ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލް އަޒީޒް އިރާނަށް ވަޑައިގެންނެވުމަށް ދައުވަތު އަރުވައިފި އެވެ.
މީގެ ކުރިން ސައުދީ ރަސްގެފާނު ވަނީ އިރާނުގެ ރައީސް އިބްރާހިމް ރައިސީ ސައުދީ އަރަބިއްޔާއަށް ވަޑައިގެންނެވުމަށް އެދި ދައުވަތު ފޮނުއްވައިފަ އެވެ.
ހަތް އަހަރަށް ފަހު އިރާނާއި ސައުދީއިން ޑިޕްލޮމެޓިކް ގުޅުން ގާއިމްކުރީ މިދިޔަ މާޗް މަހު ޗައިނާ މެދުވެރިވެގެން ބޭއްވި މަޝްވަރާތަކަށް ފަހު އެވެ.
ދެ ގައުމުގެ ވެރިން ދަތުރު ކުރެއްވުމަށް ރަސްމީކޮށް ދައުވަތު ފޮނުވާފައިވާ އިރު، އެމްބަސީތައް ހުޅުވުމުގެ މަސައްކަތް ދަނީ ބާރަށް ކުރިއަށެވެ.
މިދިޔަ ހަފުތާގައި ސައުދީގެ ވަފުދެއް އިރާނަށް ދަތުރުކުރި އެވެ. އޭގެ އިތުރުން އިރާނުގެ ވަފުދެއް ވެސް ވަނީ ސައުދީއަށް ދަތުރުކޮށްފަ އެވެ.
ރިޕޯޓުތައް ބުނާ ގޮތުން ދެ ގައުމުގެ އަމާޒަކީ މޭ ނުވަ ވަނަ ދުވަހުގެ ކުރިން އެމްބަސީތައް ހުޅުވައި އަލުން ހިދުމަތް ދޭން ފެށުމެވެ.
