ތެހްރާން، އިރާން (އެޕްރީލް 29) - އިރާނުގެ ނުފޫޒު ގަދަ ދީނީ ލީޑަރަކަށް ހަމަލާދީ މަރާލިތާ ގިނަ ދުވަސްތަކެއް ނުވަނީސް، ދެ ވަނަ ދީނީ ލީޑަރަކަށް ވަޅިން ހަމަލާ ދީފި އެވެ.
އެ ހާދިސާ ހިނގީ ގޯމް ސިޓީގަ އެވެ. މަގުމަތީގައި ތިބި ދެ މީހެއްގެ ގައިގައި ކާރުން ޖައްސައި އަނިޔާވެފައި ވަނިކޮށް، ޑްރައިވަރު ފައިބައިގެން ގޮސް ވަޅިން ހަމަލާ ދިނީ ކަމަށް ރިޕޯޓުތައް ބުނެ އެވެ.
އަނިޔާވި ދެ މީހުންގެ ތެރެއިން އެކަކަކީ ދީނީ ލީޑަރެއް ކަމަށް ފުލުހުން ބުންޏެވެ. އެ ހަމަލާގައި ޑްރައިވަރަށް ވެސް އަނިޔާވި އެވެ. އެ އެންމެން ވަނީ އިތުރު ފަރުވާއަށް ހޮސްޕިޓަލަށް ގެންގޮސްފަ އެވެ.
ދީނީ ލީޑަރު އައިސީޔޫގައި އޮތް އިރު، ހަމަލާ ދިން ސަބަބެއް ނޭނގެ އެވެ. މީގެ ދެ، ތިން ދުވަސް ކުރިން ވެސް ވަނީ ދީނީ ލީޑަރެއްގެ ގަޔަށް ބަޑި ޖަހައި މަރާލައިފަ އެވެ.
އެ ފަހަރު މަރުވި އާޔަތުﷲ އައްބާސް އަލީ ސުލެއިމާނީއަކީ އިރާނުގެ ރޫހާނީ ލީޑަރު ވަކިކުރުމާއި ހޮވުމުގެ ބާރު ލިބިފައިވާ ކައުންސިލުގެ ނުފޫޒު ގަދަ މެމްބަރެކެވެ.
އިރާނުގެ ނޫސްތަކުން ބުނާ ގޮތުގައި މިދިޔަ ބުދަ ދުވަހު ވެސް ކާރަކު ޖައްސައި ދީނީ އިލްމުވެރިއަކަށް ހަމަލާ ދިނެވެ. އެކަން ކުރި މީހާ ހޯދުމުގެ މަސައްކަތް އަދިވެސް ދަނީ ކުރަމުންނެވެ.
