ޖެނީވާ، ސްވިޓްޒަލޭންޑް (އެޕްރީލް 26) - މި އަހަރުގެ ތެރޭގައި ކޮވިޑް-19 އާ ގުޅުން ހުރި މަރުތައް 95 ޕަސެންޓު ދަށްވެފައިވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ޑަބްލިއުއެޗްއޯއިން ބުނީ ކޮވިޑް އެއްކޮށް ނައްތާލެވޭނެކަމުގެ ނިޝާނެއް ނެތް ކަމަށާއި ގައުމުތަކުން ކޮވިޑާ އެކު އުޅެން ދަސްކުރަން މަޖުބޫރުވެފައިވާ ކަމަށެވެ.
އެގޮތުން "ލޯންގް ކޮވިޑް" ނުވަތަ ކޮވިޑް ޖެހޭ ބައެއް މީހުންނަށް ދިގުދެމިގެންދާ ގޮތަށް ދިމާވާ ސިއްހީ މައްސަލަތައް މެނޭޖް ކުރަން ދަސްކުރުން މުހިއްމު ކަމަށް ފާހަގަކުރި އެވެ.
ޑަބްލިއުއެޗްއޯގެ ސެކެޓްރީ ޖެނެރަލް ޓެޑްރޯސް އަދަނޮމް ވިދާޅުވީ ކޮވިޑް ޖެހޭ ކޮންމެ 10 މީހަކުން އެކަކަށް "ލޯންގް ކޮވިޑް" ކުރިމަތިވާ ކަމަށް ލަފާކުރެވޭ ކަމަށެވެ.
ކޮވިޑް މަރުތައް 95 ޕަސެންޓު މަދުވި ނަމަވެސް ބައެއް ގައުމުތަކުގައި ކޭސްތައް އިތުރުވަމުންދާ ކަމަށް ޑަބްލިއުއެޗްއޯއިން ފާހަގަކުރި އެވެ. ފާއިތުވި ހަތަރު ހަފުތާގައި ކޮވިޑް ޖެހިގެން 14،000 މީހުން މަރުވި އެވެ.
ދުނިޔޭގެ ސިއްހީ ޖަމިއްޔާއިން ގޮވާލީ ވައިރަހަށް އަންނަމުންދާ ބަދަލުތައް ދެނެގަނެ ތައްޔާރީ ހާލަތުގައި ތިބުމަށް، ގަވާއިދުތން ޓެސްޓު ކުރުމަށް ގައުމުތަކުގައި ބާރު އެޅުމަށެވެ.
