މިހާރު ކުރިއަށްދާ އޮފީސް/ކުންފުނިތަކުގެ ވޮލީބޯޅަ މުބާރާތުގައި އިއްޔެ ހަވީރު ކުޅުނު މެޗުން މޯލްޑިވްސް ޕޯޓްސް ލިމިޓެޑް (އެމްޕީއެލް) އަތުން ސީދާ ތިން ސެޓުން މޮޅުވެ، ސްޓެލްކޯ އިން ސެމީ ފައިނަލަށް ދިއުމުގެ އުންމީދު ދަމަހައްޓައިފި އެވެ.
މުބާރާތުގެ ގްރޫޕް އޭގައި ފަސް ޓީމު ހިމެނޭއިރު، ސްޓެލްކޯ އިން ވަނީ މިހާތަނަށް ކުޅުނު ތިން މެޗުގެ ތެރެއިން ދެ މެޗުން މޮޅުވެފަ އެވެ. އެއީ ފުރަތަމަ މެޗުން މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި އިއްޔެ ހަވީރު އެމްޕީއެލް އަތުންނެވެ. ސްޓެލްކޯ ބަލިވީ މޯލްޑިވްސް ޕޮލިސް ސާވިސް އަތުންނެވެ.
އިއްޔެ ހަވީރު ހުޅުމާލޭ ޕާކް ވޮލީ ކޯޓުގައި ވިއްސާރައިގެ ތެރޭގައި ކުޅެން ޖެހުނު މެޗުން އެމްޕީއެލް އަތުން ސްޓެލްކޯ ކުރި ހޯދީ 27-25، 26-24 އަދި 25-23 އިންނެވެ.
ސްޓެލްކޯގެ ކުޅުންތެރިން އިއްޔެގެ މެޗުގެ ތެރެއިން އުފާފާޅުކުރަނީ.--- ފޮޓޯ: މުހައްމަދު ޝާބިން/ އަދަދު
ކޮންމެ ސެޓެއް ވެސް ފޯރިގަދަކޮށް ނިމުނު މި މެޗުގައި، ސްޓެލްކޯ މޮޅުކޮށްދޭން އެންމެ އިސް ރޯލެއް އަދާކުރީ އެ ޓީމުގެ ބިދޭސީ ކުޅުންތެރިޔާ، ގަގަންދީޕް ސިންގް އެވެ.
ގްރޫޕް އޭގައި ރޭ ކުޅެން އޮތް ޕޮލިހާއި އާބަންކޯ ބައްދަލުކުރާ މެޗު ވަނީ ވިއްސާރައިގެ ސަބަބުން ފަސްކޮށްފަ އެވެ. އާބަންކޯ އިން ވަނީ މުބާރާތުގައި ކުޅުނު ފުރަތަމަ ދެ މެޗުން މޮޅުވެފަ އެވެ. އެއީ އެމްއޭސީއެލް އާއި އެމްޕީއެލް އަތުންނެވެ. ޕޮލިސް ވެސް ވަނީ އެ ޓީމު ކުޅުނު މެޗުން، ސްޓެލްކޯ އަތުން މޮޅުވެފަ އެވެ. އާބަންކޯ އާއި ޕޮލިހަކީ މި ގްރޫޕުން ސެމީގެ ޖާގަ އަށް އެންމެ ބޮޑަށް މަސައްކަތް ކުރާނެ ދެ ޓީމެވެ.
މުބާރާތުގައި މިއަދު ހަވީރު އޮތީ ގްރޫޕް ބީގައި ވެމްކޯ އާއި މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ކުޅޭ މެޗެވެ. އެ މެޗު ފަށަން އޮތީ 16:30 ގަ އެެވެ. މިރޭ ކުޅޭ މެޗުގައި އެމްއޭސީއެލް ކުޅޭނީ އެމްޕީއެލްއާ އެވެ. އެ މެޗު ފަށަން ޝެޑިއުލްކޮށްފައިވަނީ 20:30 ގަ އެވެ.
