ރާއްޖޭގެ ވޮލީބޯޅަ އަށް އާ ކުޅުންތެރިން ނެރެދޭ އެއް މުބާރާތެއްގެ ގޮތުގައި ޒަމާނުއްސުރެ އޮތް އެއް މުބާރާތަކީ ކޮންޕެނީ/ އޮފީސްތަކުގެ މެދުގައި ކުރިއަށްދާ ވޮލީބޯޅަ މުބާރާތެވެ. ވޭތުވެދިޔަ ހަތަރު ވަރަކަށް އަހަރު އެ މުބާރާތް ނެތުމަކީ ވޮލީބޯޅައިގެ ފޯރި އަށް ބަލާއިރު، ހުސްކަމެއް އައި އެއް ސަބަބެވެ.
އަންނަ މަހުގެ އެއް ވަނަ ދުވަހު، އޮފީސް ވޮލީބޯޅަ މުބާރާތް އަލުން ފަށާއިރު، މިއީ ހަތަރު އަހަރު ތެރޭ ކޮމްޕެނީ/އޮފީސް ވޮލީ މުބާރާތް ބާއްވާނެ ފުރަތަމަ ފަހަރެވެ. މި ވަގުތަށް ބަލާއިރު ވެސް މި މުބާރާތަށް ޓީމުތައް އަންނަނީ ގިނަ މަސައްކަތްތަކެއް ކުރަމުންނެވެ.
އެ ގޮތުން، މުބާރާުތުގައި ރަނގަޅު ޓީމެއް ގޮވައިގެން ވާދަކުރުމުގެ ބޭނުމުގައި ބައެއް އޮފީސްތަކުން އަންނަނީ ގައުމީ ޓީމުގެ ކުޅުންތެރިން ނޫނީ ގައުމީ ލެވަލްގެ ގިނަ ކުޅުންތެރިންތަކަކަށް ވަޒީފާ ހަމަޖައްސައިދީގެން ވެސް ޓީމަށް ކުޅުވަން މަސައްކަތް ކުރަމުންނެވެ.
އޭގެ އިތުރުން، މުބާރާތުގެ ގަވާއިދުގައިވާ ގޮތުން، އެ ވާދަކުރާ އޮފީހެއްގެ ވަޒީފާގައި ނޫޅުނަސް ބޭރުން ދެ ކުޅުންތެރިއަކު ޓީމު ލިސްޓުގައި ހިމެނޭ ގޮތަށް އޮތުމަކީ ވެސް މުބާރާތުގެ ފޯރިގަދަވާނެ ކަމެއް ކަމަށް ވޮލީބޯލް އެސޯސިއޭޝަނުން ގަބޫލުކުރެ އެވެ.
އޮފީހުގައި މަސައްކަތްކުރާ މީހުންގެ އިތުރުން، ޓީމު ލިސްޓުގައި ޖެހޭ ދެ ކުޅުންތެރިންގެ ޖާގައިގެ ތެރެއިން ބިދޭސީ ކުޅުންތެރިން ގެންނަން ވެސް ބައެއް ޓީމުތަކުން އަންނަނީ މަސައްކަތް ކުރަމުންނެވެ. އެ ގޮތުން، ރާއްޖޭގައި ކުޅެފައިވާ ފެންވަރު ރަނގަޅު ބިދޭސީ ކުޅުންތެރިންގެ ޑިމާންޑް ވެސް މި މުބާރާތާ ދިމާކޮށް ވަނީ ގަދަވެފަ އެެވެ.
މި މަހު 20 ވަނަ ދުވަހުގެ ނިޔަަލަށް މުބާރާުތުގައި ބައިވެރިވުމުގެ ފުރުސަތު އޮތީ ހުޅުވާލެވިފަ އެވެ. މުބާރާތުގެ މެޗުތައް ކުޅޭ ގޮތަށް ހަމަޖެހިފައިވަނީ ހުޅުމާލޭގަ އެވެ.
އޮފީސް ވޮލީ މުބާރާތެއް އެންމެ ފުރަތަމަ ބޭއްވިފައިވަނީ 1993 ވަނަ އަހަރު އެވެ. އޭރު އެންމެ ފުރަތަމަ ބޭއްވި އިންޓަ އޮފީސް/ކުންފުނިތަކުގެ މުބާރާތަށް ލިބެމުންދިޔަ ތަރުހީބު އޮތީ ވަރަށް ބޮޑުކޮށެވެ. ރާއްޖޭގެ މަތީ ލެވަލްގެ ގިނަ ކުޅުންތެރިންތަކެއް ވަޒީފާ އަދާކުރާ އޮފީސްތަކަށް މި މުބާރާތް ކުޅެފައިވެ އެވެ. މި ވަގުތު ގައުމީ ވޮލީބޯޅަ ޓީމަށް ބެލިޔަސް ވަކިވަކި ކުޅުންތެރިންނަކީ އެކި އޮފީސްތަކުގައި ވަޒީފާ އަދާކުރާ ކުޅުންތެރިން ކަމަށްވާއިރު، މި އަހަރުގެ އޮފީސް މުބާރާތުން މަޝްހޫރު ގިނަ ކުޅުންތެރިން ފެނިގެންދާނެ އެވެ.
