އާ ސީޒަނަށް ކްލަބް ވެލެންސިއާ އަށް ގެނައި، ސީނިއާ ދެ ކުޅުންތެރިން ކަމަށްވާ އިބްރާހިމް ވަހީދު ހަސަން (އިއްބެ) އާއި ރިލްވާން ވަހީދު (ރިލޭ) ނުލައި، ޕްރެޒިޑެންޓްސް ކަޕްގައި ވާދަކުރުމަކީ ބޮޑު ޗެލެންޖެއް ކަމަށް ވެލެންސިއާގެ ކޯޗު އަހުމަދު މުޖުތަބާ (ފެސްކޯ) ބުނެފި އެވެ.
ސީޒަނަށް ތައްޔާރުވުމުގެ ގޮތުން ގެނައި ސީނިއާ ކުޅުންތެރިން ކަމަށްވާ ރިލޭ އާއި އިއްބެ އެ ޓީމު ޕްރެޒިޑެންޓްސް ކަޕްގައި ކުޅުނު ފުރަތަމަ މެޗުގައި ސަސް އާ ދެކޮޅަށް ނުކުޅެވުނެވެ. ލީގަށް އަންނަ ޓްރާންސްފާ ބްރޭކްގެ ކުރިން މި ދެ ކުޅުންތެރިންނަށް ނުކުޅެވޭނެކަން ކޯޗު ފެސްކޯ ވަނީ ޔަގީންކޮށްދީފަ އެވެ.
ސީޒަނަށް ތައްޔާރުވުމުގެ ގޮތުން ގެނައި ރިލޭ އާއި އިއްބެ އަށް ވެލެންސިއާ އަށް ނުކުޅެވުނީ ރަޖިސްޓްރޭޝަން ކަންކަން ފުރިހަމަވެފައިނުވާތީ އެވެ. އެހެން ކްލަބްތަކަށް ކުޅުނު ކުޅުންތެރިންނަށް ވެލެންސިއާ ކުޅުންތެރިންގެ ގޮތުގައި ރަޖިސްޓްރީ ކުރެވެން އޮތީ، މިދިޔަ ސީޒަނުގައި ވެލެންސިއާ އަށް ކުޅުނު ކުޅުންތެރިންނަށް ނުދީ ހުރީ މުސާރައިގެ މައްސަލަތަކުގައި ހައްލަކަށް އާދެވިގެންނެވެ.
ފެސްކޯ ބުނީ އިއްބެ އާއި ރިލޭގެ ތަޖުރިބާ ވެލެންސިއާގެ ޒުވާން ޓީމަށް މުހިންމު ކަމަށާއި، އެ ދެ ކުޅުންތެރިން ނެތުމަކީ ޗެލެންޖެއް ކަމަށެވެ. އޭނާ ބުނީ ފުރަތަމަ ތައްޔާރުވީ އެ ދެ ކުޅުންތެރިންނާ އެކު ކަމަށާއި ފަހު ވަގުތު އެ ބަދަލު ގެންނަން ޖެހުނީ ކަމަށެވެ.
"ވަރަށް ބޮޑު ޗެލެންޖަކަށް މި ނިކުންނަނީ. ސީނިއާ ކުޅުންތެރިންނާ އެކު ކުޅެވޭނަމަ މި ޒުވާން ކުދިންނަށް ތަންކޮޅެއް ރަނގަޅަށް ޕާފޯމްކުރަން ޗާންސް ވެސް ލިބޭނެ. އެ އިތުބާރުވެސް ބޮޑުވާނެ. މި ދެ ކުޅުންތެރިން މި ޓްރާންސްފާ ޕީރިއަޑްގައި ބޭނުމެއް ނެތް ކުރެވެން. ކަންދިމާކުރި ގޮތުން ޒުވާން ޓީމެއް ބޭނުންކުރަން މި ޖެހުނީ." ފެސްކޯ ބުންޏެވެ.
ވެލެންސިއާގެ ސްކޮޑުގައި 15 އަހަރުން ދަށުގެ ވިއްސަކަށް ކުޅުންތެރިން ތިބުމާ އެކު މި ދަނޑިވަޅުގައި އެންމެ މުހިންމު އިސްކަމެއް ދޭން ޖެހޭ އެއް ކަމަކީ ކުޅުންތެރިން "އޯވާ ޔޫސް" ނުކޮށް ފަރުވާތެރިކަމާ އެކު މުޅި ސީޒަންގައި ބޭނުންކުރެވޭނެ ގޮތްތަކަށް ކަމަށް ވެސް ފެސްކޯ ވަނީ ބުނެފަ އެވެ.
އޭނާ ބުނީ ބައެއް މީހުންގެ ނަޒަރުގައި މިހާ ޒުވާން ކުޅުންތެރިން މި ލެވެލްއަށް ނެރެން މިއީ ރަނގަޅު ހާލަތަށް ނުވެދާނެ އެވެ. އެކަމަކު، އޭނާގެ ވިސްނުން ތަފާތު ކަމަށާއި، ޒުވާން ކުޅުންތެރިން އެ ޕޮޓެންޝިއަލް ހުރި ނަމަ ފުރުސަތު ދޭން ނުޖެހޭ އެއްވެސް ސަބަބެއް ނެތްކަމަށް ފެސްކޯ ބުންޏެވެ.
