ރާއްޖޭގެ ސިމްޑީ ގްރޫޕާއި ޔޫއޭއީގެ އަރަބެކްސް ގުޅިގެން ތައާރަފްކުރާ ރާއްޖޭގެ ފުރަތަމަ ލަގްޒަރީ އެއާލައިން، "ބިއޮންޑް" އަށް ދިވެހި ކެބިން ކްރޫއިން ހޯދަން ހިންގި ހަރަކާތަށް ބޮޑު ތަރުހީބެއް ލިބުނު ކަމަށް އެ އެއާލައިނުން ބުނެފި އެވެ.
ބިއޮންޑުން ބުނީ ކެބިން ކްރޫއިންގެ ވަޒީފާއަށް ކުރިމަތިލާން އެކުންފުނިން ހުޅުވައިލި ފުރުސަތަށް އޮންލައިންކޮށް 4،000 އަށް ވުރެ ގިނަ ޒުވާނުން ކުރިމަތިލި އިރު މާލޭގައި ބުދަ ދުވަހު ކުރިއަށް ގެންދިޔަ ވޯކް-އިން އިންޓަވިއުއަށް ވެސް އެތައް ސަތޭކަ ޒުވާނުން ދިޔަ ކަމަށެވެ. އެ އާލައިނުން ބުނި ގޮތުގައި ކެބިން ކްރޫގެ ވަޒީފާއަށް ކުރިމަތިލީ ފަރާތްތައް ޝޯޓްލިސްޓްކޮށް އިތުރު އެސެސްމެންޓެއް ވަނީ ހަދައިފަ އެވެ.
ޝޯޓްލިސްޓްކޮށް އެސެސްމެންޓް ހެދި ފަރާތްތަކަށް ދެން އޮންނާނީ ބިއޮންޑްގެ މެނޭޖްމަންޓްގެ އިސް ފަރާތްތަކުން ކުރާ އިންޓަވިއު އެކެވެ. ބިއޮންޑުން ބުނި ގޮތުގައި އެ އާލައިނަށް މުވައްޒަފުން ނެގުމުގެ މަރުހަލާތައް އެހާ ވަރުގަދައީ އެވަޒީފާތަކަށް ނަގަން ބޭނުންވަނީ އެންމެ ރަނގަޅު ފަރާތްތައް ކަމަށް ވާތީ އެވެ.
ފަންތީގެ ވައިގެ ދަތުރުފަތުރުގެ ހިދުމަތް ދިނުމުގެ މަގުސަދުގައި މި އަހަރު އުދުހެން ފަށާ ބިއޮންޑުގެ އެއް ޕާޓްނަރު އަރަބޭސްކަކީ އޭވިއޭޝަން ދާއިރާގެ ތަޖުރިބާކާރުން އުފައްދާފައިވާ އިންވެސްޓްމަންޓް ކުންފުންޏެކެވެ.
