ހުޅުމާލޭ ވޮލީ ކޯޓުގައި މިހާރު ކުރިއަށްދާ އޮފީސް/ކުންފުނިތަކުގެ ވޮލީބޯޅަ މުބާރާތުގައި މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް/ސިފައިން) އާއި މޯލްޑިވްސް ޕޮލިސް ސާވިސް އިން ކުޅުނު ފުރަތަމަ މެޗުތަކުން މޮޅުވެއްޖެ އެެވެ.
އިއްޔެ ހަވީރު ކުޅުނު ގްރޫޕް ބީގެ މެޗުން ސިފައިން ވަނީ ސީދާ ތިން ސެޓުން ފިއުލް ސަޕްލައި މޯލްޑިވްސް (އެފްއެސްއެމް) ބަލިކޮށްފަ އެވެ. މި މެޗުގެ ސެޓުތައް ސިފައިން ގެންދިޔައީ 25-20، 25-20 އަދި 25-18 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ ސިފައިންގެ ޓީމަށް ކުޅޭ ގައުމީ ވޮލީބޯޅަ ޓީމުގެ ސެޓަރު، ހުސެއިން ޝާހިދު (ޝާޑު) އެވެ.
މި މެޗުގައި ސިފައިންގެ ޓީމުގެ ޝާޑު ދިން ބޯޅަތަކުގެ ބޭނުންހިފައި، މުހިންމު ވަގުތުތަކުގައި ސިފައިންގެ ޓީމުގެ ދެ އެޓޭކަރުން ކަމަށްވާ ހުސެއިން ރަޒާން އާއި އާދަމް ނަސީމް (އެޑަމް) ވަނީ މޮޅު ކުޅުމެއް ދައްކައިފަ އެވެ. ގައުމީ ބީޗް ވޮލީ ޓީމުގައި ހިމެނޭ އެޑަމް އަށް މި މުބާރާތް ކުޅެން ފުރުސަތު ދިނީ ވަޒީފާ އަދާކުރާ އޮފީހަށް އެއް މުބާރާތް ކުޅެލަން ހުއްދަ ދޭ ގޮތަށް ކަނޑައެޅި އުސޫލެެއްގެ ތެރެއިން ކަމަށް ވޮލީބޯލް އެސޯސިއޭޝަނުން މައުލޫމާތު ދެ އެވެ.
ސްޓެލްކޯ ވަނީ މުބާރާތުގައި ކުޅުނު ފުރަތަމަ މެޗުގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް އަތުން މޮޅުވެފަ އެވެ. އެކަމަކު، ޕޮލިސް އަތުން ރޭ ސްޓެލްކޯ އަށް ކާމިޔާބު ލިބޭ ގޮތެއްނުވި އެވެ.
ފޯރިގަދަ ކުޅުމަކަށް ފަހު، މެޗުން ޕޮލިސް މޮޅުވީ 3-1 ސެޓުންނެވެ. މެޗުގެ ފުރަތަމަ ދެ ސެޓު، 25-17، 25-18 އިން ޕޮލިހުން ގެންދިޔައިރު، ސްޓެލްކޯ އިން ވަނީ ހިތްވަރުކޮށް، ތިން ވަނަ ސެޓު 24-26 އިން ގެންގޮސްފަ އެވެ. ހަތަރު ވަނަ ސެޓު، 25-16 އިން ގެންގޮސް ޕޮލިސް މެޗުން މޮޅުވީ އެވެ. މެޗުގެ މޮޅު ކުޅުންތެރިއަކީ، ޕޮލިސް ޓީމުގެ ހިމާންޝޫ ތިޔާގީ އެވެ.
މުބާރާތުގައި މިއަދު ހަވީރު ކުޅޭ މެޗުގައި އާބަންކޯ ބައްދަލުކުރާނީ އެމްއޭސީއެލްއާ އެވެ. އެ މެޗު ފަށާނީ 16:30 ގަ އެެވެ. މިރޭ، 20:30 ގައި ފަށާ ކްލަބް ވެމްކޯ ބައްދަލުކުރާނީ މޯލްޑިވްސް ކަރެކްޝަނަލް ސާވިސްއާ އެވެ.
