އައްމާން، އުރުދުން (އެޕްރީލް 24) - ހުޅަނގު އައްސޭރިއަށް ހަތިޔާރާއި ރަން ވަގަށް އެތެރެކުރަން އުޅުނުކަމުގެ ތުހުމަތުގައި އުރުދުންގެ ޕާލަމެންޓު މެމްބަރަކު އިޒްރޭލުގައި ހައްޔަރުކޮށްފި އެވެ.
"އިޒްރޭލުން ހައްޔަރުކޮށްފައި ހުރި އެމްޕީ އިމާދް އަލް އަދްވާންގެ ހާލަތު އުރުދުންގެ އިދާރާތަކުން ދަނީ ބަލަަމުން،" އުރުދުންގެ ފޮރިން މިނިސްޓްރީގެ ބަޔާނެއްގައި ބުންޏެވެ.
އަދްވާން ހައްޔަރު ކުރި ރަނާއި ހަތިޔާރު ވަގަށް އެތެރެކުރަން އުޅުނު ކަމަށް ބެލެވޭ މައްސަލައެއްގައި ސުވާލު ކުރުމަށް ކަމަށް ވެސް އެ ބަޔާނުގައި ބުންޏެވެ.
އުމުރުން 35 އަހަރުގެ އަދްވާންއަކީ އުރުދުންގެ ޕާލަމެންޓުގައި އޮންނަ ފަލަސްތީނުގެ ކަންކަމާ ބެހޭ ކޮމިޓީގެ މެމްބަރެކެވެ.
އިޒްރޭލުގެ ނޫސްތަކުން ރިޕޯޓު ކުރި ގޮތުގައި އޭނާ ހައްޔަރު ކުރީ ހުޅަނގު އައްސޭރީގެ ކިންގް ހުސެން ކްރޮސިން ސަރަހައްދުންނެވެ. ހުޅަނގު އައްސޭރިއަކީ 1967 ވަނަ އަހަރުން ފެށިގެން އިޒްރޭލުން ގާނޫނާ ހިލާފަށް ވެރިކޮށްގެން އުޅޭ ފަލަސްތީނުގެ ބިމެކެވެ.
ރިޕޯޓުތައް ބުނާ ގޮތުން އަދްވާންގެ ކާރުން ފެނުނު ހަތިޔާރާއި ރަން ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ. ސޯޝަލް މީޑިއާގައި ދައުރުވަމުންދާ ވީޑިއޯއެއްގައު ފެންނަނީ ފިސްތޯލާއި ރައިފަލް ބަޑިތަކެއް ކާރުން ނެރޭ މަންޒަރެވެ.
އޭނާ ހައްޔަރު ކުރުމާ ގުޅޭ ގޮތުން އިޒްރޭލުން މިހާތަނަށް ރަސްމީކޮށް އެއްވެސް އެއްޗެއް ނުބުނެ އެވެ. އުރުދުންއިން އިޒްރޭލާ އެކު ޑިޕްލޮމެޓިކް ގުޅުން ގާއިމްކުރީ 1994 ވަނަ އަހަރު އެވެ.
