ރާމަﷲ، ފަލަސްތީން (އެޕްރީލް 28) - ބަނޑުހައި ހޫނުކަމުގެ ހަޅުތާލެއް ކުރަމުންދާ ފަލަސްތީނުގެ ގައިދީއެއްގެ ހާލު ގޯސްވަމުންދާ ކަމަށް އެކްޓިވިސްޓުން ބުނެފި އެވެ.
އުމުރުން 45 އަހަރުގެ ހާދިރް އަދްނާން ހަޅުތާލު ކުރަމުން ދާތާ 80 ދުވަސް ވެއްޖެ އެވެ. އޭނާއަކީ ހުޅަނގު އައްސޭރީގައި އުޅޭ އިސްލާމިކް ޖިހާދު ގްރޫޕުގެ މެމްބަރެކެވެ.
އިސްލާމިކް ޖިހާދުން ބުނީ އަދްނާން ހައްޔަރު ކުރީ ފެބްރުއަރީ ފަސް ވަނަ ދުވަހު އިޒްރޭލުގެ ސިފައިން ކަމަށެވެ. ބަންދުކޮށްފައި ހުރީ އެއްވެސް ދައުވާއެއް ނުކޮށް މުއްދަތެއް ނެތް ގޮތަށެވެ.
އަދްނާންގެ އަންހެނުން ރަންދާ މޫސާ އޭއެފްޕީއަށް ބުނީ އަދްނާން ހައްޔަރުކޮށްފައި ހުރީ ރަމްލާ ޖަލުގެ ކްލިނިކެއްގައި ކަމަށެވެ.
"އާއްމު ހޮސްޕިޓަލަށް އޭނާ ބަދަލު ކުރަން އިޒްރޭލުން ދެކޮޅު ހަދާ. ގާނޫނީ ވަކީލެއް ޒިޔާރަތް ކުރުމުގެ ފުރުސަތު ދޭން ވެސް ދެކޮޅު ހަދާ،" ރަންދާ ބުންޏެވެ.
މީގެ ކުރިން ވެސް އިޒްރޭލުގެ ޖަލުތަކުގައި އަދްނާން ބަންދުކޮށްފައިވެ އެވެ. ރަންދާ ބުނީ ޖަލުގައި ބަންދުކުރުމުން ހަތަރު ފަހަރެއްގެ މަތިން އޭނާ ބަނޑުހައި ހޫނުކަމުގެ ހަޅުތާލު ކުރި ކަމަށެވެ.
ފަލަސްތީނުގެ ގައިދީންނާ ބެހޭ ޖަމިއްޔާއަކުން ވަނީ އޭނާހެ ސިއްހީ ހާލަތާ މެދު ކަންބޮޑުވުން ފާޅުކޮށްފަ އެވެ. އެ ޖަމިއްޔާއިން ގޮވާލީ އޭނާ މިނިވަން ކުރުމަށެވެ.
އަދްނާން މަރުވި ކަމަށް ހަބަރު ފެތުރުމާ އެކު އިޒްރޭލުގެ ޖަލުތަކާ ބެހޭ އިދާރާއިން ދާދި ފަހުން ބުނީ އޭނާ މަރުނުވާ ކަމަށެވެ. އެކަމަކު އޭނާގެ ހާލަތާ ގުޅޭ އެއްވެސް އެއްޗެއް ނުބުނެ އެވެ.
