ދިމިޝްކު، ސީރިއާ (މޭ 2) - ހޯމަ ދުވަހުގެ ދަންވަރު އިޒްރޭލުން ސީރިއާގެ އުތުރު އަލެޕޯ ޕްރޮވިންސަށް ދިން ވައިގެ ހަމަލާތަކެއްގައި ސިފައިންގެ މީހަކު މަރުވެ، އެއާޕޯޓު ހުއްޓުމަކަށް އައިސްފި އެވެ.
ސީރިއާގެ ދައުލަތުގެ މީޑިއާއިން ބުނީ ސިފައިންގެ މީހަކު މަރުވި އިރު، ހަތް މީހުންނަށް އަނިޔާވި ކަމަށެވެ. އަނިޔާވި މީހުންގެ ތެރޭގައި އާއްމުންގެ ދެ މީހުން ހިމެނެ އެވެ.
އޭގެ އިތުރުން އަލެޕޯ އިންޓަނޭޝަނަލް އެއާޕޯޓުގެ އޮޕަރޭޝަންތައް ހުއްޓުމަކަށް ގެންނަން މަޖުބޫރުވި އެވެ. ދައުލަތުގެ ސަނާ ނިއުސް އެޖެންސީއިން ބުނީ ގިނަ މިސައިލްތަކެއް ފޮނުވި ކަމަށެވެ.
ސީރިއަން އޮބްޒަވޭޓަރީ ފޯ ހިޔުމަން ރައިޓްސްއިން ބުނީ އަލެޕޯ އެއާޕޯޓާއި ނައިރަބް އަސްކަރީ އެއާފީލްޑް ހުންނަ ސަރަހައްދުގައި ގިނަ ގޮވުންތަކެއް ގޮވި ކަމަށެވެ.
ސީރިއާގެ ދާހިލީ ހަމަނުޖެހުމަށް 10 އަހަރު ފުރިފައިވާ އިރު، އިޒްރޭލުން ދަނީ ގަވާއިދުން އެކި ޓާގެޓުތަކަށް ވައިގެ ހަމަލާ ފޮނުވަމުންނެވެ. އިޒްރޭލުން ބުނަނީ ހަމަލާ ދެނީ އިރާނުގެ އެހީއާ އެކު އުޅޭ ފައުޖަށް ކަމަށެވެ.
އިރާނުން ސީރިއާގައި އެހީ ފޯރުކޮށްދެނީ ރައީސް ބަައްޝާރުލް އަސަދުގެ ސިފައިންނަށެވެ. އިދިކޮޅު ގްރޫޕްތަކުގެ އަތުން 2016 ވަނަ އަހަރު އަލެޕޯގެ ކޮންޓްރޯލް ހޯދަން އިރާނުން ބޮޑު އެހީތެރިކަމެއް ފޯރުކޮށްދިނެވެ.
