މިހާރު ކުރިއަށްދާ އޮފީސް/ކުންފުނިތަކުގެ ވޮލީބޯޅަ މުބާރާތުގައި އާބަންކޯ އިން ކުޅުނު ދެ ވަނަ މެޗުން ވެސް މޮޅުވެ، ވަރުގަދަ ފެށުމާ އެކު ކުރިއަށްދިޔައިރު، ވެމްކޯ އިން ކަރެކްޝަނަލް ސާވިސް އަތުން މޮޅުވެ، ވެމްކޯ އިން މޮޅަކުން މުބާރާތް ފަށައިފި އެވެ.
އިއްޔެ ހަވީރު ކުޅުނު ގްރޫޕް އޭގެ މެޗުން އާބަންކޯ ވަނީ ސީދާ ތިން ސެޓުން މޯލްޑިވްސް އެއާޕޯޓްސް ކޮމްޕެނީ ޕްރައިވެޓް ލިމިޓެޑް (އެމްއޭސީއެލް) އަތުން ބަލިވެފަ އެވެ. އެމްއޭސީއެލް ވަނީ ފުރަތަމަ މެޗުން ސްޓެލްކޯ އަތުން ވެސް ބަލިވެފަ އެވެ. އާބަންކޯ އިން ފުރަތަމަ މެޗުގައި ވަނީ މޯލްޑިވްސް ޕޯޓްސް ލިމިޓެޑް (އެމްޕީއެލް) އަތުން މޮޅުވެފަ އެވެ.
އާބަންކޯ އިން އިއްޔެގެ މެޗުގެ ސެޓުތައް ގެންދިޔައީ 25-16، 25-13 އަދި 25-19 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ އާބަންކޯ ޓީމަށް ކުޅޭ ޒުވާން ކުޅުންތެރިޔާ، ޝަމާއިލް ހުސެއިން އެވެ.
އޮފީސް މުބާރާތަށް އެންމެ ރަނގަޅަށް ތައްޔާރުވި އާބަންކޯ ޓީމަށް އަމިއްލަ ބާރުގައި ސެމީ ފައިނަލަށް ދިއުމުގެ ފުރުސަތު އޮތީ ފަހިވެފަ އެވެ. އެ ޓީމުގެ ކޯޗަކަށް ހުރީ މުހައްމަދު ސާޖިދު (ކާއްޓޭ) އެވެ.
މުބާރާތުގެ ގްރޫޕް ބީގައި ރޭ ކުޅުނު މެޗުގައި ވެމްކޯ އިން ކަރެކްޝަންސް ބަލިކުރީ 3-1 ސެޓުންނެވެ. ގައުމީ ކެޕްޓަން، އަލީ ހުޒާމް (ހުޒަންޓެ) ހިމެނޭ ވެމްކޯ ޓީމުން 25-20، 25-22 އިން ފުރަތަމަ ދެ ސެޓު ގެންގޮސްފައިވަނިކޮށް، ކަރެކްޝަންސް އިން ވަނީ ތިން ވަނަ ސެޓު، 17-25 އިން ގެންގޮސް، އުންމީދެއް ހޯދައިފަ އެވެ. އެހެން ނަމަވެސް ހަތަރު ވަނަ ސެޓު، 25-19 އިން ގެންގޮސް، ވެމްކޯ މެޗުން މޮޅުވީ އެވެ. މުހިންމު ވަގުުތުތަކުގައި ތަފާތު ދައްކައި، ވެމްކޯ އަށް ގިނަ ޕޮއިންޓްތަކެއް ހޯދައިދިން އިންޑިއާގެ ވިނީތު ކުމާރް އަކީ މި މެޗުގެ މޮޅު ކުޅުންތެރިޔާ އެވެ.
މިއަދު ހަވީރު 16:30 ގައި ކުޅޭ މެޗުގައި ސްޓެލްކޯ ބައްދަލުކުރާނީ އެމްޕީއެލްއާ އެވެ. އަދި މިރޭ 20:30 ގައި ޕޮލިސް ކުޅޭނީ އާބަންކޯއާ އެވެ. ޕޮލިސް ކުޅުނު ފުރަތަމަ މެޗުން ވަނީ ސްޓެލްކޯ ބަލިކޮށްފަ އެެވެ.
