ޖުމްހޫރީ ޕާޓީގެ ލީޑަރު ގާސިމް އިބްރާހިމް އަންނަ ރިޔާސީ ރޭހަށް ނެރުމުގެ ފަހަތުގައި އޮތީ ބައެއްގެ އަމިއްލަ އެދުމާއި ފައިސާގެ ދަހިވެތިކަން ކަމަށް އެ ޕާޓީން ދާދި ފަހުން އިސްތިއުފާ ދެއްވި ރައީސް އޮފީހުގެ މިނިސްޓަރު އަހުމަދު ސަމީރު ވިދާޅުވެއްޖެ އެވެ.
ރައީސް އިބްރާހިމް މުހައްމަދު ސޯލިހުއާއެކު ކޯލިޝަން ހެދުމުގެ ބަދަލުގައި ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން ނިންމުމާއެކު، ޖޭޕީގެ އެއް ފައުންޑިން މެމްބަރުގެ ގޮތުގައި ހުންނެވި ސަމީރު ވަނީ ޕާޓީން އިސްތިއުފާ ދެއްވައިފަ އެވެ.
މި ރޯދަ މަހަށް ހާއްސަކޮށްގެން "އަދަދު" އިން ގެނެސްދޭ "ކުޅިކޮށް" ޕްރޮގްރާމްގެ ރޭގެ އެޕިސޯޑުގައި ވާހަކަ ދައްކަވަމުން ސަމީރު ވިދާޅުވީ އަންނަ ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހާ ދެކޮޅަށް ގާސިމް ނުކުންނަވަން ނިންމެވީ، ޕާޓީގެ ތެރޭގައި އަމިއްލަ އެދުމެއްގައި މަސައްކަތްކުރާ ބައެއްގެ ސަބަބުން ކަމަށެވެ.
ޖޭޕީގެ ސެކްރެޓަރީ ޖެނެރަލްގެ މަގާމު ހަ އަހަރު އަދާކުރެއްވި، ސަމީރު ވިދާޅުވީ ގާސިމަށް ލަފާދޭން އަރިހުގައި މިހާރު ތިއްބެވި ބޭފުޅުންނަކީ ކުރީ ސަރުކާރުގައި އެމަނިކުފާނު ޖަލަށްލައި، ގައުމު ދޫކޮށް އަމިއްލައަށް އަރުވާލައިގެން ހުންނަވަން މަޖުބޫރުކުރި ހިތްދަތި ހާލަތަށް ތާއީދުކޮށްގެން އެކަމަށް ހިތްވަރުދިން ބޭފުޅުން ކަމަށެވެ.
އޭނާ ވިދާޅުވި ގޮތުގައި، ގާސިމަށް ވެރިކަމަށް އާދެވޭނެ އެއްވެސް ފޯމިއުލާއެއް އެބޭފުޅުންނަށް ނުދެއްކޭއިރު، އެމަނިކުފާނު ރިޔާސީ ރޭހަށް ނުކުންނަވައިގެން މާޒީގައި ލިބުނު ވަރަށް ވޯޓު ނުލިބުމުގެ ފުރުސަތު ވަރަށް ބޮޑު ކަމަށެވެ.
"އެކަން ބަދަލުކުރެވޭނެ މަސައްކަތްތަކެއް ކުރެވޭނެ ބޭފުޅުން އަރިހުގައި ތިބި ތަނެއް އަޅުގަނޑަށް ނުފެނޭ،" ސަމީރު ވިދާޅުވި އެވެ.
ޖޭޕީގެ ބައެއް އިސް ބޭފުޅުން މަސައްކަތް ކުރައްވަނީ ރާއްޖޭގެ އެންމެ ބޮޑު އެއް މަހުޖަނު ރިޔާސީ ރޭހަށް ނެރުވައިގެން، މާލީ މަންފާތަކެއް ހޯދުމުގެ އިތުރުން، އެ ބޭފުޅުން 2024 ގައި އޮންނަ ރައްޔިތުންގެ މަޖިލީހުގެ އިންތިހާބަށް ބޭނުންވާ ފައިސާ އާއި ފުރުސަތުތަކެއް ފަހި ކުރަން ކަމަށް ވެސް ސަމީރު ތުހުމަތު ކުރެއްވި އެވެ.
ސަމީރު ވިދާޅުވީ ކުރީގެ ތިން ސަރުކާރުން ވެސް ވެރިކަންކޮށްފައިވަނީ ރާއްޖޭގައި ހުރި އެންމެ ބޮޑު އެއް މަހުޖަނު، ގާސިމްގެ މުދާ ނަގައި، އޭނާ ޖަލަށްލައި، އާއިލާއަށް އެތަކެއް ދުއްތުރާތައް ކޮށްގެން ކަމަށެވެ.
ރައީސް ސޯލިހުގެ ސަރުކާރުން ޖޭޕީ ވެސް ހިމެނޭ ކޯލިޝަން ރޫޅާނުލައި، ގައުމަށް ހަމަޖެހުން ގެނުވައި، ހުދު ގާސިމަށް ވެސް ހިތްހަމަޖެހިލައިގެން މަސައްކަތްކުރެވޭނެ ފުރުސަތު ދެއްވި ވެރިއަކާއެކު ހުންނެވުމަކީ، ސަމީރު ވިދާޅުވި ގޮތުގައި ގާސިމް އަބަދުވެސް ގެންގުޅުއްވި އުސޫލު ކަމަށެވެ.
އެ އުސޫލާ ހިލާފަށް ނުކުންނަވައިގެން، މިހާރުގެ ސިޔާސީ ހާލަތަށް ބަލާއިރު، ގާސިމް ވެރިކަމަށް އައުމަށް ރައްޔިތުން ފުރުސަތު ދީފާނެކަމަށް ގަބޫލުނުކުރެއްވޭ ކަމަށް ވެސް ސަމީރު ވިދާޅުވި އެވެ.
