އޮފީސް/ކުންފުނިތަކުގެ ވޮލީބޯޅަ މުބާރާތުގައި ރޭ މޯލްޑިވްސް ކަރެކްޝަނަލް ސާވިސް އަތުން މޮޅުވެ، ފިއުލް ސަޕްލައި މޯލްޑިވްސް (އެފްއެސްއެމް) އިން މުބާރާތުގައި ކުރިއަށްދިއުމަށް މުހިންމު ކާމިޔާބެއް ހޯދައިފި އެވެ.
ފުރަތަމަ މެޗުން ތިން ސެޓުން، މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް/ސިފައިން) އަތުން ބަލިވި އެފްއެސްއެމް އިން ރޭ ވަނީ ކަރެކްޝަން ކައިރީގައި މޮޅަށް ކުޅެ، ސީދާ ތިން ސެޓުން މެޗު ކާމިޔާބުކޮށްފަ އެވެ. މެޗުގެ ސެޓުތައް ދިޔައީ 25-23، 25-16 އަދި 25-22 އިންނެވެ.
ހުޅުމާލޭ ޕާކް ވެލި ކޯޓުގައި ކުރިއަށްދާ އޮފީސް މުބާރާތުގައި ރޭ އެފްއެސްއެމް މޮޅުކޮށްދޭން އެންމެ ރަނގަޅު ކުޅުމެއް ދެއްކީ ސެޓަރު، ހުސެއިން ވިޝާމް (ބުޅިކެ) އާއި އެޓޭކަރު ހަސަން ނިލާމް (ޕާޓޭ) އެވެ. އެ ޓީމުގައި ދެން ހިމެނޭ މުހިންމު ކުޅުންތެރިންގެ ތެރޭގައި، ޒުވާން ކުޅުންޔެރިޔާ މާއިދު މުހައްމަދު ހަލީލް (މާއިދު ލޯންގޭ) އާއި ޕާކިސްތާންގެ މުބައްޝަރު ރަޒާ ހިމެނެ އެވެ.
އެފްއެސްއެމްގެ ޕާޓޭ ރޭގެ މެޗުގެ ތެރެއިން ޝޮޓެއް ފޮނުވާލަނީ.--- ފޮޓޯ: މުހައްމަދު ޝާބިން/އަދަދު
ހަތަރު ޓީމު ވާދަކުރާ ގްރޫޕް ބީގެ އެއް ވަނައިގައި އޮތީ ދެ މެޗުން ވެސް މޮޅުވި ސިފައިންނެވެ. ދެ ވަނައިގައި އޮތް އެފްއެސްއެމް އާއި ވެމްކޯ އަށް ވެސް ވަނީ މޮޅެއް ލިބިފަ އެވެ. ދެ މެޗުން ވެސް ބަލިވި ކަރެކްޝަން އަށް މިހާރު ވަނީ ގަދަ ދެ ޓީމުގެ ތެރޭގައި ހިމެނިގެން ސެމީ އަށް ދިއުމުގެ ފުރުސަތު ގެއްލިފަ އެވެ.
މުބާރާތުގައި އިއްޔެ ހަވީރު ކުޅުނު ގްރޫޕް އޭގެ ސްޓެލްކޯ އާއި އާބަންކޯއާ ބައްދަލުކުރި މެޗު ވަނީ ދެ ވަނަ ސެޓާ ހަމައިން ހުއްޓާލަން ޖެހިފަ އެވެ. އެއީ އިއްޔެ ހަވީރު ކުރި ވިއްސާރައިގެ ސަބަބުންނެވެ. މެޗު ހުއްޓާލިއިރު ފުރަތަމަ ސެޓު އާބަންކޯ އިން އޮތީ ގެންގޮސްފަ އެވެ. އެކަމަކު، ދެ ވަނަ ސެޓު ފަށައިގެން ހުއްޓާލަން ޖެހުނުއިރު، ލީޑުގައި އޮތީ ސްޓެލްކޯ އެވެ.
އާބަންކޯ އާއި ސްޓެލްކޯ އަކީ ފަސް ޓީމު ވާދަކުރާ ގްރޫޕްގެ އެންމެ ކުރީގައި އޮތް ދެ ޓީމެވެ. މި ދެ ޓީމު ކުޅޭ މެޗު އަލުން ރީ ޝެޑިއުލްކޮށްފައިވަނީ މިއަދު ކުޅޭ ތިން ވަނަ މެޗުގެ ގޮތުގަ އެވެ. މި މެޗު ފަށާނީ 22:00ގަ އެވެ. އޭގެ ކުރިން އޮތީ، މިއަދު ހަވީރު، 16:30 ގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި މޯލްޑިވްސް ޕޮލިސް ސާވިސް ކުޅޭ މެޗާއި މިރޭ 20:00 ޖަހާއިރު، ސިފައިންނާއި ކަރެކްޝަންސް ކުޅޭ މެޗެވެ.
