ރާމަﷲ، ފަލަސްތީން (މޭ 2) - ގާނޫނާ ހިލާފަށް އިޒްރޭލުގެ ޖަލެއްގައި ބަންދުކޮށްފައި ހުރުމާ ދެކޮޅަށް ބަނޑުހައި ހޫނުކަމުގެ ހަޅުތާލު ކުރަމުން ދިޔަ ފަލަސްތީނު މީހާ މަރުވެއްޖެ އެވެ.
"ގައުމީ ސަލާމަތަށް ނުރައްކާ ވާތީ ހައްޔަރުކޮށްފައި ހުރި މީހަކު، މި އަހަރުގެ ފެބްރުއަރީ ފަސް ވަނަ ދުވަހު ބަނޑުހައި ހޫނުކަމުގެ ހަޅުތާލެއް ފެށުމަށް ފަހު، ހާލަތު ގޯސްވެގެން، މިއަދު ހެނދުނު ވަނީ މަރުވެފައި،" އިޒްރޭލުގެ ޖަލުތަކާ ބެހޭ އިދާރާއިން ނެރުނު ބަޔާނެއްގައި ބުންޏެވެ.
އެ ބަޔާނުގައި ބުނީ އެއީ އިސްލާމިކް ޖިހާދް "ޓެރަރިސްޓް" ގްރޫޕުގެ މެމްބަރެއް ކަމަށެވެ. އިޒްރޭލުން ގާނޫނާ ހިލާފަށް ހުޅަނގު އައްސޭރި ވެރިކޮށްގެން އުޅޭތީ، ފަލަސްތީނު މީހުންގެ ހައްގުގައި ހަރަކާތްތެރިވާ އިސްލާމިކް ޖިހާދު ގްރޫޕުން ވެސް ވަނީ އުމުރުން 45 އަހަރުގެ ހާދިރް އަދްނާން މަރުވިކަން ކަށަވަރުކޮށްދީފަ އެވެ.
އިސްލާމިކް ޖިހާދުން ބުނީ އަދްނާން ހައްޔަރު ކުރީ ފެބްރުއަރީ ފަސް ވަނަ ދުވަހު އިޒްރޭލުގެ ސިފައިން ކަމަށެވެ. ބަންދުކޮށްފައި ހުރީ އެއްވެސް ދައުވާއެއް ނުކޮށް މުއްދަތެއް ނެތް ގޮތަށެވެ.
އަދްނާންގެ އަންހެނުން ރަންދާ މޫސާ މި ހަފުތާގެ ކުރީކޮޅު ކަންބޮޑުވުން ފާޅުކޮށް އޭއެފްޕީއަށް ބުނީ އަދްނާން ހައްޔަރުކޮށްފައި ހުރީ ރަމްލާ ޖަލުގެ ކްލިނިކެއްގައި ކަމަށެވެ.
"އާއްމު ހޮސްޕިޓަލަށް އޭނާ ބަދަލު ކުރަން އިޒްރޭލުން ދެކޮޅު ހަދާ. ގާނޫނީ ވަކީލެއް ޒިޔާރަތް ކުރުމުގެ ފުރުސަތު ދޭން ވެސް ދެކޮޅު ހަދާ،" ރަންދާ ބުންޏެވެ.
މީގެ ކުރިން ވެސް އިޒްރޭލުގެ ޖަލުތަކުގައި އަދްނާން ބަންދުކޮށްފައިވެ އެވެ. ރަންދާ ބުނީ ޖަލުގައި ބަންދުކުރުމުން ހަތަރު ފަހަރެއްގެ މަތިން އޭނާ ބަނޑުހައި ހޫނުކަމުގެ ހަޅުތާލު ކުރި ކަމަށެވެ.
ފަލަސްތީނުގެ ގައިދީންނާ ބެހޭ ޖަމިއްޔާއަކުން ވެސް ވަނީ މިދިޔަ ހަފުތާގައި އޭނާހެ ސިއްހީ ހާލަތާ މެދު ކަންބޮޑުވުން ފާޅުކޮށްފަ އެވެ. އެ ޖަމިއްޔާއިން ގޮވާލީ އޭނާ މިނިވަން ކުރުމަށެވެ.
ރިޕޯޓުތައް ބުނާ ގޮތުން އަދްނާން މަރުވިކަން ކަށަވަރުވުމާ އެކު ހަމާސްއިން ކޮންޓްރޯލް ކުރާ ގާޒާއިން ވަނީ އިޒްރޭލަށް އަމާޒުކޮށް ރޮކެޓު ހަމަލާތައް ފޮނުވައިފަ އެވެ. އޭނާގެ މަރާ އެކު އިޒްރޭލާއި ފަލަސްތީނުގެ މަޝްރަހު އިތުރަށް ގޯސްވުމުގެ ފުރުސަތު ބޮޑެވެ.
