ތެހްރާން، އިރާން (އެޕްރީލް 30) - އިގުތިސާދީ ގޮންޖެހުންތައް ގިނަވެފައިވާ އިރާނުގައި ތަކެތީގެ އަގު ބޮޑު ވާތީ އިންޑަސްޓްރީ މިނިސްޓަރު މަގާމުން ވަކިކުރަން ޕާލަމެންޓުން ނިންމައިފި އެވެ.
ރިޒާ ފާތެމޯ އަމީންގެ އިތުބާރު ނެތްކަމުގެ ވޯޓު ނެގި އިރު، އޭނާ މަގާމުން ވަކިކުރަން ބޭނުންވީ 162 މެމްބަރުންނެވެ. އަދި މަގާމުގައި ބަހައްޓަން ވޯޓުލީ 102 މެމްބަރުންނެވެ.
މީގެ ކުރިން ވެސް ތަކެތީގެ އަގު ބޮޑު ވާތީ ރިޒާއާ ދެކޮޅަށް އިތުބާރު ނެތްކަމުގެ މައްސަލަ ޕާލަމެންޓަށް ހުށަހެޅި އެވެ. އެކަމަކު މިދިޔަ ނޮވެމްބަރު މަހު ނެގި ވޯޓުގައި 182 މެމްބަރުން ނިންމީ އޭނާ މަގާމުގައި ބެހެއްޓުމަށެވެ.
ބައިނަލްއަގްވާމީ ދަތިކުރުމުގެ ފިޔަވަޅުތަކާ ހެދި އިރާނަށް ތަކެތި އިމްޕޯޓް ކުރުމަކީ ގޮންޖެހުމެކެވެ. އެހެންވެ، އިރާނުގެ އެތެރޭގައި ތަކެތި އުފެއްދުން މުހިއްމެވެ.
ރިޕޯޓުތައް ބުނާ ގޮތުން އިންޑަސްޓްރީ މިނިސްޓަރު ވަކިކުރަން ނިންމި މައިގަނޑު އެއް ސަބަބަކީ އިރާނުގައި އިފައްދާ އުޅަނދުގެ އަގު ބޮޑުވުމެވެ.
ބޮޑެތި ސިޔާސަތުތަކުގައި ފަހު ބަސް ބުނުމުގެ ބާރު އޮންނަ ރޫހާނީ ލީޑަރު އާޔަތުﷲ އަލީ ހާމަނީ މިދިޔަ އަހަރު ވަނީ އަގު އުފުލި، އުޅަނދުތަކުގެ ކޮލިޓީ ދަށްވާތީ ފާޑުވިދާޅުވެފަ އެވެ.