"ފަހަރުގައި މިއީ އެންމެ ރަނގަޅު ޓައިމް އަށް ނުވެދާނެ މި ޒުވާން ޓީމް ނެރެން. އެކަމަކު ޒުވާން ކުޅުންތެރިން ފުރަތަމަ ޑިވިޝަންގައި ކުޅުމަކީ އާ ކަމެއް ނޫން. މިއީ ހަމަ ރަނގަޅު ހާލަތު ކަމުގައި އަޅުގަނޑު ދެކެނީ. ދެން މުހިންމު އެކަމަކު މި ކުޅުންތެރިން އޯވާ ޔޫސްއެއްވެސް ނުކުރެވޭނެ. ވަރަށް ބެލެންސްކޮށް ހުރިހާ ކުޅުންތެރިން ގެންގުޅެން ޖެހޭނީވެސް. އަޅުގަނޑާއި އަޅުގަނޑުގެ ޓީމުން ޕްލޭންތަކެއް ހަދައިގެން ކުޅުންތެރިން މި ބޭނުންކުރަނީ."
މިރޭ އީގަލްސްއާ ދެކޮޅަށް ނިކުންނައިރު ލިބޭ އެންމެ ބޮޑު ހިތްހަމަޖެހުމަކީ ސަސް މެޗުގައި ވެލެންސިއާ ޓީމުން ދެއްކި ކުޅުން ކަމަށާއި 5-0 އިން ބަލިވިޔަސް އެ އަށް ނުބަލައި، ޕޮޒިޓިވް ކަންކަމަށް ފޯކަސް ކުރުން ކަމަށެވެ.
ފެސްކޯ ބުނީ ކޮންމެ ގޮތަކަށް ހާލަތު އޮތަސް އެ ވާހަކަ ދެއްކުމުގެ ބޭނުމެއް ނެތް ކަމަށާއި، ވާދަވެރި މުބާރާތެއްގައި ވާދަކޮށްގެން އުޅޭއިރު ވެލެންސިއާގެ ފޯކަސް ހުރި ރަނގަޅު ނަތީޖާއެއް ހޯދުމަށް ކަމަށެވެ.
އީގަލްސް އަކީ މި ސީޒަނަށް އެންމެ ރަނގަޅަށް ތައްޔާރުވި އެއް ޓީމް ކަމަށާއި މި މެޗު ގިނަ ގޮތްގޮތުން ޗެލެންޖިން ވާނެ ކަމަށް ވެސް ފެސްކޯ ވަނީ ބުނެފަ އެވެ.
އޭނާ ބުނީ ވެލެންސިއާގެ ފޯކަސް އަބަދު ވެސް ހުންނާނީ އެ ޓީމުގެ ސްޓައިލްގައި ކުޅުމަށް ކަމަށާއި، ކޮންމެ މެޗަކަށް ވެސް ވެލެންސިއާގެ ފަރާތުން އެ ސީރިއަސްކަން ފެންނާނެ ކަމަށެވެ.
"މިދިޔަ މެޗުގައި ޕާފޯމަންސް ވަރަށް ރަނގަޅު. އެކަމަކު ރިޒަލްޓް ތަންކޮޅެއް ދަށްކޮށްދިޔައީ. އެކަމަކު، މިވަގުތު ޓީމްގެ ހާލަތަށް ބަލާއިރު ހަމަ ޕާފޯމަންސާ މެޗު އަޅުގަނޑު ހިތްހަމަޖެހޭ. ވާދަވެރި މުބާރާތެއްގައި ބައިވެރިވެގެން އުޅޭއިރު ހާލަތޭ ބުނެގެންވާނެ ފައިދާއެއް ނެތް. މިދިޔަ މެޗުގައި ޒުވާން ކުޅުންތެރިންނާއި ސީނިއާ ކުޅުންތެރިންގެ ފަރާތުން ފެނުނު ކުޅުން ރަނގަޅު. ހަމައެކަނި ސްކޯލައިން އަޅުގަނޑު ހީކުރިވަރަށްވުރެ ބޮޑުކޮށް ފެނުނީ." ފެސްކޯ ބުންޏެވެ.
މިދިޔަ ސީޒަނުގެ ޕްރެޒިޑެންޓްސް ކަޕްގެ ތަށި ކްލަބް ވެލެންސިއާ އިން ހޯދީ މުބާރާތުގެ އެއްވެސް މެޗަކުން ބަލިނުވެ އެވެ. މިދިޔަ ފަހަރު ޕްރެޒިޑެންޓްސް ކަޕްގައި ވެލެންސިއާ އަށް ބަލިނުކުރެވުނު ހަމައެކަނި ޓީމަކީ އީގަލްސް އެވެ. ވެލެންސިއާ އަށް ތަށި ދިފާއުކުރަން ސެމީ ފައިނަލަށް ދެވެން އޮތީ ބޮޑު ތަފާތަކުން އީގަލްސް ބަލިކޮށްގެންނެވެ. އީގަލްސް އާއި ވެލެންސިއާ މެޗު ފަށާނީ މިރޭ 22:00 ގަ އެވެ.
