މެޑްރިޑް (އޭޕްރީލް 18) - ރެއާލް މެޑްރިޑަށް ކުޅެމުން އަންނަ ޖަރުމަނުގެ މިޑްފީލްޑަރު، ޓޯނީ ކްރޫސް މި ސީޒަނަށް ފަހު ރިޓަޔާކުރަން ގެންގުޅުނު ހިޔާލު ދޫކޮށްލައި، އިތުރު އެއް އަހަރަށް ރެއާލްގެ ކޮންޓްރެކްޓް އާ ކުރާ ގޮތަށް ހަމަޖެހިއްޖެ އެވެ.
ދިރިއުޅުމުގެ ކަންކަން ބަދަލުވަމުން އަންނަ ގޮތާއި ފުޓްބޯޅައިގެ ޕްރެޝަރުގެ މާހައުލުން ނުކުމެ ހަމަޖެހިގެން އުޅެލަން ޝައުގުވެރިވާ ކަަމަށް ބުނެ، މި ސީޒަނަށް ފަހު ކްރޫސް، 33، ފުޓްބޯޅަ އިން ރިޓަޔާ ކުރުމުގެ ހިޔާލެއް ގެންގުޅޭ މޭރުމަކުން ވާހަކަ ދައްކައި، މިދިޔަ އަހަރު ޖަރުމަނުގެ ނޫހަކަށް އިންޓަވިއު ދިނެވެ.
މިދިޔަ އަހަރު ރެއާލުން ކްރޫސް އަށް ހުށަހެޅި ކޮންޓްރެކްޓްގައި ސޮއިނުކުރަން ނިންމި އެވެ.
އެކަމަކު، މި މަހުގެ ކުރީކޮޅު، ރެއާލްގެ ކޯޗު ކާލޯ އަންޗެލޮޓީ ދިން އިންޓަވިއުއެއްގައި ބުނެފައިވަނީ ކްރޫސްގެ އިތުރުން ލޫކަ މޮޑްރިޗް އާއި ކަރިމް ބެންޒެމާ ވެސް އަންނަ ސީޒަނުގައި ފެންނާނީ ރެއާލުން ކަމަށެވެ.
ސްޕެއިނާއި ޖަރުމަނުގެ މީޑިއާ ރިޕޯޓްތައް ބުނާގޮތުން ކްރޫސް މިހާރު ނިންމައިގެން ހުރީ އަންނަ ސީޒަނުގައި ވެސް ރެއާލަށް ކުޅުމަަށެވެ. އަދި މިހާރު ރެއާލުން ހުށަހަޅާފައިވާ ކޮންޓްރެކްޓްގައިވާ ކަންކަމަށް ވެސް ކްރޫސް ވަނީ އެއްބަސްވެފަ އެވެ.
ބަޔާން ދޫކޮށް 2014 ވަނަ އަހަރު ކްރޫސް އެންމެ ފުރަަތަމަ ގުޅެން މަޝްވަރާކުރީ މެންޗެސްޓާ ޔުނައިޓެޑާ އެވެ. އެކަމަކު، ފަހުން ކާލޯ އަންޗެލޮޓީގެ އެދުމަށް ރެއާލް މެޑްރިޑުން އެ ރޭހަށް ވަދެ، ހަ އަހަރުގެ ކޮންޓްރެކްޓެއްގައި ކްރޫސްގެ ސޮއި ހޯދީ ޖުމްލަ އެކު 35 މިލިއަން ޑޮލަރު ދައްކައިފަ އެވެ. ދުނިޔޭގެ ފުޓްބޯޅައިގައި އެންމެ ކާމިޔާބު މިޑްފީލްޑަރުންގެ ތެރޭގައި ކްރޫސް ހިމެނެ އެެވެ.
