އޮފީސް/ކުންފުނިތަކުގެ ވޮލީބޯޅަ މުބާރާތުގައި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް/ސިފައިން) އިން ކުޅުނު ދެ ވަނަ މެޗު ވެސް ކާމިޔާބުކޮށް ސެމީގެ ފުރުސަތު ބޮޑުކުރިއިރު، މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ފުރަތަަމަ މޮޅު ހޯދައިފި އެވެ.
ހަތަރު ޓީމު ހިމެނޭ ގްރޫޕް ބީގެ އެއް ވަނައިގައި މި ވަގުތު އޮތީ ދެ މެޗުވެސް ކާމިޔާބުކުރި އެމްއެންޑީއެފް އެވެ. ދެ ވަނައިގައި ވެމްކޯ އޮތްއިރު، ފުލުގައި އޮތް ދެ ޓީމު ކަމަށްވާ މޯލްޑިވްސް ކަރެކްޝަނަލް ސާވިސް ފިއުލް ސަޕްލައި މޯލްޑިވްސް (އެފްއެސްއެމް) އަށް ޕޮއިންޓެއް ނުލިބެ އެވެ.
ގްރޫޕް އޭގެ އެއް ވަނައިގައި އޮތީ ދެ މެޗުން މޮޅުވި އާބަންކޯ އެވެ. ދެ ވަނަގައި ތިން މެޗުގެ ތެރެއިން ދެ މެޗުން މޮޅުވި ސްޓެލްކޯ އޮތްއިރު، އެއް މެޗު ކުޅެ އެ މެޗު ކާމިޔާބުކުރި ޕޮލިސް އޮތީ ތިން ވަނައިގަ އެވެ. އެމްޕީއެލު ކުޅުނު ތިން މެޗުގެ ތެރެއިން އެއް މެޗު ކާމިޔާބުކޮށްފައިވާއިރު، ފުލުގައި އޮތް އެއާޕޯޓަށް އަދި ޕޮއިންޓެއް ނުލިބެ އެވެ. އެ ޓީމު ވަނީ ކުޅުނު ތިން މެޗުން ވެސް ބަލިވެފަ އެވެ.
މުބާރާތުގައި އިއްޔެ ހަވީރު ކުޅުނު މެޗު އެމްއެންޑީއެފް އިން ކާމިޔާބުކުރީ ސީދާ ތިން ސެޓުންނެވެ. ވަދުގަދަކޮށް މި މުބާރާތަށް ތައްޔާރުވި ވެމްކޯގެ އަތުން ފުރަތަމަ ދެ ސެޓު އެމްއެންޑީއެފުން ހޯދީ 25-20 އިންނެވެ. ފަހު ސެޓު ހޯދީ 25-19 އިންނެވެ. މި މެޗުގެ މޮޅު ކުޅުންތެރިޔާގެ މަގާމް ހޯދީ އެމްއެންޑީއެފްގެ ސްރީ ލަންކާ ކުޅުންތެރިޔާ ކަވިޝްކަ މަދުޝަންކާ ވަނީ ބާރު ގިނަ ހަމަލާތަކެއް ފޮނުވާލައިފަ އެވެ.
އަނިޔާގެ ސަބަބުން ވެމްކޯ ޓީމުގެ ޖަވާމް އަލީ އަށް އިއްޔެ މެޗުގައި ނުކުޅެވެ އެވެ. އަދި ވެމްކޯގެ ސެޓަރު، އަހުމަދު ޝިމާއު ވެސް މި މެޗުގައި ނުފެނެ އެވެ.
ރޭ ކުޅުނު މެޗު، އެމްޕީއެލް އިން ކާމިޔާބުކުރީ އެއާޕޯޓްސް އާ ވާދަކޮށް 3-1 ސެޓުންނެވެ. މި މެޗުގެ ފުރަތަމަ ދެ ސެޓު އެމްޕީއެލް އިން ކާމިޔާބުކުރީ 25-20 އަދި 25-14 އިންނެވެ. ޖެހިގެން އައި ސެޓު ވާދަވެރި ކުޅުމަކަށް ފަހު 27-29 އިން އެއާޕޯޓުން ހޯދި އެވެ. ނަމަވެސް، އަޝްފާގު އާދަމް (އައްކަޅޭ) އާއި އަލީ އާމިރު (ދިގު އައްޔަ)ގެ މޮޅު ކުޅުމާ އެކު އެމްޕީއެލުން 25-19 އިން ޖެހިގެން އައި ސެޓު ކާމިޔާބުކޮށް މެޗު ކާމިޔާބުކުރި އެވެ.
މުބާރާތުގައި މިއަދުވެސް ދެ މެޗެއް ކުޅޭނެ އެވެ. މިއަދު ހަވީރު ކުޅޭ މެޗުގައި ވާދަކުރާނީ އާބަންކޯ އާއި ސްޓެލްކޯ އެވެ. މިރޭ ކުޅޭނީ އެފްއެސްއެމް ނުކުންނާނީ ކަރެކްޝަންސް އާ ދެކޮޅަށެވެ.
