއަރީ 2022 އިން ފެށިގެން 12 ފަހަރެއްގެ މަތިން އަދްވާން ވަނީ އެކި ތަކެތި ވަގަށް ހުޅަނގު އައްސޭރިއަށް އެތެރެކޮށްފައި ކަމަށެވެ.
ފައިސާގެ ދަހިވެތިކަމުގައި ހަތިޔާރު ވަގަށް އުފުލަން ފެށީ 2023 ވަނަ އަހަރުގެ ތެރޭގައި ކަމަށް އެ އިދާރާއިން ނެރުނު ބަޔާނުގައި ބުންޏެވެ.
އުމުރުން 35 އަހަރުގެ އަދްވާންއަކީ އުރުދުންގެ ޕާލަމެންޓުގައި އޮންނަ ފަލަސްތީނުގެ ކަންކަމާ ބެހޭ ކޮމިޓީގެ މެމްބަރެކެވެ.
ހުޅަނގު އައްސޭރިއަކީ 1967 ވަނަ އަހަރުން ފެށިގެން އިޒްރޭލުން ގާނޫނާ ހިލާފަށް ވެރިކޮށްގެން އުޅޭ ފަލަސްތީނުގެ ބިމެކެވެ. އުރުދުންއިން އިޒްރޭލާ އެކު ޑިޕްލޮމެޓިކް ގުޅުން ގާއިމްކުރީ 1994 ވަނަ އަހަރު އެވެ.
