އާބާދީގެ ނިސްބަތުން ކޮވިޑުގެ ބަލިމަޑުކަމުގައި އެންމެ ގިނަ މީހުން މަރުވީ ރާއްޖޭގައި ކަމަށް ބުނެ ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ދޮގު ހައްދަވައިފި އެވެ.
ރޭ އިދިކޮޅު އެމްޑީޕީން ބޭއްވި ޖަލްސާގައި، ކޮވިޑު ދުވަސްވަރު އޮތް އެ ޕާޓީގެ ވެރިކަމުގައި އެ ބަލިމަޑުކަމުން އަރައިގަތުމަށް ކުރި މަސައްކަތްތައް އޭރުގެ ވެރިން ވަނީ ފާހަގަކޮށްފަ އެވެ.
އެކަމަށް ރައްދު ދެއްވާ އެކްސްގައި ކުރި ޕޯސްޓެއްގައި ޝުޖާއު ވިދާޅުވީ، ކޮވިޑުގައި އެމްޑީޕީން އެޅި ދޯދިޔާ ފިޔަވަޅުތަކުގެ ސަބަބުން އަދިވެސް ގައުމު އަރައިގަނެފައިނުވާ ކަމަށެވެ. އެގޮތުން، ވެންޓިލޭޓަރުތަކުގެ މައްސަލައާއި ފައިސާ ޗާޕުކުރި މައްސަލަ އޭނާ ފާހަގަކުރެއްވި އެވެ.
"މިރޭ އެމްޑީޕީ ޖަލްސާގައި އޮތީ ކޮވިޑް މެނޭޖު ކުރި މޮޅުގޮތް ކިޔާދިނުން. އާބާދީގެ ނިސްބަތުން ކޮވިޑް ބަލީގައި އެންމެ ގިނަ ރައްޔިތުން ނިޔާވީ ދިވެހިރާއްޖޭގަ. ތާހިރެއްނު. ވަރަށް މޮޅެއްނޫންތޯ ތިބޭފުޅުން މިބަލިން ދިވެހީން ރައްކާތެެރި ކުރުމަށް އެޅި މޮޅު ފިޔަވަޅުތައް،" އެ ޕޯސްޓުގައި އޭނާ ލިޔުއްވާފައިވެ އެވެ.
ކޮވިޑުގައި ރާއްޖެއިން މަރުވި މީހުންގެ އަދަދަކީ 316 އެވެ. މި ބަލިމަޑުކަމުގެ ރަސްމީ ނަމްބަރުތައް ބަލަހައްޓަމުންދާ އެތައް މަސްދަރަކުން ފެންނަން ހުރި ގޮތުގައި މިއީ އާބާދީގެ ނިސްބަތުން ގައުމަކުން މަރުވި އެންމެ ގިނަ އަދަދެއް ނޫނެވެ.
ކޮވިޑުގެ މަރުތަކުގެ ހިސާބުތައް ދައްކާގޮތުން ދުނިޔޭގައި މި ބަލިމަޑުކަމުގައި އާބާދީގެ ނިސްބަތުން އެންމެ ގިނަ މީހުން މަރުވީ ޕެރޫ ގަ އެވެ. އެއީ ކޮންމެ މިލިއަނަކުން 6،595 މީހުންނެވެ. ދެވަނައިގައި ބަލްގޭރިއާ އޮތް އިރު ތިންވަނައިގައި އޮތީ ހަންގޭރީ އެވެ.
މި ލިސްޓުގައި ރާއްޖެ އޮތީ 132 ވަނައިގަ އެވެ. މިއީ ދުނިޔޭގެ ކުރިއަރާފައިވާ އެތައް ގައުމަކާ އަޅާބަލާއިރުވެސް ރަނގަޅު ދަރަޖައެއްކަން ފާހަގަކޮށްލެވެ އެވެ.
އޭގެއިތުރުން، ކޮވިޑުގެ ބަލިމަޑުކަމުގެ ތެރޭ އެ ބަލިން ރައްކާތެރިވުމަށް އަދި އެ ބަލިމަޑުކަމާއެކު އުޅުމަށް ގިނަ މަސައްކަތްތަކެއް ކޮށް އެންމެ ފުރަތަމަ ބޯޑަރު ހުޅުވި ގައުމަތުގައިވެސް ރާއްޖެ ހިމެނެ އެވެ.
